Amɔsu 3:1-15
3 “Izraɛlifuɛ mun, amun sie amun su tie amun wun ndɛ nga Zoova kannin’n. Amun mɔ amun ti nvle kun m’ɔ ko fali amun Ezipti mɛn’n nun lɔ bali’n, ɔ se amun kɛ:
2 ‘Asiɛ’n su wa nvle’m be kwlaa be nun’n, amun kunngba yɛ n sili amun-ɔn.+
I sɔ’n ti’n, ń úsa amun sa tɛtɛ kwlaa nga amun yoli’n i su ndɛ.+
3 ?Sɛ sran nɲɔn b’a ciciman b’a siemɛn i laa’n, be kwla san nun kɔ lika?
4 ?Sɛ asɔmɔli kun w’a ɲanman nnɛn’n, ɔ́ kpán bo’n nun?
?Sɛ asɔmɔli gbanflɛn kun* o i lawlɛ’n nun naan w’a traman like fi’n, ɔ́ kpán?
5 ?Sɛ b’a suaman anunman kun i wun aya* asiɛ wun’n, ɔ́ yó sɛ naan aya’n w’a trɛ i?
?Sɛ aya kun w’a traman like fi’n, ɔ́ fánndi sa ngbɛn?
6 ?Sɛ be bo awɛ klɔ’n nun’n, sran’m be su usuman?
?Sɛ ɲrɛnnɛn tɔ klɔ’n nun’n, nán Zoova ti-ɔ?
7 Afin sɛ Miɛn Zoova m’ɔ Sie Like Kwlakwla’n w’a kanman sa ng’ɔ o i klun kɛ ɔ́ yó’n i ndɛ w’a klemɛn i sufuɛ nga be ti i nuan ijɔfuɛ’n,ɔ su yoman sa sɔ’n.+
8 Asɔmɔli’n w’a kpan.+ ?Wan yɛ srɛ su kunmɛn i-ɔ?
Miɛn Zoova m’ɔ Sie Like Kwlakwla’n ijɔli. ?Wan yɛ ɔ́ kó sé kɛ ɔ ijɔmɛn i nuan-ɔn?’+
9 ‘Amun bo i ndolo Asdɔdu lɔ fiawlɛ sua nga be ti fleiin’n be sunin Ezipti mɛn’n nun lɔ fiawlɛ sua nga be ti fleiin’n be su.
Amun se kɛ: “Amun yia Samari lɔ oka’m be su.+Amun nian kɛ lika’n w’a sanngan lɔ-ɔ,sran lufle dilɛ yɛ ɔ ti be junman-ɔn.+
10 Afin be siman sa ng’ɔ ti kpa’n i yo.” Zoova yɛ ɔ se sɔ-ɔ.“Like nga be ɲɛn i nzaje sa yolɛ nin sran’m be ninnge’m be sacilɛ’n nun’n, be fa sie i be fiawlɛ sua nga be ti fleiin’n be nun.”’
11 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ:‘Amun kpɔfuɛ kun wá bó sín yía nvle’n.+Ɔ́ yó maan fanngan’n wíe amun nun,kpɛkun ɔ́ fɛ́n ninnge nga be o amun fiawlɛ sua nga be ti fleiin’n be nun’n.’+
12 Ndɛ nga Zoova kan’n yɛ:‘Kɛ nga bua sunianfuɛ’n ko de bua’n i ja nɲɔn mun annzɛ i sukpɔ bue kun’n asɔmɔli’n i nuan’n nun sa’n,bé wá dé Izraɛlifuɛ’m be sɔ,i sɔfuɛ’m be ti bɛ kpakpa mun nin bia tɛnndɛn nga be ti nglanman’n* be su Samari lɔ.’+
13 ‘Amun sie amun su, yɛ amun fa ndɛ’n be sie Zakɔbu i osu’n nunfuɛ’m be ɲrun.’* Miɛn Zoova m’ɔ Sie Like Kwlakwla’n, Ɲanmiɛn m’ɔ ti sonja’m be su kpɛn’n yɛ ɔ kan sɔ-ɔ.
14 ‘Afin cɛn nga ń má úsa Izraɛlifuɛ mun ɲin kekle* nga be yoli’n i su ndɛ’n,+ń má úsa be Betɛli lɔ tɛ yiwlɛ’m be su ndɛ wie.+Bé wá búbú tɛ yiwlɛ’n i wɛ mun gúa asiɛ wun.+
15 Ń búbú ayrɛ blɛ sua’n nin awunyɛyɛ blɛ sua’n.’
‘Sua nga sui je yɛ be fa yoli’n, bé sáci,+yɛ sua dandan’m* be su tranman lɛ kun,’+ Zoova yɛ ɔ se sɔ-ɔ.”
Ja ngua lɔ ndɛ mun
^ Annzɛ “asɔmɔli gbanflɛn mɔ i kɔmin nun ndrɛ’n ti vɔɔ’n.”
^ Be kwla se ekun kɛ “Sɛ b’a faman like b’a siemɛn i aya’n nun’n.”
^ Annzɛ “bia nga be fin Damasi’n.”
^ Annzɛ “amun di Zakɔbu i osu’n nunfuɛ’m be wun lalo.”
^ Annzɛ “sa tɛtɛ.”
^ Be kwla se ekun kɛ “kpanngban.”
