Amɔsu 5:1-27
5 Izraɛlifuɛ mun, amun sie amun su be tie amun wun ndɛ nga n su kan’n. Ɔ ti kɛ ngwlɛ yɛ n su yi* sa-ɔ:
2 ‘Izraɛli nvle m’ɔ ti kɛ talua kun mɔ nin-a siman bian’n sa’n, w’a tɔ.Ɔ kwlá jasoman kun.
Be yacili i lɛ, i bɔbɔ i asiɛ’n su.Sran fi nunman lɛ naan w’a mɛn i su.’
3 “Afin Miɛn Zoova m’ɔ Sie Like Kwlakwla’n waan yoo:
‘Klɔ dan ng’ɔ fa sonja akpi (1.000) kɔ alɛ kunlɛ’n, be nun ya (100) cɛ yɛ bé sá be sin-ɔn.Yɛ ng’ɔ fa sonja ya’n (100), blu cɛ yɛ bé sá be sin-ɔn. Sa ng’ɔ́ ɲán Izraɛlifuɛ mun’n yɛ ɔ o lɛ-ɔ.’+
4 “Afin ndɛ nga Zoova kan kle Izraɛli nvle’n yɛ:
‘Amun kpɛ min sin atin naan amun ka nguan nun.+
5 Nán amun kpɛ Betɛli+ i sin atin,nán amun wɔ Gilgali+ yɛ nán amun tu tra awɛ’n be wɔ Beɛ-Seba,+afin bé trá Gilgali bé kɔ́,+Betɛli liɛ’n, ɔ́ núnnún.*
6 Amun kpɛ Zoova i sin atin naan amun ka nguan nun,+ɔ timɛn i ti’n, ɔ́ káci kɛ sin sa, ɔ́ núnnún Zozɛfu i osu’n nunfuɛ mun,yɛ ɔ́ yrá Betɛli kɔlikɔli, sran fi su kwlá nuɛnmɛn i.
7 Wafa nga amun di jɔlɛ mun’n, w’a kaci kɛ ijre wiwi wie sa,*yɛ amun yili sa nuan su sɛsɛ yolɛ’n i ase.+
8 Sran ng’ɔ yili nzraama akpasua+ nga be flɛ be kɛ Kima’n* nin Kesili’n,*Sran ng’ɔ yo maan lika’n m’ɔ lu’n ɔ kpaja kɛ nglɛmun nun sa’nSran ng’ɔ yo maan wia nun’n, lika’n lu tritritri kɛ kɔnguɛ sa’n,+Sran ng’ɔ flɛflɛ jenvie’n nun nzue munnaan ɔ́ útu be asiɛ ba’n su’n,+i dunman’n yɛle Zoova.
9 Ɔ́ yó maan bé ká lɛ núnnún be nga be le wunmiɛn kpa’n,ɔ́ yó maan lika nga be sisili be wun’n bé búbú mlɔnmlɔn.
10 Be kpɔ be nga be tu be fɔ klɔ’n i anuan nun lɔ’n,yɛ be kpɔ be nga be di nanwlɛ’n.+
11 Asiɛ nga yalɛfuɛ’n di su fie’n ti’n, amun de i sika,*yɛ i fie su ninnge ng’ɔ kpɛ be’n, amun se i kɛ ɔ tuɛ i ti lapo.+I sɔ’n ti’n, sua nga amun fali yɔbuɛ nga be sɛli’n be kplannin’n, amun su tranman be nun sa trilili,+yɛ amun su nɔnman duvɛn nga be fali viɲin waka nga amun tali be’n be nun kpafuɛ’m be mma’m be yili’n.+
12 Afin n si kɛ amun yoli ɲin kekle* kpɛ sunmanyɛ sa nga amun yoli’n, be ti tɛ danyɛle kɛ amun kle be nga be yo sa’n i nuan su sɛsɛ’n be yalɛ,amun sɔ adi ninnge nun,*amun bu yalɛfuɛ’m be ndɛ kwlɛ klɔ’n i anuan’n nun lɔ.+
13 I sɔ’n ti’n, akunndanfuɛ’m bé múan be nuan blɛ sɔ’n nun,afin blɛ sɔ’n wá yó ɲrɛnnɛn blɛ.+
14 Amun yo sa ng’ɔ ti kpa’n, nán amun yo sa tɛ,+i liɛ’n, amún ká nguan nun.+Kpɛkun Ɲanmiɛn Zoova m’ɔ ti sonja’m be su kpɛn’n ɔ́ jrán amun sin,kɛ nga amun bɔbɔ amun waan ɔ jin amun sin’n sa.+
15 Amun kpɔ sa tɛ’n yɛ amun klo sa kpa’n,+amun di jɔlɛ’m be klanman klɔ’n i anuan’n nun lɔ titi.+Atrɛkpa’n, Ɲanmiɛn Zoova m’ɔ ti sonja’m be su kpɛn’nɔ́ sí Zozɛfu i osu’n nunfuɛ nga be kali lɛ’n be aunnvɔɛ.’+
16 “I sɔ’n ti’n, ndɛ nga Ɲanmiɛn Zoova m’ɔ ti sonja’m be su kpɛn’n kan’n yɛ. Zoova waan:
‘Gua’m be kwlaa be su’n, sran’m bé sún,mmuɛ’m be kwlaa be nun’n, bé sé kɛ: “Ɔo, Ɔo!”
Bé flɛ́ fie difuɛ mun naan be wa yo sɛɔ nin be nga sɛ’m be bo sunlɛ yɛ ɔ ti be junman’n, naan be wa sun.’
17 ‘Sunlɛ yɛ bé sún viɲin fie’m be kwlaa be su-ɔ.+Afin ń sín amun afiɛn,’ Zoova yɛ ɔ kan sɔ-ɔ.
18 ‘Be nga ɔ ka be ngunmin nn Zoova i cɛn’n w’a ju’n, be yako!+
?Zoova i cɛn’n nun’n, amun liɛ’n yó sɛ?+
Cɛn sɔ’n, ɔ́ yó aosin tritri, lika’n su kpajaman.+
19 Ɔ́ yó kɛ sran wie m’ɔ su wanndi asɔmɔli i ɲrun, kpɛkun ɔ nin nnɛn ngble nga be flɛ i kɛ ursu’n b’a ko yia nun’n sa,yɛ kɛ ɔ kɔ lele ɔ ko wlu i sua’n nun lɔ m’ɔ fɛ i sa fuɛ i talɛ wun’n, kpɛkun wuo kun w’a kɛ i.
20 Zoova i cɛn’n wlá aosin tritri, lika’n su kpajaman. ?Nɛ́n i-ɔ?Lika’n lú tritriti, ɔ su kpajaman. ?Nɛ́n i-ɔ?
21 N kpɔ cɛn nga amun di be’n, n kloman be kaan sa,+kɛ amun yo amun aɲia ngunmin kun’n, nvan ng’ɔ fin lɔ’n yoman min fɛ kaan sa.
22 Kannzɛ amun yi tɛ nga kɛ bé yí’n be yra nnɛn’n i kɔlikɔli’n naan amun fa like uflɛ be man min’n,min klun su jɔman su kaan sa.+Sɛ amun fa amun nnɛn nga b’a lo kpa’n be yi bo kun yolɛ tɛ’n, n su nianman be lɔ naan se kɛ ń sɔ́ nun.+
23 Nán maan amun jue nga amun to’n, ɔ gua min su’n nun wa.Yɛ nán maan n ti miziki bolɛ ninnge nga be bo’n i tɛlɛ’n.+
24 Maan ndɛnman su nantilɛ’n yo kɛ nzue m’ɔ su sonji’n sa,+yɛ maan sa nuan su sɛsɛ yolɛ’n yo kɛ nzue ba kun m’ɔ wieman nun le’n sa.
25 ?Izraɛlifuɛ mun, afuɛ ablanan (40) nga amun dili i aawlɛ flɛnnɛn’n nun lɔ’n,amun yili tɛ mannin min yɛ amun mannin min like?+
26 Siɛn’n, amún wá fá Sakiti m’ɔ ti amun famiɛn’n nin Kewanin,*amun ninnge nga amun sɛli be’n, mɔ amun fa yoli amun ɲanmiɛn’n i nzraama’n bé kɔ́,
27 yɛ ń trá amun kɔ́ Damasi i sin lɔ.’+ Sran nga be flɛ i kɛ Ɲanmiɛn Zoova m’ɔ ti sonja’m be su kpɛn’n yɛ ɔ kan sɔ-ɔ.”+
Ja ngua lɔ ndɛ mun
^ Annzɛ “sɛ yolɛ jue yɛ n su to.”
^ Be kwla se ekun kɛ “ɔ́ káci klunwi lika.”
^ Annzɛ “w’a kaci klunngbɔ.”
^ Atrɛkpa’n, nzraama akpasua nga be flɛ i kɛ Oriɔn’n i ndɛ yɛ be kan-ɔn.
^ Atrɛkpa’n, Akɔta nin i Mma mun-ɔn. Be o nzraama akpasua nga be flɛ i kɛ Toro’n nun.
^ Annzɛ “amun de asiɛ’n i ti lapo.”
^ Annzɛ “sɔ sika’n nun kpɛkun amun muan amun nuan.”
^ Annzɛ “sa tɛtɛ.”
^ Atrɛkpa’n, amuin sɔ’m be ti nglo lɔ like (planɛti) nga be flɛ i kɛ Satirnin’n i nzɔliɛ. Be sɔ i kɛ amuin wie sa.
