Amɔsu 7:1-17
7 Like nga min Min Zoova m’ɔ Sie Like Kwlakwla’n fa kleli min’n yɛ: Kɛ ninnge nga be luali be kasiɛn’n* be boli fifilɛ bo cɛ’n, ɔ sunmannin lalo akpasua wunmuan kun. Kɛ be kpɛli famiɛn’n i ijre’n mɔ be luali fie su ninnge kasiɛn mun’n, yɛ ɔ yoli sɔ-ɔ.
2 Kɛ lalo kaka sɔ’m be wieli nvle’n nun ijre nin nɲa’m be di’n, n seli kɛ: “Ee! Min Min Zoova, wɔ mɔ a Sie Like Kwlakwla’n, ń srɛ́ wɔ, yaci!+ ?Ɔ́ yó sɛ naan Zakɔbu w’a fite nun?* Afin ɔ ti fakafaka dan.”+
3 I sɔ’n ti’n, Zoova w’a diman ajalɛ ng’ɔ fali’n su kun.*+ Zoova seli kɛ: “I sɔ sa’n su juman.”
4 Like nga e Min Zoova m’ɔ Sie Like Kwlakwla’n fa kleli min’n yɛ: E Min Zoova m’ɔ Sie Like Kwlakwla’n kpan flɛli sin’n naan ɔ́ fá tú i nvle’n nunfuɛ’m be fɔ. Sin’n jueli lele jenvie’n nun nzue’n wieli nun weiin, kpɛkun ɔ yrali nvle’n i bue kun sekeseke.
5 Yɛ n seli kɛ: “Ee! Min Min Zoova, wɔ mɔ a Sie Like Kwlakwla’n, ń srɛ́ wɔ, w’a yo kpa sɔ!+ ?Ɔ́ yó sɛ naan Zakɔbu w’a fite nun?* Afin ɔ ti fakafaka dan.”+
6 I sɔ’n ti’n, Zoova w’a diman ajalɛ ng’ɔ fali’n su kun.*+ Miɛn Zoova m’ɔ Sie Like Kwlakwla’n seli kɛ: “I sɔ sa’n su juman wie.”
7 Like ng’ɔ fa kleli min’n yɛ: Zoova jin nglo talɛ kun su. Ɲanman nga sunmun o i nuan’n yɛ be fa kplannin talɛ sɔ’n niɔn. Kpɛkun ɲanman nga sunmun o i nuan’n kun o i sa nun.
8 Yɛ Zoova seli min kɛ: “?Amɔsu, ngue yɛ a wun i-ɔ?” Yɛ n tɛli i su kɛ: “Ɲanman kun mɔ sunmun o i nuan’n niɔn.” Zoova seli ekun kɛ: “N su wa fa ɲanman nga sunmun o i nuan’n ń wlá Izraɛli m’ɔ ti min nvle’n nun. N su yaci cɛman be kun.+
9 Izaaki i lika nglonglo’m+ bé núnnún, yɛ Izraɛli i amuin sɔwlɛ’m bé núnnún sekeseke.+ Yɛ ń fá tokofi naan ń tó Zeroboamun i awlofuɛ’m be lɔ.”+
10 Amazia m’ɔ ti Ɲanmiɛn ɲrun jranfuɛ Betɛli+ lɔ’n, ɔ toli Famiɛn Zeroboamun+ m’ɔ sie Izraɛli nvle’n i ngaliɛ. Ɔ seli i kɛ: “Amɔsu su cici ɔ wun ndɛ Izraɛli nvle’n nun.+ Ndɛ kwlaa ng’ɔ kan be’n, nvle’n nunfuɛ’m be kwlá suanman be bo kun.+
11 Afin ndɛ nga Amɔsu kan’n yɛ: ‘Bé fá tokofi kún Zeroboamun, kpɛkun bé trá Izraɛlifuɛ mun bé kɔ́ nvle uflɛ nun.’”+
12 Yɛ Amazia seli Amɔsu kɛ: “Wɔ mɔ a wun aolia nun sa mun’n, kɔ, wanndi kɔ Zida nvle’n nun lɔ, ko kunndɛ kpanwun lɔ di, ko ijɔ Ɲanmiɛn nuan lɔ.+
13 Sanngɛ nán ijɔ Ɲanmiɛn nuan Betɛli+ wa kun. Afin famiɛn kun i amuin sɔwlɛ-ɔ,+ ɔ ti famiɛn diwlɛ kun i sua.”
14 Yɛ Amɔsu tɛli Amazia su kɛ: “N timan Ɲanmiɛn nuan ijɔfuɛ. Nán Ɲanmiɛn nuan ijɔfuɛ kusu i wa yɛle min. Sanngɛ n ti nnɛn kankanfuɛ,+ yɛ sikomɔɔ figie fie’n nun junman yɛ n di-ɔ.*
15 Sanngɛ Zoova ko fali min bua’m be sin lɔ. Kpɛkun Zoova seli min kɛ: ‘Kɔ naan ko kan min nuan ndɛ’n kle Izraɛli m’ɔ ti min nvle’n.’+
16 I sɔ’n ti’n, tie ndɛ nga Zoova kan’n. Ɔ seli kɛ: ‘Ɔ waan: “Nán kan kɛ ɲrɛnnɛn tɔ́ Izraɛlifuɛ’m be su.+ Nán bo jasin+ tɛ kle Izaaki i osu’n nunfuɛ mun.”
17 I sɔ’n ti’n, ndɛ nga Zoova kan’n yɛ: “Ɔ yi’n káci tekle bla klɔ’n nun. Yɛ bé fá tokofi bé kún ɔ mma yasua mun nin ɔ mma bla mun. Bé fá ɲanman bé súnnzun ɔ nvle’n, kpɛkun bé cɛ́cɛ́ nun bé fá. Ɔ bɔbɔ’n, á wú nvle kun m’ɔ ti fiɛn’n nun. Yɛ bé trá Izraɛlifuɛ mun bé kɔ́ nvle uflɛ nun.”’”+
Ja ngua lɔ ndɛ mun
^ Yɛle kɛ, Zanvie nin Fevrie nun.
^ Ebr., “w’a jaso.”
^ Annzɛ “ɔ yoli i nsisɔ.”
^ Ebr., “w’a jaso.”
^ Annzɛ “ɔ yoli i nsisɔ.”
^ Annzɛ “n fitifiti sikomɔɔ figie mma mun.”