Amɔsu 9:1-15
9 N wunnin Zoova,+ ɔ jin tɛ yiwlɛ’n su lɛ. Yɛ ɔ seli kɛ: “Fin sua ja mlomlo’m be ti lika’n i like, kpɛkun be bo lika’n kéje. Kpɛ be ti lika mun, kpɛkun ń fá tokofi ń kún be nga be kali lɛ’n. Be nga bé wánndi’n be su juman mmua, yɛ be nga be waan bé fló min sa nun’n, be nun kun sa su fiteman nun.+
2 Sɛ be fu kunman be jra Ndia’n* nun lɔ’n,ń fá min sa ń kó trá be lɔ.Yɛ sɛ be fu ɲanmiɛn su lɔ’n,ń kó fá be lɔ ń jrá.
3 Yɛ sɛ be ko fia Kaamɛli’n i ti su nglo lɔ’n,ń kó kúnndɛ be lɔ lele ń trá be.+
Sɛ be fia min ɲrun jenvie’n i bunman’n nun’n,ń sé wuo’n kɛ ɔ ko ka be.
4 Sɛ be tra be lomuɛn be kɔ be kpɔfuɛ’m be nvle’n nun’n,ń sé tokofi’n naan ɔ ko kun be lɔ.+Nianlɛ nga ń fá min ɲinma ń nían be’n, nán be ye yolɛ ti-ɔ, sanngɛ be tɛ yolɛ ti-ɔ.+
5 Afin Miɛn m’ɔ Sie Like Kwlakwla’n, Zoova m’ɔ ti sonja’m be su kpɛn’n i bɔbɔ kán nvle’n,*naan ɔ klo,+ kpɛkun i nunfuɛ’m be kwlaa bé sún.+Yɛ nvle wunmuan’n mɛ́n i wun su kɛ Nili’n sa,kpɛkun ɔ́ tɛ́ i wun ase kɛ Ezipti lɔ Nili’n sa.+
6 ‘Sran ng’ɔ kplɛn i asikalie’n ɲanmiɛn su lɔ’n,m’ɔ kplɛnnin i sua’n asiɛ’n i ti su nglo’n,sran ng’ɔ flɛflɛ jenvie’n nun nzue mun,naan ɔ́ útu be asiɛ’n su’n,+i dunman’n yɛle Zoova.’+
7 ‘?Izraɛlifuɛ mun, amun timan kɛ Kisifuɛ’m be mma mun sa min ɲrun?
?M’an ko faman amun Ezipti lɔ m’an fiteman?+
?M’an ko faman Filistifuɛ mun Klɛti*+ lɔ? ?Yɛ m’an ko faman Sirifuɛ mun Kii+ lɔ?’ Zoova yɛ ɔ kan sɔ-ɔ.
8 ‘Amun sie amun su! Miɛn Zoova m’ɔ Sie Like Kwlakwla’n i ɲin ta famiɛn diwlɛ ng’ɔ yo sa tɛtɛ mun’n,yɛ ɔ́ núnnún i sekeseke asiɛ’n su.+
Sanngɛ Zakɔbu i osu’n nunfuɛ’m be liɛ’n, n su nunnunman be sekeseke.’+ Zoova yɛ ɔ kan sɔ-ɔ.
9 ‘Afin min bɔbɔ m’an kan,yɛ ń kéjekéje Izraɛlifuɛ mun nvle’m be kwlaa be nun,+kɛ sran kun kejekeje kpukpusu’n,mɔ yɔbuɛ ba kun sa tɔman asiɛ wun’n sa.
10 Sa tɛtɛ yofuɛ’m be kwlaa nga be o min nvle’n nun’n,mɔ be se kɛ: “Ɲrɛnnɛn’n su mantanman e wa naan se kɛ ɔ́ tɔ́ e su’n,” tokofi yɛ bé fá kún be-ɔ.’
11 ‘Cɛn sɔ’n nun’n, ń mán Davidi+ i kpata* ng’ɔ bu guali’n su,ń tánnintánnin i* toklo mun,yɛ ń síesíe i lika nga be sacili’n be ye.Ń kplɛ́n i uflɛ kɛ lalafuɛ nun liɛ’n sa.+
12 I liɛ’n, bé wá fá Edɔmun i osu ng’ɔ ka’n,+ɔ nin nvlenvle kwlaa be nunfuɛ nga be fali min dunman flɛli be’n, bé yó be liɛ.’ Zoova m’ɔ su yo i sɔ like’n, yɛ ɔ kan sɔ-ɔ.
13 ‘Amun sie amun su! Cɛn kun wá jú’n,kacɛ tufuɛ’n tó sran ng’ɔ kpɛ fie su ninnge nga b’a blo’n,yɛ sran ng’ɔ tiatia viɲin mma’m be su’n, ɔ́ tó sran ng’ɔ lua like’n.+Yɛ duvɛn fɛfɛ’n fín oka’m be su ɔ́ sónji sa puu,+yɛ ɔ́ sónji kpɔlɛ’m be kwlaa be su.’*+ Zoova yɛ ɔ kan sɔ-ɔ.
14 ‘Izraɛli m’ɔ ti min nvle’n i nun sran mɔ be trali be ɔli’n, ń kó fá be ń bá,+yɛ bé kplán klɔ nga be bubuli’n be uflɛ, kpɛkun bé trán be su.+Bé dí viɲin fie mun, kpɛkun bé nɔ́n duvɛn,+yɛ bé tá waka mun, kpɛkun bé dí be su mma mun.’+
15 ‘Ń tá be kɛ waka wie sa be nvle’n nun,yɛ sran fi su tuman be boasiɛ nga n fa mannin be’n i su kun.’+ Zoova m’ɔ ti ɔ Ɲanmiɛn’n yɛ ɔ kan sɔ-ɔ.”
Ja ngua lɔ ndɛ mun
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Annzɛ “asiɛ’n.”
^ Ebr., “Kaftɔɔ.”
^ Annzɛ “tannin sua’n.”
^ Annzɛ “be.”
^ Annzɛ “kpɔlɛ’m be kwlaa bé kló.”
