Daniɛli 1:1-21
1 Kɛ Zozakimun yoli Zida famiɛn’n+ i afuɛ nsan su’n, Nebikadnezaa m’ɔ ti Babilɔnin famiɛn’n ɔ wa boli Zerizalɛmun klɔ’n i wun nanmue naan ɔ́ útu i.+
2 I sin’n, Zoova fali Zozakimun m’ɔ ti Zida famiɛn’n, ɔ nin Ɲanmiɛn Kpli i sua’n nun lɔ ninnge’m be nun wie mun wlali Babilɔnin famiɛn’n i sa nun.+ Yɛ ɔ suali be ɔli Sinea lɔ,*+ i amuin sua’n nun lɔ. Ɔ fali ninnge sɔ mun sieli i kan be sie i amuin’n i ninnge kpakpa’m be lɔ’n.+
3 I sin’n, famiɛn’n seli Aspenazi m’ɔ ti i awlo lɔ junman difuɛ’m be su kpɛn’n kɛ ɔ fa Izraɛlifuɛ wie mun bla. I waan maan be nga be fin famiɛn’n i osu’n nun’n, nin be nga be osu’n nun be ti wlengbi’n,+ be tran be nun wie.
4 Ɔ fata kɛ i sɔfuɛ’m be yo gbanflɛn* mɔ lɛ fi nunman be wun’n, mɔ be ti klanman’n, mɔ be si ngwlɛlɛ’n, mɔ be si sa yɛ be wun sa wlɛ’n,+ mɔ be kwla di junman famiɛn’n i awlo’n nun’n. I waan ɔ kle be Kaldefuɛ’m be aniɛn’n i klɛlɛ nin i kanlɛ.
5 Asa ekun’n, famiɛn’n waan aliɛ ba kwlaa nun’n, be man be aliɛ kpakpa ng’ɔ di’n nin duvɛn ng’ɔ nɔn’n wie. Bé klé be like* afuɛ nsan. Yɛ kɛ blɛ sɔ’n ko sin’n, bé dí junman mán famiɛn’n.
6 Daniɛli*+ nin Anania* nin Misaɛli* ɔ nin Azaria*+ mɔ be fin Zida akpasua’n nun’n, be o be nun wie.
7 Famiɛn’n i awlo lɔ junman difuɛ’m be su kpɛn’n tɔnnin be dunman uflɛ.* Daniɛli dunman liɛ’n yɛle Bɛltesazaa.+ Anania liɛ’n yɛle Sadraki. Misaɛli liɛ’n yɛle Mesaki. Yɛ Azaria liɛ’n yɛle Abɛdnego.+
8 Sanngɛ Daniɛli fuali i klun lɔ kɛ ɔ su diman famiɛn’n i aliɛ kpakpa mun yɛ ɔ su nɔnman famiɛn’n i duvɛn’n naan w’a yo fiɛn. Ɔ maan ɔ seli famiɛn’n i awlo lɔ junman difuɛ’m be su kpɛn’n kɛ ɔ mɛn i atin naan w’a diman aliɛ sɔ mun naan w’a yo fiɛn.
9 Yɛ Ɲanmiɛn Kpli yoli maan famiɛn’n i awlo lɔ junman difuɛ’m be su kpɛn’n sili Daniɛli i aunnvɔɛ yɛ ɔ yoli i ye.+
10 Sanngɛ famiɛn’n i awlo lɔ junman difuɛ’m be su kpɛn’n seli Daniɛli kɛ: “N sro famiɛn’n m’ɔ ti min min’n. I yɛ ɔ kleli aliɛ ng’ɔ fata kɛ amun di’n nin nzan ng’ɔ fata kɛ amun nɔn’n niɔn. Sɛ ɔ wun kɛ amun ɲrun’n timan mlanmlan kɛ gbanflɛn onga nga amun nin be ti tukpɛ’n be liɛ’n sa’n, amun dunman nun ti’n, famiɛn’n bú min* fɔ.”
11 Sanngɛ Daniɛli seli gladi difuɛ nga famiɛn’n i awlo lɔ junman difuɛ’m be su kpɛn’n fɛ i sieli i Daniɛli bɔbɔ nin Anania nin Misaɛli ɔ nin Azaria be su’n naan ɔ nian be lika’n kɛ:
12 “Yaci, sa ɔ sufuɛ mun cɛn ba blu naan nian. Aliɛ nga bé fá mán e kɛ e di’n, nán maan nnɛn tran nun,* yɛ maan be man e nzue ngbɛn naan e nɔn.
13 Kpɛkun nian wafa nga e ti’n, yɛ nian wafa nga gbanflɛn* nga be di famiɛn’n i ninnge kpakpa mun’n be ti’n. I sin’n, nian like nga a wun i’n su yo nga ɔ waan á fá yó e’n.”
14 Bian’n kplinnin ndɛ nga be kannin’n su. Kpɛkun ɔ fali cɛn ba blu sali be niannin.
15 Kɛ cɛn ba blu sinnin’n, be ɲrun’n ti mlanmlan yɛ be ti juejue* tra gbanflɛn* kwlaa nga be dili famiɛn’n i ninnge kpakpa mun’n.
16 I sɔ’n ti’n, gladi difuɛ’n fa aliɛ kpakpa nin duvɛn nga be fa man be’n. Kpɛkun aliɛ nga nnɛn nunman nun’n yɛ ɔ fa man be-ɔ.*
17 Ɲanmiɛn Kpli maan gbanflɛn nnan sɔ mun be sili ndɛ’m be klɛlɛ’n i wafawafa kwlaa,* be yoli nun akunndanfuɛ kpɛkun ɔ mannin be ngwlɛlɛ. Yɛ ɔ yoli maan Daniɛli wunnin aolia nun sa mun nin laliɛ’m be kwlaa be bo.+
18 Kɛ blɛ nga famiɛn Nebikadnezaa kleli kɛ sɛ ɔ ju-ɔ be fa be ko kle i’n ɔ juli’n,+ famiɛn’n i awlo lɔ junman difuɛ’m be su kpɛn’n fa be ɔli i ɲrun lɔ.
19 Kɛ famiɛn’n nin be ijɔli’n, ɔ wunnin kɛ be kwlaa nga be o lɛ’n be nun wie fi toman Daniɛli nin Anania nin Misaɛli, ɔ nin Azaria.+ I sɔ’n ti’n, be wa dili junman famiɛn’n i sa nun.
20 Ndɛ kwlaa nga famiɛn’n usa m’ɔ fata kɛ be fa akunndan nin ngwlɛlɛ be tɛ su’n, ɔ wunnin kɛ be si ngwlɛlɛ tra atrɛ yifuɛ nin wunnzue yifuɛ kwlaa+ nga be o i famiɛn diwlɛ wunmuan’n nun’n kpɛ blu.
21 Daniɛli kali lɛ lele fa juli Sirisi+ i famiɛn dilɛ’n i afuɛ klikli’n nun.
Ja ngua lɔ ndɛ mun
^ Yɛle kɛ, Babilɔnin.
^ Ebr., “ba kanngan.”
^ Be kwla se ekun kɛ “Bé tá be.”
^ I bo’n yɛ: “Zoova Ukali.”
^ I bo’n yɛ: “?Wan yɛ ɔ ti kɛ Ɲanmiɛn sa-ɔ?”
^ I bo’n yɛ: “Zoova Sili Aunnvɔɛ.”
^ I bo’n yɛ: “Ɲanmiɛn yɛ ɔ ti min Jɔlɛ Difuɛ-ɔ.”
^ Yɛle kɛ, ɔ fali Babilɔnin lɔ dunman tɔnnin be.
^ Ebr., “min ti sɛ’n.”
^ Yɛle kɛ, be man be ninnge kɛ alowa, nin kɔnkɔnbru nin lantii sa naan be di.
^ Ebr., “ba kanngan.”
^ Ebr., “be wunnɛn o be wun.”
^ Ebr., “ba kanngan.”
^ Yɛle kɛ, ɔ man be ninnge kɛ alowa, nin kɔnkɔnbru, nin lantii sa naan be di.
^ Annzɛ “wafawafa kwlaa nga be klɛ ndɛ mun’n.”
