Daniɛli 10:1-21
10 Kɛ Sirisi+ yoli Pɛɛsi famiɛn’n i afuɛ nsan su’n, Ɲanmiɛn yili sa kun nglo kleli Daniɛli mɔ be flɛ i kɛ Bɛltesazaa’n.+ Ndɛ’n ti nanwlɛ, alɛ dan kpa kun i su ndɛ-ɔ. Ɔ wunnin ndɛ’n i wlɛ, yɛ be tuli sa ng’ɔ wunnin i’n i bo kleli i.
2 Blɛ sɔ’n nun’n, nn min bɔbɔ Daniɛli n wo awlabɔɛ nun+ w’a di lemɔcuɛ klonglo nsan.
3 M’an diman aliɛ kpa sa. Yɛ nnɛn nin duvɛn wie fi w’a kanman min nuan. M’an kpakpaman ngo lele lemɔcuɛ klonglo nsan.
4 Anglo klikli’n i cɛn ba ablaɔn-nin-nnan (24) su’n, mɔ n wo nzue dan nga be flɛ i Tigli’n*+ i nuan lɛ’n,
5 kɛ n mannin min ɲin su’n, n wunnin sran kun. Lɛn tralɛ wlɛ i wun,+ yɛ cisu kun mɔ sika ɔkwlɛ ng’ɔ fin Ufazi’n yɛ be fa yoli’n, ɔ ci i bo.
6 I wunnɛn’n ti kɛ klizoliti sa.+ I ɲrun’n bo mianmian kɛ ɲanmiɛn m’ɔ su kpa sin piapia’n sa. I ɲinma’m be ti kɛ tɛ mɔ b’a sɔ be nuan’n sa. I sa nin i ja’m be ti kɛ aaba mɔ be yoli i wun treketreke’n sa.+ Yɛ i nɛn’n tɛ kɛ sran kpanngban be nɛn’n sa.
7 Min Daniɛli, min kunngba yɛ n wunnin aolia nun like sɔ’n niɔn. Be nga be nin min o lɛ’n, b’a wunmɛn i wie.+ Sanngɛ be usuli sa tututu, kpɛkun be wanndi ko fiali.
8 N kunngba yɛ n kali lɛ-ɔ. Kɛ n wunnin aolia nun like sroesroe sɔ’n, min wunmiɛn’n wieli min nun. N kpali sa fuaii, kpɛkun m’an ɲanman wunmiɛn kun.+
9 Yɛ n tili i nɛn’n. Sanngɛ kɛ ɔ́ íjɔ mɔ n tili i nɛn’n, n lafili kpa sa pɔɔ. Kɛ ɔ́ yó sɔ’n, nn min ɲin utu ase.+
10 Kpɛkun sran sa kun kannin min.+ Ɔ tinngeli min, kpɛkun n fuafuali min sa ase, yɛ n kotoli.
11 Yɛ ɔ seli min kɛ:
“Daniɛli, wɔ mɔ a ti sran kpa dan’n,*+ fa ɔ ɲin sie i ndɛ nga ń má kán klé wɔ’n su kpa. Siɛn’n, jaso jran nglo, afin be sunmannin min ɔ sin.”
Kɛ ɔ kɛnnin i sɔ’n, yɛ n jaso n jrannin nglo-ɔ, n usuman aɔwi.
12 Yɛ ɔ seli min kɛ: “Daniɛli, nán srɛ kun wɔ.+ Kɛ ɔ fɛ i cɛn klikli nga a kunndɛli kpa kɛ á wún sa sɔ’n i wlɛ’n, mɔ a kannin ɔ wun ase ɔ Ɲanmiɛn’n i ɲrun’n, be tili ɔ ndɛ’n. I sɔ’n ti yɛ n ba-ɔ.+
13 Sanngɛ Pɛɛsi famiɛn diwlɛ’n i su kpɛn’n+ tanndannin min ɲrun lele cɛn ba ablaɔn-nin-kun (21). Sanngɛ kusu Misɛli*+ m’ɔ ti kpɛnngbɛn nga be le ɲrun kpa’n be nun kun’n, ɔ wa ukali min. Kpɛkun n kali Pɛɛsi famiɛn’m be wun lɛ.
14 N bali naan ń má yíyí sa ng’ɔ́ wá jú ɔ nvle’n nunfuɛ’m be su mɛn’n i awieliɛ blɛ’n nun’n i nun ń klé wɔ.+ Afin sa nga a wunnin i aolia nun’n, ɔ́ wá kpɛ́n su e ɲrun lɔ.”+
15 Kɛ ɔ kannin ndɛ sɔ’n kleli min’n, n utuli min ɲin ase, yɛ m’an kwlá ijɔman kun.
16 Kpɛkun like kun m’ɔ ti kɛ klɔ sran sa’n kannin min nuan bui’n.+ N ukeli min nuan’n, kpɛkun n seli sran ng’ɔ jin min ɲrun lɛ’n kɛ: “Min min, like nga n wunnin i aolia nun’n ti’n, n usu tututu, yɛ n leman wunmiɛn kun.+
17 ?Wɔ mɔ a ti min min’n, ń yó sɛ naan e nin wɔ y’a ijɔ?+ Afin n leman wunmiɛn kun. Yɛ n ijɔ-ɔ, ɔ yoman ye.”+
18 Yɛ like ng’ɔ ti kɛ klɔ sran sa’n kannin min ekun-ɔn. Kpɛkun ɔ wlali min fanngan.+
19 Yɛ ɔ seli min kɛ: “Wɔ mɔ a ti sran kpa dan’n,*+ nán srɛ kun wɔ.+ Maan ɔ wun jɔ ɔ fɔuun.+ Jran kekle. Nanwlɛ, jran kekle.” Kɛ ɔ́ kán ndɛ klé min’n, n ɲannin wunmiɛn, yɛ n seli kɛ: “Min min, ijɔ, afin w’a wla min fanngan.”
20 Kpɛkun ɔ seli min kɛ: “?A si sa nga ti yɛ n bali ɔ wun wunlɛ’n? Ń má sá min sin naan e nin Pɛɛsi mɛn’n i su kpɛn’n+ é kó kún. Kɛ n ko jaso wa’n, Glɛki mɛn’n i su kpɛn’n wá bá.
21 Sanngɛ ń má bó sa nga be klɛli be nanwlɛ fluwa’n nun’n be su ń klé wɔ. Sɛ w’a yoman kɛ Misɛli+ m’ɔ ti amun su kpɛn’n+ sa’n, sran fi suanman min bo ninnge sɔ’m be nun.
Ja ngua lɔ ndɛ mun
^ Ebr., “Idekɛli’n.”
^ Annzɛ “sran mɔ be ɲin yi i dan’n.”
^ I bo’n yɛ: “?Wan yɛ ɔ ti kɛ Ɲanmiɛn sa-ɔ?”
^ Annzɛ “Sran mɔ be ɲin yi i dan’n.”
