Daniɛli 3:1-30
-
Famiɛn Nebikadnezaa fali sika ɔkwlɛ yoli like kun (1-7)
-
I waan be sɔ like ng’ɔ takali’n (4-6)
-
-
Be waan Ebre gbanflɛn nsan be ɲin yiman famiɛn’n (8-18)
-
“E su suman ɔ ɲanmiɛn liɛ mun” (18)
-
-
Be to be yili i fuu mɔ i nun sin’n jueman aɔwi’n nun (19-23)
-
Be o sin’n nun sanngɛ be yraman (24-27)
-
Famiɛn’n manmannin Ebre’m be Ɲanmiɛn’n (28-30)
3 Famiɛn Nebikadnezaa yoli sika ɔkwlɛ sran kun. I tɛnndɛn nun’n ti kude ablesiɛn (60)* yɛ i tɛtrɛ nun’n ti kude nsiɛn.* Ɔ tɛkɛli i Dura lɔ lika kpɛtɛkplɛɛ’n nun, Babilɔnin akpasua’n su lɔ.
2 Kpɛkun Famiɛn Nebikadnezaa sunmannin sran naan be ko yiɛ i mantanfuɛ mun, nin prefe mun, nin siefuɛ mun, nin afɔtuɛ manfuɛ mun, nin ninnge kpakpa’m be su nianfuɛ mun, nin jɔlɛ difuɛ mun, nin jɔlɛ difuɛ’m be mantanfuɛ mun, ɔ nin akpasua’m be kwlaa be siefuɛ mun naan be bla be wa yi sika ɔkwlɛ sran nga Famiɛn Nebikadnezaa takali’n i nglo.
3 Ɔ maan i mantanfuɛ mun, nin prefe mun, nin siefuɛ mun, nin afɔtuɛ manfuɛ mun, nin ninnge kpakpa’m be su nianfuɛ mun, nin jɔlɛ difuɛ mun, nin jɔlɛ difuɛ’m be mantanfuɛ mun, ɔ nin akpasua’m be kwlaa be siefuɛ’m be bali naan bé wá yí sika ɔkwlɛ sran nga Famiɛn Nebikadnezaa takali’n i nglo. Be wa jranjrannin sika ɔkwlɛ sran sɔ mɔ Nebikadnezaa takali’n i ɲrun lɛ.
4 Ndolo bofuɛ’n kpannin kekle kpa. Ɔ seli kɛ: “Nvlefuɛ mun nin mɛnmɛn’m be nunfuɛ mun ɔ nin amun kwlaa mɔ amun kan aniɛn wafawafa’n, famiɛn’n waan yoo:
5 Kɛ amun ko ti awɛ’n, nin blo’n, nin sitaa’n, nin jru’n, nin miziki bolɛ like ng’ɔ le ɲanman’n, nin kɔɔnemizi’n, nin miziki bolɛ ninnge onga’m be kwlaa be tɛlɛ’n, amun koto naan amun sɔ sika ɔkwlɛ sran nga Famiɛn Nebikadnezaa takali’n.
6 Sran kwlaa nga w’a kotoman naan w’a sɔmɛn i’n, bé ká lɛ bé trɛ́ i bé yí i fuu mɔ i nun sin’n jueman aɔwi’n nun.”+
7 I sɔ’n ti’n, kɛ sran’m be kwlakwla be tili awɛ’n, nin blo’n, nin sitaa’n, nin jru’n, nin miziki bolɛ like ng’ɔ le ɲanman’n, nin miziki bolɛ ninnge onga’m be kwlaa be tɛlɛ’n, nvlefuɛ’m be kwlakwla nin mɛnmɛn’m be nunfuɛ mun, nin sran mɔ be kan aniɛn wafawafa’n be kotoli, kpɛkun be sɔli sika ɔkwlɛ sran nga famiɛn Nebikadnezaa takali’n.
8 Kɛ ɔ yoli sɔ’n, Kaldefuɛ wie mun be bali be wa sanmannin Zifu mun.*
9 Be seli Famiɛn Nebikadnezaa kɛ: “Nannan, maan wie’n wla fi wɔ.
10 Nannan, ɔ bɔbɔ a seli kɛ sran kwlaa ng’ɔ ti awɛ’n, nin blo’n, nin sitaa’n, nin jru’n, nin miziki bolɛ like ng’ɔ le ɲanman’n, nin kɔɔnemizi’n, nin miziki bolɛ ninnge onga’m be kwlaa be tɛlɛ’n, maan ɔ koto naan ɔ sɔ sika ɔkwlɛ sran’n,
11 naan sran kwlaa nga w’a kotoman w’a sɔmɛn i’n, bé ká lɛ bé trɛ́ i bé yí i fuu mɔ i nun sin’n jueman aɔwi’n nun.+
12 A sieli Zifu wie’m be kɛ be nian Babilɔnin akpasua’n su. Be yɛle Sadraki nin Mesaki nin Abɛdnego.+ Nannan, sran sɔ’m be buman ɔ wie, be suman ɔ ɲanmiɛn mun. Yɛ be waan be sɔman sika ɔkwlɛ sran nga a takali’n.”
13 Nebikadnezaa fali ya dan kpa. Ɔ seli kɛ be fa Sadraki nin Mesaki nin Abɛdnego be bla. Yɛ be fa be ɔli famiɛn’n i ɲrun lɔ-ɔ.
14 Nebikadnezaa usali be kɛ: “?Sadraki nin Mesaki nin Abɛdnego, sakpasakpa naan amun suman min ɲanmiɛn mun,+ yɛ amun waan amun sɔman sika ɔkwlɛ sran nga n takali’n?
15 Siɛn’n, kɛ amun ko ti awɛ’n, nin blo’n, nin sitaa’n, nin jru’n, nin miziki bolɛ like ng’ɔ le ɲanman’n, nin kɔɔnemizi’n, nin miziki bolɛ ninnge onga’m be kwlaa be tɛlɛ’n, sɛ amun koto naan amun sɔ sika ɔkwlɛ sran nga n yoli’n, ɔ ti kpa. Sanngɛ sɛ amun waan amun sɔmɛn i’n, bé ká lɛ bé trá amun gúa fuu mɔ i nun sin’n jueman aɔwi’n nun. ?Yɛ ɲanmiɛn onin yɛ ɔ kwla de amun min sa nun-ɔn?”+
16 Sadraki nin Mesaki ɔ nin Abɛdnego be seli famiɛn’n kɛ: “Nannan Nebikadnezaa, ndɛ nga liɛ’n, e su kɛnmɛn i lele.
17 Nannan, sɛ be yo e sɔ bɔbɔ’n, e Ɲanmiɛn nga e su i’n kwla de e fuu mɔ i nun sin’n jueman aɔwi’n nun. Kpɛkun ɔ kwla de e ɔ sa nun.+
18 Nannan, ɔ fata kɛ a si kɛ, sɛ w’a deman e bɔbɔ’n, e su suman ɔ ɲanmiɛn liɛ mun. Yɛ e su sɔman sika ɔkwlɛ sran nga a takali’n.”+
19 Kɛ ɔ yoli sɔ’n, Nebikadnezaa fali Sadraki nin Mesaki ɔ nin Abɛdnego be wun ya dan kpa. I ɲrun’n ka lɛ kacili* kpɛkun ɔ seli kɛ maan be trɔ fuu’n i nun sin’n i kpa naan i nun lo fiaan tra titi liɛ’n kpɛ nso.
20 Ɔ seli i sonja wie mɔ be le wunmiɛn kpa’n kɛ be ci Sadraki nin Mesaki ɔ nin Abɛdnego naan be to be gua fuu mɔ i nun sin’n jueman aɔwi’n nun.
21 Ɔ maan be cicili be. Kɛ ɔ́ yó sɔ’n, nn be tralɛ tɛnndɛn ng’ɔ leman sa’n, nin be tralɛ mun nin be kle mun nin ninnge kwlaa nga be wlali’n wo be wun. Kpɛkun be to be guali fuu mɔ i nun sin’n jueman aɔwi’n nun.
22 Kɛ mɔ mmla nga famiɛn’n mannin’n ti kekle dan’n, mɔ kusu fuu’n lo dan’n ti’n, be nga be trali Sadraki nin Mesaki ɔ nin Abɛdnego guali i fuu’n nun’n, sin taaman’n kunnin be.
23 Sanngɛ sran nsan sɔ’m be liɛ’n, yɛle kɛ Sadraki nin Mesaki ɔ nin Abɛdnego, be tɔli fuu mɔ i nun sin’n jueman aɔwi’n nun. Kɛ ɔ́ yó sɔ’n, nn ɲanman’n te cici be wun.
24 Kɛ ɔ yoli sɔ’n, srɛ kunnin Famiɛn Nebikadnezaa. Kpɛkun ɔ jasoli waka, yɛ ɔ seli i sran dandan’m be kɛ: “Nán sran nsan yɛ e cili be yɛ e to be guali sin nun-ɔn?” Be tɛli famiɛn’n su kɛ: “Ɛɛn nannan, i-ɔ.”
25 Ɔ seli kɛ: “An nian! N wun kɛ sran nnan be su wlanwlan sin’n i afiɛn lɔ, like fi yoman be, yɛ sran nnan su’n fa aolia nun sran.”
26 Nebikadnezaa wunngeli fuu mɔ i nun sin’n jueman aɔwi’n i anuan’n i wun lɔ, kpɛkun ɔ seli kɛ: “Sadraki nin Mesaki ɔ nin Abɛdnego, amun mɔ amun su Ɲanmiɛn m’ɔ o Like Kwlaa Ti Su’n,+ amun fite be bla!” Yɛ Sadraki nin Mesaki ɔ nin Abɛdnego be fin sin’n nun lɔ be fiteli-ɔ.
27 Famiɛn’n i mantanfuɛ mun, nin prefe mun, nin siefuɛ mun, nin famiɛn’n i sran dandan nga be o lɛ’n,+ be wunnin kɛ sin’n w’a yoman sran sɔ’m be like fi.+ Be ti ndrɛ ba kun sa bɔbɔ w’a yraman. Be tralɛ’m b’a yraman. I kpa bɔbɔ’n, sin bɔnman be wun kaan sa.
28 Yɛ Nebikadnezaa seli kɛ: “Maan be manman Sadraki nin Mesaki ɔ nin Abɛdnego be Ɲanmiɛn’n.+ I yɛ ɔ sunmɛnnin i anzi’n naan ɔ wa de i sufuɛ mun-ɔn. Be fali be wla guɛli i su, kpɛkun b’a nantiman min mɔ n ti famiɛn’n min mmla’n su. Be fali be nguan’n sieli i wie nuan bɔbɔ, afin be waan be suman ɲanmiɛn uflɛ wie fi naan be bɔbɔ be Ɲanmiɛn’n yɛ bé sú i-ɔ.+
29 I sɔ’n ti’n, min waan sran ng’ɔ kan Sadraki nin Mesaki ɔ nin Abɛdnego be Ɲanmiɛn’n i wun ndɛ tɛ’n, sɛ nvle ng’ɔ fin nun’n ti sɛ ti sɛ-o, sɛ mɛn ng’ɔ fin nun’n ti sɛ ti sɛ-o, annzɛ kusu aniɛn ng’ɔ kan’n ti sɛ ti sɛ-o, bé kpɛ́kpɛ́ i nun kpokpokpo yɛ bé fɛ́ i sua’n bé káci atin nun kɔwlɛ.* Afin ɲanmiɛn uflɛ fi kwlá deman sran kɛ Ɲanmiɛn sɔ’n sa.”+
30 I sin’n, famiɛn’n mannin Sadraki nin Mesaki ɔ nin Abɛdnego be sasu Babilɔnin akpasua’n su lɔ.+
Ja ngua lɔ ndɛ mun
^ Annzɛ “tɔnnin Zifu’m be suɛn.”
^ Annzɛ “Wafa ng’ɔ nin be tran’n ka lɛ kacili.”
^ Be kwla se ekun kɛ “ofuɛ”, “wla guawlɛ.”
