Daniɛli 5:1-31
5 Famiɛn Bɛlsazaa+ yiɛli i sran dandan’m be nun akpi kun (1.000) naan ɔ nin be dí cɛn, kpɛkun ɔ nɔnnin duvɛn be ɲrun lɛ.+
2 Kɛ duvɛn’n tili Bɛlsazaa’n, ɔ seli kɛ be ko fa sika ɔkwlɛ nin sika ninnge nga i si Nebikadnezaa ko fali be Ɲanmiɛn sua ng’ɔ o Zerizalɛmun lɔ’n nun be bla+ naan i bɔbɔ famiɛn’n nin i sran dandan mun, nin i yi mun, nin i bo bla onga’m be fa nɔn nzan.
3 Ɔ maan be ko fali sika ɔkwlɛ ninnge nga be fali be Ɲanmiɛn sua ng’ɔ o Zerizalɛmun lɔ’n nun be bali, kpɛkun famiɛn’n i sran dandan mun nin i yi mun nin i bo bla onga mun be nɔnnin be nun nzan.
4 Be nɔnnin duvɛn, kpɛkun be manmannin amuin mɔ sika ɔkwlɛ, nin sika, nin aaba, nin blalɛ, nin waka, nin yɔbuɛ yɛ be fa yoli be’n.
5 Bé nían-ɔn, sran kun i sa mma mun yɛ b’a fite yɛ. Be su klɛklɛ famiɛn’n i sua’n i talɛ nga be wasali’n, m’ɔ o kannin siewlɛ’n i ɲrun lɛ’n su. Famiɛn’n wunnin sran sa m’ɔ su klɛ like’n i sin’n.
6 Famiɛn’n ka lɛ kpali sa fuaii, i akunndan’n sanngannin, i bo lenge’n usuli sa tututu,+ kpɛkun i ja nannglunman’m be sisili be wiengu sa kpɛkpɛkpɛ.
7 Famiɛn’n kpannin kekle kpa naan be yia wunnzue yifuɛ mun, nin Kaldefuɛ mun,* ɔ nin be nga be kanngan nzraama mun’n.+ Famiɛn’n seli Babilɔnin lɔ ngwlɛlɛ sifuɛ’m be kɛ: “Amun nun sran ng’ɔ kanngan ndɛ ng’ɔ klɛ yɛ’n, m’ɔ tu i bo kle min’n, bé wlɛ́ i tralɛ ɔkwlɛ kankan, yɛ bé fá kɔmin ɲanman nga sika ɔkwlɛ yɛ be fa yoli’n bé wlɛ́ i.+ Kpɛkun siefuɛ nga be o min famiɛn diwlɛ’n nun’n, i yɛ ɔ́ yó be nsan su’n niɔn.”+
8 Famiɛn’n i sran nga be si ngwlɛlɛ kpa’n be kwlaa be bali. Sanngɛ be nun wie fi sa w’a kwlá kannganman ndɛ’n nun naan se kɛ ɔ́ tú i bo klé i.+
9 I sɔ’n ti’n, srɛ dan kpa kunnin Famiɛn Bɛlsazaa, i ɲrun’n kpali fuaii. I sran dandan’m be kusu be akunndan’n sanngannin.+
10 Kɛ famiɛn’n i nin’n* tili ndɛ nga famiɛn’n nin i sran dandan’m be kannin’n, ɔ wluli sua nga be su di cɛn nun’n i nun lɔ. Kpɛkun famiɛn’n i nin’n seli kɛ: “Nannan, maan wie’n wla fi wɔ. Nán maan ɔ akunndan’n sanngan, yɛ nán ɔ ɲrun’n kpa fuaii.
11 Ɔ famiɛn diwlɛ’n nun wa’n, sran kun o lɛ mɔ aolia nun sran’m be wawɛ’n wo i su-ɔ. Ɔ si i ɲin su’n, be wunnin kɛ ɔ si sa’m be bo naan ɔ ti akunndanfuɛ naan ɔ si ngwlɛlɛ kɛ aolia nun sran’m be sa.+ Famiɛn Nebikadnezaa m’ɔ ti ɔ si’n fɛ i sieli atrɛ yifuɛ mun, nin wunnzue yifuɛ mun, nin Kaldefuɛ mun* ɔ nin be nga be kanngan nzraama mun’n be su.+ Nannan, ɔ si bɔbɔ yɛ ɔ yoli sɔ-ɔ.
12 Afin Daniɛli mɔ famiɛn’n flɛli i Bɛltesazaa’n,+ i ngwlɛlɛ’n nin sa ng’ɔ si i’n nin i akunndan’n, be leman wunsu. Ɔ kwla tu laliɛ’m be bo. Ɔ kwla tu ɲanndra’m be bo. Ɔ kwla kpɛ ndɛ nga be ti kekle kpa’n be nun.+ I sɔ’n ti’n, sunman sran naan be ko flɛ Daniɛli naan ɔ wa tu ndɛ nga be klɛli’n i bo kle wɔ.”
13 Be ko fali Daniɛli ɔli famiɛn’n i ɲrun lɔ. Yɛ famiɛn’n usali Daniɛli kɛ: “?Daniɛli m’ɔ o be nga be ko fali be Zida lɔ bali’n+ be nun’n yɛle wɔ? ?Wɔ yɛ min si m’ɔ ti famiɛn’n ko fali wɔ Zida lɔ bali’n niɔn?+
14 N tili i kɛ aolia nun sran’m be wawɛ’n wo ɔ su,+ naan a si sa’m be bo, naan a ti akunndanfuɛ naan ɔ ngwlɛlɛ liɛ’n ɔ leman wunsu.+
15 Be fali sa sifuɛ mun nin wunnzue yifuɛ mun bali min ɲrun wa, naan be kanngan ndɛ nga be klɛli’n, naan be tu i bo kle min. Sanngɛ b’a kwlá tumɛn i bo.+
16 Sanngɛ kusu n tili i kɛ ɔ liɛ’n, a kwla tu ndɛ’m be bo,+ naan a kwla kpɛ ndɛ nga be ti kekle kpa bɔbɔ’n be nun. Sɛ a kanngan ndɛ sɔ mɔ be klɛli’n naan a tu i bo kle min’n, bé fá tralɛ ɔkwlɛ kankan bé wlá ɔ wun, kpɛkun kɔmin ɲanman nga sika ɔkwlɛ yɛ be fa yoli’n, bé fá wlá ɔ kɔmin. Yɛ siefuɛ nga be o min famiɛn diwlɛ’n nun’n, á yó be nsan su.”+
17 Daniɛli tɛli famiɛn’n su kɛ: “Maan ɔ ninnge’m be ka ɔ sa nun. Fa man sran uflɛ. Sanngɛ nannan, ń má kánngan ndɛ’n nun, kpɛkun ń tú i bo ń klé wɔ.
18 Nannan, Ɲanmiɛn m’ɔ o Like Kwlaa Ti Su’n ɔ fali famiɛn dilɛ’n wlali ɔ si Nebikadnezaa i sa nun. Kpɛkun ɔ yoli maan i dunman’n fuli. Be yili i ayɛ, kpɛkun ɔ ɲannin ɲrun.+
19 Sran dan mɔ Ɲanmiɛn maan ɔ kacili’n ti’n, sran wafa kwlakwla, nin nvle kwlakwla nunfuɛ mun, nin sran mɔ be kan aniɛn wafawafa kwlaa’n, kɛ be wun i sa’n be usu sa tututu.+ Afin sran kwlaa nga i waan ɔ́ kún i annzɛ ɔ́ yáci i lɛ’n, ɔ yo i sɔ. Yɛ sran nga i waan ɔ́ mɛ́n i kɔmin su annzɛ ɔ́ gúɛ i ɲin ase’n, ɔ yo i sɔ.+
20 Sanngɛ kɛ ɔ wa yoli i wun kpakpa’n, mɔ i ɲin su wa yoli kekle’n, mɔ ɔ wa dili i nuan’n,+ be tuli i famiɛn bia’n su, kpɛkun w’a ɲanman ɲrun kun.
21 Be kɛnnin i bo klɔ sran’m be nun, kpɛkun i awlɛn’n yoli kɛ nnɛn’m be liɛ’n sa. Ɔ nin blo aflunmun mun yɛ be ko trannin-ɔn. Ijre yɛ be fa mɛnnin i naan ɔ di i kɛ nannin wie sa-ɔ. Kpɛkun bɔlɛ mɔ fin nglo lɔ’n ɔ luɛli i pɔtɔɔ. Ɔ kali sɔ lele naan w’a wun i wlɛ kɛ Ɲanmiɛn m’ɔ o Like Kwlaa Ti Su’n yɛ ɔ sie klɔ sran’m be famiɛn diwlɛ’n niɔn, naan sran ng’ɔ klo kɛ ɔ́ fá mɛ́n i’n yɛ ɔ fa mɛn i-ɔ.+
22 “Sanngɛ wɔ Bɛlsazaa mɔ a ti i wa’n, w’a kanman ɔ wun ase, kusu nn a si i kwlaa sɔ’n.
23 Sanngɛ a yoli ɔ wun kpakpa Ɲanmiɛn m’ɔ o nglo lɔ’n i su.+ Kpɛkun a seli kɛ be ko fa ninnge nga be o i sua’n nun’n be bla.+ Yɛ a nin ɔ sran dandan mun nin ɔ yi mun nin ɔ bo bla onga’m be nɔnnin be nun duvɛn. Kpɛkun amun manmannin amuin mɔ be fali sika, nin sika ɔkwlɛ, nin aaba, nin blalɛ, nin waka, nin yɔbuɛ be yoli be’n, mɔ be wunman ase, be timan sa, yɛ be siman like fi’n.+ W’a manmanman Ɲanmiɛn mɔ i ti yɛ a o nguan nun’n,+ mɔ like kwlaa nga a yo’n wo i sa nun’n.
24 I yɛ ɔ yoli maan sran sa nga fiteli m’ɔ klɛli ndɛ ng’ɔ o yɛ’n niɔn.+
25 Ndɛ nga be klɛli’n yɛ: MENE, MENE, TEKƐLI nin PAASININ.
26 “Ndɛ sɔ’m be bo’n yɛ: MENE: Ɲanmiɛn kali ɔ famiɛn dilɛ’n i cɛn mun kpɛkun ɔ sieli i nuan.+
27 “TEKƐLI: Be sunnzunnin wɔ toe’n su, kpɛkun be wunnin kɛ a yoman nɔnnin kaan sa.
28 “PERƐSI: Be bubuli ɔ famiɛn diwlɛ’n nun, kpɛkun be fa mannin Medifuɛ mun nin Pɛɛsifuɛ mun.”+
29 Kɛ ɔ yoli sɔ’n, Bɛlsazaa kannin ndɛ kleli i sufuɛ mun, kpɛkun be fali tralɛ ɔkwlɛ kankan be wlali Daniɛli wun. Yɛ be fali kɔmin ɲanman nga sika ɔkwlɛ yɛ be fa yoli’n be fa wlɛli i kɔmin. Asa ekun’n, be boli i jɔ seli kɛ i yɛ ɔ́ wá yó sran nga be sie famiɛn diwlɛ’n be nsan su’n niɔn.+
30 Kɔnguɛ kunngba sɔ’n nun’n, be kunnin Bɛlsazaa m’ɔ ti Kaldefuɛ’m be famiɛn’n.+
31 Kpɛkun be fali famiɛn diwlɛ’n wlali Dariisi+ m’ɔ ti Medifuɛ’m be famiɛn’n i sa nun. Kɛ ɔ́ yó sɔ’n nn ɔ le afuɛ ablesiɛn-nin-nɲɔn (62).
Ja ngua lɔ ndɛ mun
^ Yɛle kɛ, be junman nga be di’n yɛle wunnzue yilɛ nin nzraama’m be kannganlɛ’n.
^ Ara., “famiɛn bla’n.”
^ Yɛle kɛ, be junman nga be di’n yɛle wunnzue yilɛ nin nzraama’m be kannganlɛ’n.
