Nga Pɔlu klɛli Efɛzifuɛ mun’n 4:1-32
4 I sɔ’n ti’n, min mɔ e Min’n ti’n n ti bisuafuɛ’n,+ ń srɛ́ amun kɛ an nian flɛlɛ mɔ be flɛli amun’n su be nanti.+
2 I sɔ yolɛ nun’n, an kan amun wun ase,+ an yo wɛtɛɛfuɛ, an tra amun awlɛn.+ Sa nga amun wiengu yo amun’n, maan ɔ sɔn amun nun klolɛ mɔ amun klo i’n+ ti.
3 Ɲanmiɛn wawɛ’n maan amun bo w’a yo kun. An mian amun ɲin naan amun nin amun wiengu’m be tran klanman naan amun bo yo kun titi.+
4 Wunnɛn’n ti kun,+ yɛ Ɲanmiɛn wawɛ’n ti kun.+ I wafa kunngba’n, be flɛli amun naan amun fa amun wla guɛ i like kunngba’n su.+
5 E Min’n ti kun,+ e lafi ndɛ kunngba’n su, batɛmun’n ti kun,
6 Ɲanmiɛn ti kun, yɛ ɔ ti e kwlaa e Si. Ɔ o like kwlaa ti su, ɔ fa like kwlaa di junman, yɛ i tinmin’n di junman like kwlaa nun.
7 Ɲanmiɛn yoli maan e tinuntinun e ɲannin ye dan. Klisi yɛ ɔ fali like sɔ’n cɛli e tinuntinun-ɔn.+
8 Afin Ɲanmiɛn ndɛ’n se kɛ: “Kɛ ɔ fu ɔli nglo lɔ’n, ɔ fali sran wie mɔ be trali be’n ɔli. Ɔ fali sran wie mun mannin.”+
9 ?Kɛ be se kɛ ‘ɔ ɔli nglo lɔ’n,’ i sɔ’n kle sɛ? I sɔ’n kle kɛ ɔ dun mmua jrali ngua ka, yɛle kɛ ɔ jrali asiɛ’n su wa.
10 Sran ng’ɔ jrali’n, i kunngba’n yɛ ɔ fuli nglo+ mmua kpa lɔ’n+ niɔn, ɔ trali ɲanmiɛn su lɔ’n su. Ɔ yoli sɔ naan like kwlaa nuan yia.
11 Ɔ sieli sran wie mun akoto,+ ɔ sieli wie mun Ɲanmiɛn nuan ijɔfuɛ,+ ɔ sieli wie mun jasin fɛ bofuɛ,+ ɔ sieli wie mun kɛ be nian asɔnun’n i nunfuɛ mɔ be ti kɛ bua sa’n be lika, yɛ ɔ sieli wie mun kɛ be kle like.+
12 Ɔ kunndɛ kɛ be kle Ɲanmiɛn i sran’m* be like. Asa ekun’n, ɔ kunndɛ kɛ be uka be wiengu mun, yɛ be yo naan Klisi i wunnɛn’n* yo kpa.+
13 Bé dí junman sɔ’n lele e kwlaa e bo yó kun é láfi ndɛ kunngba’n su, kpɛkun é sí Ɲanmiɛn i Wa’n i kpa. I liɛ’n, é tín,+ yɛ é yó sran kpa kɛ Klisi sa.
14 I sɔ’n ti’n, ɔ fataman kɛ e yo kɛ ba kanngan mun sa kun. Afin be sie be su gblɛfuɛ mɔ be laka sran mun naan be fa atin tɛ su’n be nuan bo. I liɛ’n, e su yoman kɛ mmeli mɔ aunmuan’n nin jenvie’n be fɛ i kɔ wa kɔ wa’n sa.+
15 Sanngɛ maan e di nanwlɛ, yɛ e yi klolɛ’n i nglo. Sɛ e yo sɔ’n, e ɲin tí sa kwlaa nun, kpɛkun é yó ninnge mun kɛ Klisi m’ɔ ti wunnɛn’n i ti’n+ ɔ fa yo’n sa.
16 I dunman nun ti’n, wunnɛn’n i likalika’m be kwlaa+ be sasa su sɛsɛsɛ, yɛ be di junman likawlɛ. Wunnɛn’n i likalika’m be ukauka be wiengu naan wunnɛn’n ɲan like nga i sa miɛn i wun’n. Kɛ wunnɛn’n i lika kun di i junman liɛ ng’ɔ fata kɛ ɔ di’n, wunnɛn sɔ’n ɔ ɲin, yɛ ɔ yo kpa klolɛ su.+
17 I sɔ’n ti’n, ndɛ nga ń kán klé amun’n, mɔ e Min’n i dunman nun’n ń sé amun kɛ amun nanti su’n yɛ: Nán amun nanti kɛ mɛn’n nunfuɛ’m be fa nanti’n sa kun,+ afin be faman ngwlɛlɛ be nantiman.*+
18 Be* o aosin nun, yɛ be o nguan m’ɔ fin Ɲanmiɛn’n i wun mmua. Afin be siman sa, be awlɛn mɔ w’a kete’n* ti.
19 Be siman ɲannzuɛn kun, ɔ maan be fali be wun wlali ɲin kekle ayeliɛ’m*+ be nun mlɔnmlɔn. I sɔ’n ti’n, sa kainkain mun yɛ be yo be sa tititi-ɔ.
20 Sanngɛ b’a kleman amun kɛ Klisi’n ti sɔ.
21 Zezi kleli wafa nga ndɛ nanwlɛ’n ti’n, yɛ sɛ amun tili i nuan ndɛ’n, naan be kleli amun like i dunman nun’n, nn amun si ninnge sɔ mun kpa.
22 Be kleli amun kɛ amun wla amun nzuɛn laa’n i ase.+ Afin i su yɛ amun nian nantili laa-ɔ, yɛ ninnge tɛtɛ nga amun nzuɛn laa’n ti amun konvi sɔ be’n be ti’n, amun fali atin tɛ su.+
23 Asa ekun’n, maan amun akunndan’n kaci naan ɔ yo uflɛ titi.+
24 Yɛ amun fa nzuɛn uflɛ+ mɔ Ɲanmiɛn yili i kɛ i bɔbɔ fa klo’n sa. Nzuɛn sɔ’n taka sa nuan su sɛsɛ yolɛ kpafuɛ’n, ɔ nin seiin nantilɛ kpafuɛ’n su.
25 Siɛn mɔ amun a yaci ato bualɛ’n, amun di nanwlɛ kle amun wiengu.+ Afin e ti kɛ wunnɛn’n i likalika mun sa, e ti sran wunmuan.+
26 Sɛ amun fa ya’n, nán amun yo sa tɛ.+ Nán amun fa ya lele naan wia’n tɔ su.+
27 Nán amun man Suɛn Tɔnfuɛ’n i wluwlɛ.+
28 Sran ng’ɔ wua’n, maan ɔ yaci wualɛ naan ɔ di junman kekle kpa. Maan ɔ fɛ i sa di junman kpa+ naan ɔ ɲan like man be nga be sa w’a mian’n.+
29 Nán ndɛ tɛ* fi sa fin amun nuan fite,+ sanngɛ maan ndɛ kpa ngunmin yɛ ɔ fin amun nuan fite-ɔ, naan ɔ wla sran fanngan blɛ ng’ɔ ti i nuan su’n nun, yɛ ɔ yo be nga be ti’n be ye.+
30 Asa ekun’n, nán an bo Ɲanmiɛn wawɛ’n i wla.+ Afin be fa sieli amun nzɔliɛ+ naan b’a kwla kpɔ amun ti naan cɛn nga bé dé sran mun’n, amun a ɲan amun ti.+
31 An wla klunngbɔ’n nin awlɛn fufu’n+ nin ya ble’n nin kpankpanlɛ’n nin nzowa’n,+ ɔ nin sa tɛtɛ wafawafa’n kwlaa be ase.+
32 Sanngɛ an yo amun wiengu ye, an si aunnvɔɛ,+ yɛ an yaci amun wiengu i wun sa cɛ i klun ufue su, kɛ nga Ɲanmiɛn yacili amun wun sa’n cɛli amun+ Klisi i dunman nun’n sa.
Ja ngua lɔ ndɛ mun
^ Annzɛ “be uka be naan be nanti atin kpa’n su.”
^ Yɛle kɛ, asɔnun’n.
^ Annzɛ “like fi nunman be ti nun.”
^ Glk., “Be akunndan’n.”
^ Glk., “w’a tri’n.”
^ Annzɛ “ɲannzuɛn sa mun.” Glɛki nun: asɛlgeia. Nian Ndɛ’m be bo tulɛ lika’n nun lɔ.
^ Glk., “kplɔwa.”
