Ezekiɛli 2:1-10
2 Kpɛkun ɔ seli min kɛ: “Sran wa,* jaso jran nglo maan n kan ndɛ n kle wɔ.”+
2 Kɛ ɔ kannin ndɛ kleli min’n, wawɛ’n jrali min su, kpɛkun ɔ yoli maan n jrannin nglo+ naan m’an kwla tie sran ng’ɔ su kan ndɛ kle min’n i ndɛ’n i kpa.
3 Ɔ seli min kɛ: “Sran wa, ń má súnman wɔ Izraɛlifuɛ’m be sin.+ Ń má súnman wɔ nvlenvle mɔ be yoli ɲin kekle min su’n+ be sin. Be nin be nannan mun be fɔnnin min wun lele yɛ w’a fa ju andɛ yɛ.+
4 Ń má súnman wɔ ba ɲin keklefuɛ mɔ be awlɛn w’a kete’n be sin.+ Ɔ fata kɛ a se be kɛ: ‘Ndɛ nga Miɛn Zoova m’ɔ Sie Like Kwlakwla’n ɔ kan’n yɛ.’
5 Be liɛ’n, kɛ mɔ be ti nvle kun mɔ be ɲin su ti kekle’n+ ti’n, sɛ bé tíe-o annzɛ be su tieman-o, bé sí kpa kɛ Ɲanmiɛn nuan ijɔfuɛ kun trannin be afiɛn.+
6 Sanngɛ wɔ, sran wa, nán maan srɛ kun wɔ be wun,+ nán maan srɛ kun wɔ ndɛ nga bé wá kán’n ti. Kannzɛ bɔbɔ ijre tɛtɛ mun nin owieowie’m+ be bo sin yia wɔ* naan a tran ɲannglan’m be afiɛn’n, nán srɛ kun wɔ ndɛ nga bé wá kán’n ti.+ Yɛ nán maan be ɲrun’n kun wɔ srɛ.+ Afin be ti nvle kun mɔ be ɲin su ti kekle-ɔ.
7 Ɔ fata kɛ a kan min ndɛ mun kle be, kannzɛ bɔbɔ bé tíe-o annzɛ be tieman-o, kan kle be. Afin be ti nvle kun mɔ be ɲin su ti kekle-ɔ.+
8 “Sanngɛ wɔ, sran wa, sie ɔ su tie ndɛ nga n su kan kle wɔ’n. Nán yo ɲin kekle kɛ nvlefuɛ nga mɔ be ɲin su ti kekle’n be sa. Trɛ ɔ nuan nun naan di like nga n su fa man wɔ’n.”+
9 Kɛ n niannin lɔ’n, n wunnin sran kun i sa mɔ w’a tinngɛ nun min ndɛnman’n.+ Kpɛkun n wunnin fluwa ɲɔnɲɔnwa kun mɔ be klɛli su’n i sa nun.+
10 Kɛ ɔ trɛli fluwa’n nun min ɲrun’n, n wunnin kɛ be klɛli su i ɲrun nin i sin.+ Awuyomo bolɛ* nin sunlɛ nin fɛfɛlɛ ndɛ yɛ be klɛ su-ɔ.+
Ja ngua lɔ ndɛ mun
^ Ndɛ mma “Sran wa’n” ɔ o Ezekiɛli fluwa’n nun kpɛ 93. I kpɛ klikli’n yɛle nga.
^ Be kwla se ekun kɛ “Kannzɛ bɔbɔ nvlefuɛ’m be ɲin su ti kekle naan be ti kɛ like m’ɔ wɔwɔ wɔ’n sa’n.”
^ Annzɛ “Ngwlɛ yilɛ.”
