Ezekiɛli 20:1-49
20 Kpɛkun afuɛ nso su i anglo nnun’n su’n, anglo’n i cɛn ba blu su’n, Izraɛli kpɛnngbɛn wie’m be wa trannin min ɲrun lɛ, naan bé úsa Zoova i sa.
2 Kpɛkun Zoova kannin ndɛ kleli min. Ɔ seli min kɛ:
3 “Sran wa, kan ndɛ kle Izraɛli kpɛnngbɛn mun. Se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “?Amun bali min sa usalɛ? ‘N wo lɛ sakpa, n su tɛman amun su.’+ Ndɛ nga Miɛn Zoova m’ɔ sie like kwlakwla’n ɔ kan’n yɛ ɔ o lɛ-ɔ.”’
4 “?Sran wa, w’a siesie ɔ wun kɛ á dí be jɔlɛ? ?W’a siesie ɔ wun kɛ á dí be jɔlɛ? Kan tete ninnge nga be nannan’m be yoli’n be ndɛ kle be.+
5 Se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Cɛn nga n fali Izraɛli’n,+ n tali Zakɔbu i osu’n nunfuɛ’m be nda,* yɛ n yili min wun nglo n kleli be Ezipti mɛn’n nun lɔ.+ Nanwlɛ, n tali be nda, yɛ n seli be kɛ: ‘N ti amun Ɲanmiɛn Zoova.’
6 Cɛn sɔ’n nun’n, n tali nda kɛ ń fá be Ezipti mɛn’n nun ń fíte, naan ń fá be ń kɔ́ mɛn kun mɔ n kunndɛli n mannin be’n i nun lɔ. Nɔnnɔn nin awɛma nzue be sonji mɛn sɔ’n nun.+ I yɛ ɔ ti mɛn’m be kwlaa be nun klanman kpafuɛ’n niɔn.
7 I sin’n, n seli be kɛ: ‘Ɔ fata kɛ amun tinuntinun amun gua tete ninnge nga be o amun ɲin bo lɛ’n be blo. Nán maan Ezipti amuin mɔ be ti like kain’n*+ be yo amun wun fiɛn. N ti amun Ɲanmiɛn Zoova.’+
8 “‘“Sanngɛ be yoli ɲin kekle min su, b’a kplinman su kɛ bé síe be su min nuan bo. B’a guaman tete ninnge nga be o be ɲin bo lɛ’n be blo, yɛ b’a kaciman be sin b’a siman Ezipti amuin mɔ be ti like kain’n.+ I sɔ’n ti’n n tali nda kɛ ń má fá min ya dan’n ń gúa be su, ń fá min ya’n i kwlaa ń gúa be su Ezipti mɛn’n nun lɔ.
9 Sanngɛ min dunman’n ti yɛ n yoli sɔ-ɔ, kɛ ɔ ko yo naan b’a yomɛn i finfin nvlenvle nga be tran be nun’n be ɲrun lɛ’n ti.+ Afin kɛ ń fá be* Ezipti mɛn’n nun ń fíte nvlenvle’m be ɲin bo lɛ’n, n yoli maan be* sili min.+
10 N fali be Ezipti mɛn’n nun n fiteli, kpɛkun n fa be ɔli aawlɛ flɛnnɛn’n nun lɔ.+
11 “‘“I sin’n, n fali min mmla mun n mannin be, yɛ n yoli maan be sili like nga n kunndɛ kɛ be yo’n,+ kɛ ɔ ko yo naan sran ng’ɔ nanti be su’n w’a kwla ka nguan nun be dunman nun’n ti.+
12 Asa ekun’n, n fali min wunmiɛn-lolɛ-cɛn mun n mannin be+ naan be yo e nin be e afiɛn nzɔliɛ like.+ I liɛ’n, bé sí jrɛiin kɛ min bɔbɔ Zoova yɛ n su yo be sanwun-ɔn.
13 “‘“Sanngɛ Izraɛli nvle’n nunfuɛ’m be yoli ɲin kekle min su aawlɛ flɛnnɛn’n nun lɔ.+ B’a nantiman min mmla’m be su, yɛ b’a faman min ndɛ’m be su, kusu nn sɛ sran kun nanti be su’n ɔ́ ká nguan nun be dunman nun. Be yoli min wunmiɛn-lolɛ-cɛn mun be finfin dan. I sɔ’n ti’n n tali nda kɛ ń fá min ya dan’n ń gúa be su aawlɛ flɛnnɛn’n nun lɔ naan ń núnnún be.+
14 Min dunman’n ti yɛ n yoli sɔ-ɔ, kɛ ɔ ko yo naan b’a yomɛn i finfin nvlenvle’m be ɲrun lɛ’n ti. Nvle sɔ’m be ɲin bo lɛ yɛ n fali be* Ezipti lɔ n fiteli-ɔ.+
15 Asa ekun’n, n tali be nda aawlɛ flɛnnɛn’n nun lɔ kɛ n su faman be n kɔman mɛn nga n fa mannin be’n nun lɔ.+ Nɔnnɔn nin awɛma nzue be sonji mɛn sɔ’n nun.+ I yɛ ɔ ti mɛn’m be kwlaa be nun klanman kpafuɛ’n niɔn.
16 Afin b’a faman min ndɛ’m be su, b’a nantiman min mmla’m be su. Be yoli min wunmiɛn-lolɛ-cɛn mun be finfin, afin be awlɛn’n trannin be amuin mɔ be ti like kain’n be su.+
17 “‘“Sanngɛ be yoli min annvɔ,* ɔ maan m’an kunman be. M’an nunnunman be aawlɛ flɛnnɛn’n nun lɔ.
18 N seli be mma mun aawlɛ flɛnnɛn’n nun lɔ+ kɛ: ‘Nán amun nanti amun nannan’m be mmla’m be su,+ yɛ nán amun fa ndɛ nga be kan’n su, nán maan be amuin mɔ be ti like kain’n be ti’n amun wlu fiɛn nun.
19 N ti amun Ɲanmiɛn Zoova. Maan amun nanti min mmla’m be su, yɛ amun fa ndɛ nga n kan’n su, amun nian be su be nanti.+
20 Maan amun bu min wunmiɛn-lolɛ-cɛn’m be cinnjin,+ yɛ bé yó e nin amun e afiɛn nzɔliɛ like. I liɛ’n, amún wá sí jrɛiin kɛ n ti amun Ɲanmiɛn Zoova.’+
21 “‘“Sanngɛ be mma’m be yoli ɲin kekle min su.+ B’a nantiman min mmla’m be su, b’a faman min ndɛ’m be su naan se kɛ bé nían su bé nánti. Kusu nn sɛ sran kun nanti be su’n, ɔ́ ká nguan nun be dunman nun. Be yoli min wunmiɛn-lolɛ-cɛn mun be finfin. I sɔ’n ti’n, n tali nda kɛ ń má fá min ya dan’n ń gúa be su, ń má fá min ya’n i kwlaa ń gúa be su aawlɛ flɛnnɛn’n nun lɔ.+
22 Sanngɛ min dunman’n+ ti’n m’an yoman sɔ kun,+ kɛ ɔ ko yo naan b’a yoman min dunman’n i finfin nvlenvle’m be ɲrun’n ti. Nvle sɔ’m be ɲin bo lɛ yɛ n fali be* Ezipti lɔ n fiteli-ɔ.
23 Asa ekun’n, aawlɛ flɛnnɛn’n nun lɔ’n n tali be nda kɛ ń má yó maan bé bó sánndi nvlenvle’m be nun, ń yó maan bé bó sánndi mɛnmɛn’m be nun.+
24 Afin b’a faman min ndɛ’m be su, yɛ b’a nantiman min mmla’m be su.+ Be yoli min wunmiɛn-lolɛ-cɛn mun be finfin. Kpɛkun be sɔli be nannan’m be amuin mɔ be ti like kain’n.*+
25 Asa ekun’n, n yacili be lɛ maan be fali mmla mɔ be timan kpa’n be su, yɛ be fali ndɛ mɔ sɛ be fa su-ɔ, be su ɲanman nguan’n be su.+
26 N yacili be lɛ maan be wluli fiɛn nun, be tɛ mɔ kɛ bé yí’n be fa be mma klikli mun yi i sin nun’n ti.+ N yoli sɔ naan be wla bo be wun. I liɛ’n, bé wá sí jrɛiin kɛ n ti Zoova.”’
27 “I sɔ’n ti’n, sran wa, kan ndɛ kle Izraɛli i awlo’n nunfuɛ mun, se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Kɛ amun nannan’m be yoli min finfin kɛ ngalɛ’n sa, be nin min b’a nantiman klanman.
28 N fali be n ɔli mɛn nga n tali be nda kɛ ń fá mán be’n nun lɔ.+ Kɛ be wunnin kpɔlɛ fleiin mun nin waka mɔ be le nɲa kpa’n,+ be yili tɛ mun, be yili be tɛ kainkain mun. Be yili tɛ m’ɔ bɔn fannin’n,* yɛ be guali nzan ase lɛ.
29 I sɔ’n ti’n, n usali be kɛ: ‘?Ngue yɛ amun kɔ i yolɛ lika nglonglo’n su lɔ-ɔ? (Andɛ nin andɛ’n be te flɛ i kɛ Lika nglonglo.)’”’+
30 “Se Izraɛli nvle’n nunfuɛ’m be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “?Nán like kunngba nga amun nannan’m be yoli mɔ be wluli fiɛn nun’n yɛ amun su yo i lɛ? Be suli be amuin mɔ be ti like kain’n be su, be sɔli be.*+
31 ?Lele nin andɛ’n amun te yo amun wun fiɛn? Amun yi tɛ be man amun amuin mɔ be ti like kain’n be kwlaa, amun fa amun mma’m be yi i sin nun.+ ?Ee Izraɛli nvle’n nunfuɛ mun, kɛ amun yo sɔ’n n kwla tɛ sa nga amun usa’n su?”’+
“‘N wo lɛ sakpa, n su tɛman amun su.+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
32 Akunndan nga amun bu mɔ amun se kɛ: “Maan e yo kɛ nvle nga mun sa, maan e yo kɛ mɛn onga’m be nun awlobo mɔ be sɔ waka nin yɔbuɛ mun’n sa,”+ ɔ su kpɛnman su le.’”
33 “‘N wo lɛ sakpa, ń má fá min sa mɔ wunmiɛn o nun’n, min sa mɔ i nun ti tinngɛwa’n ń síe amun kɛ famiɛn sa, ń yó i sɔ ya su.+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
34 Ń má fá min sa mɔ wunmiɛn o nun’n, min sa mɔ i nun ti tinngɛwa’n ń kó fá amun nvlenvle’m be nun ń fíte, ń fá amun mɛnmɛn nga amun bo sanndili be nun’n be nun ń fíte yɛ ń yíayía amun, ń yó i sɔ ya su.+
35 Ń má fá amun ń kɔ́ nvlenvle’m be aawlɛ flɛnnɛn’n nun lɔ. Lɔ yɛ ń dí amun jɔlɛ-ɔ. Kɛ ń dí amun jɔlɛ’n e ɲin tá e wiengu ɲrun.+
36 “‘Kɛ nga n fa dili amun nannan’m be jɔlɛ Ezipti mɛn’n nun lɔ aawlɛ flɛnnɛn’n nun sa’n, i wafa kunngba’n, ń má dí amun jɔlɛ wie.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
37 Ń má yó maan amún sín nnɛn kankanfuɛ’n i kpɔnman’n i bo,+ yɛ ń mían amun kɛ amun di aenguɛ’n su.
38 Sanngɛ ń má yí ɲin keklefuɛ mun, ɔ nin be mɔ be fɔn min wun’n amun afiɛn.+ Ń má fá be mɛn nga be ti nun aofuɛ’n i nun ń fíte, sanngɛ be su wluman Izraɛli mɛn’n nun lɔ.+ Kpɛkun amún wá sí jrɛiin kɛ n ti Zoova.’
39 “Yɛ amun, Izraɛli i awlo’n nunfuɛ mun, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Maan amun tinuntinun amun wɔ naan amun ko sɔ amun amuin mɔ be ti like kain’n.+ Sanngɛ i sin’n, sɛ amun a tieman min ndɛ’n, amun su kwlá faman tɛ nga amun yi be’n nin amun amuin mɔ be ti like kain’n yoman min dunman m’ɔ ti sanwun’n i finfin kun.’+
40 “‘Afin oka m’ɔ ti min liɛ klonglo’n su, Izraɛli nvle’n nun oka fleiin kun su+ yɛ Izraɛli nvle’n nunfuɛ’m be kwlaa bé kó sú min nvle’n nun-ɔn.+ Min klun wá jɔ́ be wun lɔ, kpɛkun ń sé amun kɛ amun man min like, ń sé amun kɛ amun fa amun ninnge’m be mma klikli’n, amun ninnge nga be ti min liɛ klonglo’n be kwlaa be man min.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
41 ‘Kɛ ń má fá amun nvlenvle’m be nun ń fíte’n, mɔ ń fá amun mɛnmɛn nga amun bo sanndili be nun’n be nun ń fíte mɔ ń yíayía amun’n,+ tɛ nga amun yi m’ɔ bɔn fannin’n* ti’n, min klun wá jɔ́ amun wun. Yɛ ń yí min wun nglo amun afiɛn kɛ n ti sanwun nvlenvle’m be ɲrun.’+
42 “‘Kpɛkun kɛ ń má fá amun ń kɔ́ Izraɛli nvle+ mɔ n tali nda kɛ ń fá mán amun nannan mun’n i nun lɔ’n, amún wá sí jrɛiin kɛ n ti Zoova.+
43 Lɔ’n, amun wla wá kpɛ́n amun ayeliɛ’n nin sa kwlaa nga amun yoli mɔ i ti amun wluli fiɛn nun’n be su,+ yɛ amun wun yó amun bɔbɔ amun kain, ninnge tɛtɛ kwlaa nga amun yoli’n ti.+
44 Ee Izraɛli nvle’n nunfuɛ mun, min dunman’n ti’n n su nianman amun klunwi ayeliɛ’n nin sa tɛtɛ nga amun yoli be’n su n yoman amun sa.+ I liɛ’n, amún wá sí jrɛiin kɛ n ti Zoova.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
45 Zoova kannin ndɛ kleli min ekun. Ɔ seli min kɛ:
46 “Sran wa, kpɛ ɔ ɲin ngua lɔ lika’n su naan kan ndɛ kle ngua lɔ lika’n. Kan sa ng’ɔ́ wá jú’n i ndɛ kle bo ng’ɔ o ngua lɔ lika’n nun’n.
47 Se ngua lɔ bo’n kɛ: ‘Tie ndɛ nga Zoova kan’n. Ndɛ nga Miɛn Zoova m’ɔ Sie Like Kwlakwla’n kan’n yɛ: “Ń má sɔ́ sin kun nuan ɔ wun,+ kpɛkun ɔ́ yrá ɔ nun waka mɔnnɛn nin waka kee’m be kwlaa. Yɛ kɛ ɔ fɛ i nglo lɔ lika’n nun lele m’ɔ́ fá jú ngua lɔ’n, sin’n su nuanman,+ ɔ́ yrá sran’m be kwlaa be ɲrun’n.
48 Kpɛkun sran’m be kwlaa bé wá wún kɛ n bɔbɔ min Zoova m’an sɔ sin kun nuan naan ɔ su nuanman.”’”+
49 Yɛ n seli kɛ: “Ee, min Min Zoova, wɔ mɔ a Sie Like Kwlakwla’n, be kan min ndɛ be se kɛ: ‘Ndɛ ng’ɔ kan’n ti ɲanndra ngunmin.’”
Ja ngua lɔ ndɛ mun
^ Ebr., “n mannin min sa’n su.”
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Yɛle kɛ, Izraɛli.
^ Yɛle kɛ, Izraɛli.
^ Yɛle kɛ, Izraɛli.
^ Ebr., “be yoli min ɲinma’n i annvɔ.”
^ Yɛle kɛ, Izraɛli.
^ Ebr., “be ɲin trannin be sin.”
^ Annzɛ “m’ɔ yo maan be wla gua ase’n.” Ebr., “m’ɔ yo maan be lo wunmiɛn’n.”
^ Annzɛ “be nin be boli tekle.”
^ Annzɛ “m’ɔ yo maan be wla gua ase.” Ebr., “m’ɔ yo maan be lo wunmiɛn.”
