Ezekiɛli 22:1-31
22 Yɛ Zoova kannin ndɛ kleli min ekun. Ɔ seli min kɛ:
2 “?Sanngɛ sran wa, ɔ liɛ’n, w’a siesie ɔ wun kɛ á bú klɔ m’ɔ gua sran mmoja ase’n i fɔ,*+ naan á kán tete ninnge kwlaa ng’ɔ yoli be’n i ndɛ klé be?+
3 Ɔ fata kɛ a se be kɛ: “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ee klɔ, wɔ mɔ a yo maan mmoja sonji ɔ nun’n,+ wɔ mɔ ɔ blɛ’n su ba’n,+ mɔ a yo amuin mɔ be ti like kain’n* fa yo ɔ wun fiɛn’n,+
4 mmoja mɔ a guɛli i ase’n ti’n a yoli sa tɛ.+ Yɛ ɔ amuin mɔ be ti like kain’n be ti’n, w’a wlu fiɛn nun.+ A yoli maan ɔ cɛn’m be awieliɛ’n juli ndɛndɛ. Yɛ ɔ afuɛ’m be awieliɛ’n w’a ju. Ń má yó maan nvlenvle’m bé yó ɔ finfin. Yɛ bé srí wɔ mɛnmɛn’m be kwlaa be nun.+
5 Wɔ mɔ ɔ dunman’n ti fiɛn mɔ ɔ nun ti oyooyo’n, mɛn nga be mantan wɔ’n ɔ nin mɛn nga be o mmua kpa’n bé wá srí wɔ.+
6 Nian! Izraɛli kpɛnngbɛn nga be o ɔ nun’n be tinuntinun be fa be kwlalɛ’n be gua sran mmoja ase.+
7 Ɔ lɔ’n, sran’m be yo be si nin be nin’m be finfin,+ be bu aofuɛ m’ɔ tran be afiɛn’n i lufle, yɛ be yo ba mɔ be leman si’n,* ɔ nin angbeti bla’m be tɛtɛ.”’”+
8 “‘A yo ninnge nga be ti min liɛ klonglo’n be finfin, yɛ a diman min wunmiɛn-lolɛ-cɛn’m be su.+
9 Suɛn tɔnfuɛ wie mɔ b’a fua kpa kɛ bé gúa sran mmoja ase’n be o ɔ nun.+ Ɔ lɔ’n, be di tɛ nnɛn mun oka’m be su. Yɛ ɔ lɔ’n, be yo ɲannzuɛn sa mun.+
10 Ɔ lɔ’n, sran’m be yo be si’m be bɛ’m be finfin,*+ yɛ be nin bla m’ɔ o fiɛn nun i mannza blɛ nun’n be la kekle nun.+
11 Ɔ lɔ’n, be yo be wiengu’m be yi’m be tɛtɛ,+ yɛ wie mun ekun be yo ɲannzuɛn sa be fa yo be wa yasua’n i yi’n i finfin.+ Yɛ wie mun ekun be nin be niaan bla m’ɔ ti be bɔbɔ be si i wa bla’n be la kekle nun.+
12 Ɔ lɔ’n, sran’m be sɔ adi ninnge’m be nun naan bé gúa mmoja ase.+ Kɛ a bo sran bosia’n, a kunndɛ kɛ be su i bo+ annzɛ a kunndɛ kɛ á ɲán nun like,* a de ɔ wiengu’m be sika wue kekle su.+ Nanwlɛ, ɔ wla w’a fi min mlɔnmlɔn.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
13 “‘Nian! Kɛ n wun ninnge nga a ɲan be ndrunmun dilɛ nun’n, ɔ nin mmoja mɔ be guɛ i ase ɔ nun’n n bo ndɛ, i kain m’ɔ yo min’n ti.
14 ?Blɛ mɔ ń má tú ɔ fɔ’n á kwlá jrán kekle titi? ?Yɛ ɔ sa’m bé ɲán wunmiɛn titi?+ Min bɔbɔ Zoova yɛ n kan sɔ-ɔ, yɛ ń má fá ajalɛ.
15 Ń má yó maan á bó sánndi nvlenvle’m be nun, ń yó maan á bó sánndi mɛnmɛn’m be nun.+ Yɛ ń yó maan ɔ wun fiɛn’n ɔ́ wíe.+
16 Bé wá gúa ɔ ɲin ase nvlenvle’m be nun, yɛ á wá sí jrɛiin kɛ n ti Zoova.’”+
17 Zoova kannin ndɛ kleli min ekun. Ɔ seli min kɛ:
18 “Sran wa, Izraɛli i awlo’n nunfuɛ’m be timan like fi min ɲrun kun, be ti kɛ wla sa. Be kwlaa be ti kɛ aaba, nin etɛn, nin blalɛ, ɔ nin sunmun mɔ be o fuu kun nun’n sa. B’a kaci kɛ sika nun fiɛn sa.+
19 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Kɛ mɔ amun kwlakwla amun a kaci kɛ wla m’ɔ timan like fi sa’n ti’n,+ ń má tían amun nuan likawlɛ, Zerizalɛmun klɔ’n nun.
20 Kɛ nga be fa tian sika, nin aaba, nin blalɛ, nin sunmun, ɔ nin etɛn be nuan fuu kun nun, mɔ be fita sin’n nun naan ɔ jue be su naan be klo’n sa’n, i wafa kunngba’n ya dan mɔ n fali’n ti’n, ń má tían amun nuan likawlɛ, yɛ ń fíta amun su, yɛ ń yó maan amún kló.+
21 Ń má tían amun nuan, yɛ ń fá min ya dan m’ɔ jue kɛ sin sa’n ń fíta amun su,+ yɛ amún kló klɔ’n nun.+
22 Kɛ nga sika’n ɔ klo fuu kun nun’n sa’n, i wafa kunngba’n, amún wá kló klɔ’n nun, yɛ amún wá sí kɛ min bɔbɔ Zoova n fali min ya dan’n n guali amun su.’”
23 Zoova kannin ndɛ kleli min ekun. Ɔ seli min kɛ:
24 “Sran wa, se klɔ’n kɛ: ‘A ti asiɛ kun mɔ min ya cɛn’n nun’n be su yoman ɔ sanwun yɛ nzue su tɔman ɔ su-ɔ.
25 Ɔ Ɲanmiɛn nuan ijɔfuɛ’m be cicili sran’m be wun ndɛ ɔ nun,+ kɛ asɔmɔli kun m’ɔ su titi nnɛn wie nun’n sa.+ Be di sran mun. Be fa ninnge nga be le ɲrun’n, ɔ nin ninnge kpakpa mun. Be yoli maan bla kpanngban b’a yo angbeti klɔ’n nun.
26 Klɔ’n nun Ɲanmiɛn ɲrun jranfuɛ’m be diman min mmla’m be su,+ yɛ be yo lika mɔ be ti min liɛ klonglo’n be finfin.+ Be siman like m’ɔ ti min liɛ klonglo’n ɔ nin like m’ɔ timan min liɛ klonglo’n be ngbaciɛ’n.+ Yɛ be ukaman sran mun naan be si like ng’ɔ timan sanwun’n, ɔ nin like ng’ɔ ti sanwun’n.+ Be kplinman su kɛ bé dí min wunmiɛn-lolɛ-cɛn’m be su, yɛ be yo maan sran’m be yo min finfin.
27 Klɔ’n nun sran dandan’m be ti kɛ blo alua mɔ be titi nnɛn nun’n sa, be gua mmoja ase, yɛ be kun sran be fa kunndɛ sika.+
28 Yɛ klɔ’n nun Ɲanmiɛn nuan ijɔfuɛ mun be fa ayre ufue be kan be ayeliɛ’n i ayre, be wun ato ninnge mun aolia nun, yɛ be bua ato se kɛ sa wie’m bé wá jú.+ Kpɛkun be se kɛ: “Ndɛ nga Miɛn Zoova m’ɔ Sie Like Kwlakwla’n kan’n yɛ,” kusu nn Zoova w’a kanman ndɛ.
29 Nvle’n nun sran’m be di sran’m be lufle, yɛ be wua.+ Be yo be nga be leman wie’n, ɔ nin yalɛfuɛ’m be tɛtɛ. Be di aofuɛ m’ɔ tran be afiɛn’n i lufle, yɛ be dimɛn i ndɛ’n i klanman.’
30 “‘N kunndɛli be nun sran kun m’ɔ kwla siesie yɔbuɛ talɛ’n i ye’n, annzɛ sran kun m’ɔ kwla jran buɛ ng’ɔ o talɛ’n nun’n i nun min ɲrun lɛ, naan ɔ kan mɛn’n i ti ndɛ naan m’an nunnunmɛn i’n,+ sanngɛ m’an wunman sran.
31 I sɔ’n ti’n, ń má fá min ya dan’n ń gúa be su, yɛ ń fá min ya dan m’ɔ jue kɛ sin sa’n ń núnnún be. Ń má yó maan bé wún atin nga be fali su’n i su afɛ’n.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
Ja ngua lɔ ndɛ mun
^ Ebr., “á wá dí jɔlɛ, á wá dí jɔlɛ.”
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Annzɛ “aika ba mun.”
^ Ebr., “be fa be si’m be wun kplɛn’n be kle.”
^ Annzɛ “i asubo’n ti dan.”
