Ezekiɛli 23:1-49
23 Zoova kannin ndɛ kleli min ekun. Ɔ seli min kɛ:
2 “Sran wa, bla nɲɔn be o lɛ’n, be nin ti kun.+
3 Be boli tekle Ezipti lɔ.+ Be boli tekle bolɛ bo be talua nun. Be mianmiannin be wunflɛn mun lɔ, i nun mɔ be nin-a siman bian’n be fali be sa be kpakpali be wue’n nun.
4 Be flɛ kpɛnngbɛnfuɛ’n kɛ Oola,* yɛ be flɛ i niaan bla’n kɛ Ooliba.* Be kacili min liɛ, yɛ be wuli ba yasua nin ba bla mun. Oola yɛle Samari,+ kpɛkun Ooliba yɛle Zerizalɛmun.
5 “Kɛ Oola bó tekle bolɛ bo’n+ nn ɔ ti min liɛ. I konvi sɔli Asirifuɛ+ mɔ be ti i mantanfuɛ mɔ be klo i kpa’n.+
6 Wie’m be ti siefuɛ, be wun tralɛ’n ti ble, yɛ wie’m be ti famiɛn janunfuɛ. Be kwlaa be ti gbanflɛn klanman, yɛ be fu be nnɛn kpanngɔ’m be su.
7 Ɔ nin Asiri yasua kpakpa’m be boli tekle titi. Ɔ fali be mɔ w’a wu be ti kpo’n, be amuin mɔ be ti like kain’n* fa yoli i wun fiɛn.+
8 W’a yaciman tekle ng’ɔ boli i Ezipti lɔ’n i bolɛ, afin i talua nun yɛ be nin i be lali-ɔ. I nun m’ɔ nin-a siman bian’n be fali be sa be kpɛkpɛli i wue’n nun, kpɛkun klolɛ mɔ be klo i’n i su yɛ be niannin be nin i be lali-ɔ.+
9 Ɔ maan n fɛli i n wlali Asiri yasua mɔ be klo i kpa’n, mɔ i kusu w’a wu be ti kpo’n be sa nun.+
10 Be fɛli i wun kplɛn’n be kleli,+ yɛ be fɛli i mma yasua nin i mma bla mun.+ Kpɛkun be fali tokofi be kunnin i. I dunman’n fuli bla’m be nun, yɛ be tuli i fɔ.
11 “Kɛ i niaan bla Ooliba wunnin i sɔ’n, i bian ndɛ’n wa yoli tɛ dan trali laa’n. Yɛ i tekle bolɛ’n wa yoli tɛ dan trɛli i niaan bla liɛ’n.+
12 I ɲin trannin Asiri yasua mɔ be ti i mantanfuɛ’n be sin.+ Wie’m be ti siefuɛ, yɛ wie’m be ti famiɛn janunfuɛ, be wla tralɛ nglanman mun, yɛ be fu nnɛn kpanngɔ’m be su. Be kwlaa be ti gbanflɛn klanman.
13 Kɛ ɔ yoli i wun fiɛn’n, n wunnin i wlɛ kɛ be nɲɔn’n be ayeliɛ’n ti kun.+
14 Sanngɛ ɔ fɛli i wun wlɛli i tekle bolɛ nun trali laa’n. Ɔ wunnin yasua wie’m be nzɔliɛ mɔ be sɛli be talɛ’n nun’n. Kaldefuɛ’m be nzɔliɛ yɛ be sɛli-ɔ, be kannin be ayre ɔkwlɛ,
15 kplo ci be afiɛn, yɛ tannin tanmue cici be ti. Be wafa’n ti kɛ sonja mun sa. Be kwlaa be ti Babilɔninfuɛ mɔ be wuli be Kaldefuɛ’m be mɛn’n nun lɔ’n be nzɔliɛ.
16 Kɛ ɔ wunnin be cɛ’n i ɲin trannin be sin, yɛ ɔ sunmannin sran wie mun be sin Kalde mɛn’n nun lɔ.+
17 Ɔ maan Babilɔnin yasua’m be ba be wa lɛ i bian kunndɛlɛ bɛ’n su titi. Kpɛkun kɛ be nin i be la’n ɔ yo fiɛn. Kɛ be ko yo i fiɛn ko wie’n, be wun yo i tɛ yɛ, ɔ kaci i sin si be.
18 “Kɛ ɔ fɛli i wun wlɛli i tekle bolɛ nun mɔ ɲannzuɛn w’a kunmɛn i’n, m’ɔ yili i wun kplɛn’n kleli’n,+ i wun yoli min kain yɛ n kacili min sin n sili i, kɛ nga i niaan bla i wun fa yoli min kain mɔ n kacili min sin n sili i’n sa.+
19 Ɔ fɛli i wun wlɛli i tekle bolɛ nun trali laa’n.+ Ɔ maan i wla kpɛnnin i talua nun blɛ m’ɔ boli tekle Ezipti mɛn’n nun lɔ’n i su.+
20 I konvi sɔli be, kɛ be nga be yasua lika’n ti kɛ aflunmun mun annzɛ nnɛn kpanngɔ’m be liɛ’n sa’n be soman’m be fa yo’n sa.
21 Ɔ ɲin trannin ɲannzuɛn sa nga a yoli i ɔ talua nun’n Ezipti lɔ’n i sin.+ Blɛ sɔ’n nun’n, be fali be sa be kpakpali ɔ wue’n nun, be fa kpakpali ɔ talua nun wunflɛn’n su.+
22 “I sɔ’n ti’n, Ooliba, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ń má yó maan be mɔ be klo wɔ kpa’n,+ mɔ be wun yoli ɔ tɛ mɔ a kacili ɔ sin sili be’n bé bá. Ń má yó maan bé fín lika’n kwlaa nun bé bá bé wá tɔ́ ɔ su:+
23 Babilɔnin+ yasua mun, nin Kaldefuɛ’m+ be kwlaa, nin Pekɔdufuɛ mun,+ nin Soafuɛ mun, nin Koafuɛ mun, ɔ nin Asiri yasua’m be kwlaa. Be kwlaa be ti gbanflɛn klanman, be ti siefuɛ nin famiɛn janunfuɛ, ɔ nin sonja nin sran wie mɔ be niannin nun be kpali be’n. Be kwlaa be fu nnɛn kpanngɔ’m be su.
24 Bé wá fá alɛ kunlɛ kakaklolo mun, ɔ nin sonja kpanngban, nin ɲrɛn dandan nin ɲrɛn kanngan,* nin kpongbo kle bé bá bé wá tɔ́ ɔ su. Bé wá bó sín yía wɔ, yɛ ń mán be atin kɛ be tu ɔ fɔ. Kpɛkun bé tú ɔ fɔ kɛ be fa klo’n sa.+
25 Ń má yí min ya’n i nglo ɔ su, kpɛkun bé yó ɔ like ya su. Bé wá kpɛ́ ɔ bue nin ɔ su mun, kpɛkun ɔ sran nga bé ká lɛ’n bé fá tokofi bé kún be. Bé wá fá ɔ mma bla mun nin ɔ mma yasua mun bé kɔ́. Kpɛkun sin yrá ɔ sran nga bé ká lɛ’n.+
26 Bé wá dé ɔ tralɛ mun,+ kpɛkun bé fá ɔ wun klanman yolɛ ninnge mun.+
27 Ń má yó maan ɲannzuɛn sa nga a yo’n, nin ɔ tekle nga a bo+ mɔ a boli i bo Ezipti mɛn’n+ nun lɔ’n bé wíe. A su nianman be lɔ kun, ɔ wla su kpɛnman Ezipti su kun.
28 “Afin ndɛ nga Miɛn Zoova m’ɔ Sie Like Kwlakwla’n kan’n yɛ: ‘N su wa yi wɔ n wla be mɔ be kpɔ wɔ’n be sa nun, be mɔ be wun yo ɔ tɛ mɔ a kacili ɔ sin sili be’n.+
29 Bé wá kpɔ́ wɔ, bé dé ɔ ninnge nga a fɛli be wun’n be kwlaa,+ yɛ bé yáci ɔ wun kplɛn, like fi su kaman ɔ wun. Ɔ bian kunndɛlɛ sukusuku nun mɔ a yi ɔ wun kplɛn’n, ɔ nin ɲannzuɛn sa nga a yo’n, nin tekle nga a bo’n bé wá tɛ́ nglo.+
30 Sa sɔ’m bé wá jú ɔ su, afin a wanndi suli nvlenvle’m be su kɛ tekle bofuɛ sa,+ a fali be amuin mɔ be ti like kain’n a yoli ɔ wun fiɛn.+
31 A niannin ɔ niaan bla i ayeliɛ’n su.+ Ɔ maan ń má fɛ́ i klowa’n ń wlá ɔ sa nun.’+
32 “Ndɛ nga Miɛn Zoova m’ɔ Sie Like Kwlakwla’n kan’n yɛ:
‘Á wá nɔ́n ɔ niaan bla i klowa mɔ i bo ti kploun’n, m’ɔ ti dan’n nun.+Yɛ bé wá srí wɔ, bé yó ɔ finfin, afin ninnge sɔ’m be sɔnnin klowa’n nun kpa.+
33 Nzanbɔɛ nin awlabɔɛ’n bé wá káta ɔ su kplu,srɛ dan’n, nin awlabɔɛ klowa’n,ɔ niaan bla Samari i klowa’n ɔ́ wá káta ɔ su.
34 Ɔ fata kɛ a nɔn klowa’n i nun like’n, nɔn i ngba’n,+ yɛ didi klowa mɔ fa yɛ be fa yoli’n i buebue’n.I sin’n, kpɛkpɛ ɔ wunflɛn mun.
“Afin min bɔbɔ yɛ n kan sɔ-ɔ.” Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.’
35 “I sɔ’n ti’n ndɛ nga Miɛn Zoova m’ɔ Sie Like Kwlakwla’n kan’n yɛ: ‘Kɛ mɔ ɔ wla fili min su mɔ a kpɔcili min mlɔnmlɔn’n ti’n,*+ á wá wún ɲannzuɛn sa nga a yo’n, ɔ nin ɔ tekle bolɛ’n be su afɛ’n.’”
36 I sin’n, Zoova seli min kɛ: “?Sran wa, á wá dí Oola nin Ooliba+ be jɔlɛ? ?Á wá kán ninnge kainkain nga be yo’n be ndɛ klé be?
37 Be boli tekle,+ yɛ mmoja o be sa’m be su. Nán tekle ngunmin yɛ be nin be amuin mɔ be ti like kain’n be boli-ɔ, sanngɛ be fali be mma mɔ be wuli be mannin min’n, be fa yili i sin nun kɛ aliɛ sa be fa mannin be amuin mun.+
38 Asa ekun’n, like nga be yoli min’n yɛ: Be yoli min sua’n i fiɛn cɛn sɔ’n nun, kpɛkun be yoli min wunmiɛn-lolɛ-cɛn mun be finfin.
39 Kɛ be kunnin be mma’m be fa yili tɛ mannin be amuin mɔ be ti like kain’n,+ i sin’n be bali min sua’n nun be wa yoli i finfin+ cɛn sɔ’n nun. Like nga be yoli i min sua’n nun’n yɛ ɔ o lɛ-ɔ.
40 I kpa bɔbɔ’n be sunmannin sran kun naan ɔ ko fa sran mun mmua kpa lɔ bla.+ Kɛ bé bá’n, a ko wunnzinnin, a fali like jajali ɔ ɲinma sin klanman kpa, yɛ a wlawlali ɔ wun klanman yolɛ ninnge mun.+
41 Kpɛkun a ko trannin bia tɛnndɛn kun+ mɔ tabli kun jin i ɲrun lɛ’n su.+ A fali min ansan+ nin min ngo’n+ a sieli i tabli sɔ’n su.
42 Be ti sran kpanngban wie mɔ be buman like fi akunndan’n be ngan lika sɔ’n nun lɛ, nzanbɔɛfuɛ wie mɔ be nin be fin aawlɛ flɛnnɛn’n nun lɔ’n be o be nun. Be fa nga mun be wla bla’m be sa, yɛ be fa famiɛn kle klanman mun be wla be ti.
43 “I sin’n, n kannin bla mɔ w’a bo tekle lele w’a fɛ’n i ndɛ n seli kɛ: ‘Ɔ nin i sɔ ngba’n, ɔ́ wá bó tekle titi.’
44 Ɔ maan be kɔ i sin titi, kɛ nga be fa kɔ tekle bofuɛ kun i sin’n sa. Kɛ be kɔ Oola nin Ooliba mɔ be yo ɲannzuɛn sa’n be sin kɛ ngalɛ’n sa.
45 Sanngɛ sran kpa mun bé wá dí be jɔlɛ kɛ nga be fa di bla nga be kunndɛ bian be wun bo’n,+ nin bla nga be gua mmoja ase’n+ be jɔlɛ’n sa. Afin be kunndɛ bian be wun’m be bo, yɛ mmoja o be sa’m be su.+
46 “Afin ndɛ nga Miɛn Zoova m’ɔ Sie Like Kwlakwla’n kan’n yɛ: ‘Bé wá fá sonja wie’m bé bá naan be tɔ be su. Bé wá yó maan amun wun yó sran’m be tɛ, kpɛkun bé fɛ́n amun bo ninnge mun.+
47 Sonja’m bé wá tótó be yɔbuɛ,+ kpɛkun bé fá be tokofi mun bé kún be. Bé wá kún be mma yasua nin be mma bla mun,+ kpɛkun bé fá sin bé wɔ́ be sua’m be nun.+
48 Ń má yó maan ɲannzuɛn sa yolɛ’n ɔ́ wíe nvle’n nun, kpɛkun bla’m be kwlaa bé fá sa sɔ’n bé tú be wun fɔ, be su yoman amun ɲannzuɛn sa’n wie.+
49 Bé wá yó maan amún wún ɲannzuɛn sa nga amun yo’n, ɔ nin sa tɛtɛ nga amun nin amun amuin mɔ be ti like kain’n be yo’n be su afɛ’n. Yɛ amún wá sí jrɛiin kɛ min yɛ n ti Miɛn Zoova m’ɔ Sie Like Kwlakwla’n niɔn.’”+
Ja ngua lɔ ndɛ mun
^ I bo’n yɛ: “Min tannin sua’n wo i nun.”
^ I bo’n yɛ: “I tannin sua’n.”
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Blɛ sunman’n, ta tofuɛ mun yɛ be tra ɲrɛn kanngan sɔ’m be nun-ɔn.
^ Ebr., “a fali min yili ɔ sin lɔ.”
