Ezekiɛli 25:1-17
25 Zoova kannin ndɛ kleli min ekun. Ɔ seli min kɛ:
2 “Sran wa, kpɛ ɔ ɲin Amɔnfuɛ’m+ be su lɔ naan kan sa ng’ɔ́ wá jú be su’n i ndɛ.+
3 Amɔnfuɛ’m be su ndɛ ng’ɔ fata kɛ a kan’n yɛ: ‘Amun tie ndɛ nga Miɛn Zoova m’ɔ Sie Like Kwlakwla’n kan’n. Ndɛ nga Miɛn Zoova m’ɔ Sie Like Kwlakwla’n kan’n yɛ: “Kɛ be yoli min sua’n i finfin’n, mɔ Izraɛli mɛn’n tɔli srolo’n, mɔ be trali Zida i nvle’n nunfuɛ mun be ɔli nvle uflɛ nun’n, amun seli kɛ: Ɛn-ɛɛn!
4 I sɔ’n ti’n, ń má fá amun ń mán wia afiliɛ lɔfuɛ mun, yɛ amún yó be liɛ. Bé bó be nanmue mun amun lɔ, yɛ bé kplán be tannin sua mun amun afiɛn. Bé wá dí amun waka mma mun, yɛ bé nɔ́n amun nɔnnɔn’n.
5 Ń má yó maan Raba+ káci ɲɔnngɔnmin’m be didiwlɛ, yɛ Amɔnfuɛ’m be mɛn’n ɔ́ káci bua’m be wunmiɛn lolɛ lika. Yɛ amún wá sí jrɛiin kɛ n ti Zoova.”’”
6 “Afin ndɛ nga Miɛn Zoova m’ɔ Sie Like Kwlakwla’n kan’n yɛ: ‘Sa ng’ɔ juli Izraɛli nvle’n su’n ti’n, amun boli ndɛ,+ amun tu kpɛnnin yɛ amun dili aklunjɔɛ, amun yoli i finfin dan.+
7 I sɔ’n ti’n, ń má tínngɛ min sa’n amun wun, kpɛkun ń fá amun ń mán nvlenvle mun naan be fɛn amun bo ninnge mun. Ń má núnkun amun nvlenvle’m be afiɛn, yɛ ń núnnún amun mɛnmɛn’m be nun.+ Ń má núnnún amun sekeseke, kpɛkun amún wá sí jrɛiin kɛ n ti Zoova.’
8 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Moabu+ nin Seii+ be seli kɛ: “An nian, Zida nvle’n ti kɛ nvle onga’m be sa.”
9 Ń má yó maan bé tɔ́ Moabu i klɔ nga be o i aɲialiɛ’n su’n be nun kpakpa’m be su. Be nun wie mun yɛle Bɛti-Zesimɔti, nin Baali-Meɔn, Kiriataimun+ bɔbɔ o be nun wie.
10 Ń má fá Moabufuɛ mun nin Amɔnfuɛ mun ń mán wia afiliɛ lɔfuɛ mun naan be yo be liɛ.+ I liɛ’n, be wla su kpɛnman Amɔnfuɛ’m be su kun nvlenvle’m be afiɛn.+
11 Ń má bú Moabu i fɔ,+ yɛ bé wá sí jrɛiin kɛ n ti Zoova.’
12 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Edɔmun tuli i klunngbɔ Zida nvle’n nunfuɛ’m be su. Yɛ i klunngbɔ sɔ m’ɔ tuli i be su’n ti’n, ɔ yoli sa tɛ dan.+
13 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: “N kusu ń má tínngɛ min sa’n Edɔmun wun kpɛkun ń kún sran mun nin nnɛn mun, yɛ ń yó maan ɔ́ tɔ́ srolo.+ Kɛ ɔ fɛ i Teman m’ɔ́ fá jú Dedan’n, bé fá tokofi bé kún be kwlaa.+
14 ‘Ń má sín Izraɛlifuɛ mɔ be ti min nvle’n nunfuɛ mun’n be lika ń tú min klunngbɔ Edɔmun su.+ Bé wá yí min ya’n nin min ya dan’n be nglo Edɔmun su. I liɛ’n, bé wá sí like nga be flɛ i kɛ min klunngbɔ tulɛ’n.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”’
15 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Filistifuɛ’m be sran kpɔlɛ dan’n ti’n, be kunndɛli kɛ bé tú be klunngbɔ naan bé sáci like.+
16 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: “Ń má tínngɛ min sa’n Filistifuɛ’m be wun,+ yɛ ń kún Kerɛtifuɛ mun,+ kpɛkun ń núnnún be nga be tran jenvie’n i nuan lɔ mɔ be kali lɛ’n.+
17 Ń má yó sa dandan ń fá tú min klunngbɔ be su, ń má tú be fɔ ya su. Yɛ kɛ ń má tú min klunngbɔ be su’n bé wá sí jrɛiin kɛ n ti Zoova.”’”
