Ezekiɛli 28:1-26
28 Zoova kannin ndɛ kleli min ekun, ɔ seli min kɛ:
2 “Sran wa, se Tir klɔ’n i su kpɛn’n kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ:
“Kɛ mɔ a tu ɔ wun’n ti’n,+ a se titi kɛ: ‘N ti ɲanmiɛn kun.
N tran ɲanmiɛn kun i famiɛn bia’n su jenvie’n i afiɛn lɔ.’+
Kannzɛ bɔbɔ a bu ɔ klun lɔ kɛ a ti ɲanmiɛn kun’n,
sanngɛ a ti klɔ sran ngbɛn, a timan ɲanmiɛn kun.
3 Nian! ?A si ngwlɛlɛ tra Daniɛli?+
?Like fi timan fiawa ɔ ɲrun?
4 Akunndan nin ngwlɛlɛ mɔ a si i’n ti’n, a ɲannin ɔ wun,yɛ a tian sika ɔkwlɛ nin sika be nuan ɔ ninnge kpakpa’m be siewlɛ’mbe nun.+
5 Aata mɔ a si i di’n ti’n, a ɲannin ɔ wun dan,+yɛ ɔ wun mɔ a ɲɛnnin i’n ti’n, a tuli ɔ wun.”’
6 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ:
“Kɛ mɔ a buli ɔ klun lɔ kɛ a ti ɲanmiɛn kun’n ti’n,
7 ń má yó maan aofuɛ’m bé jáso ɔ wun, ń má yó maan nvle’m be nun tɛ kpafuɛ’n ɔ́ jáso ɔ wun.+Bé wá yí be tokofi mun bé fá sáci ninnge nglanman nga ɔ ngwlɛlɛ’n ti’n a ɲannin be’n.Bé wá yó klanman dan mɔ a ti’n i finfin.+
8 Bé wá fá wɔ bé jrá kunman’n nun lɔ,yɛ á wá wú ɲrɛnnɛn wie jenvie’n i afiɛn lɔ.+
9 ?Á kwlá sé sran nga ɔ́ wá kún wɔ’n i ekun kɛ ‘n ti ɲanmiɛn kun’?
Be nga bé wá yó ɔ fiɛn’n be sa nun’n, á wá yó klɔ sran titi, a su yoman ɲanmiɛn kun.”’
10 ‘Á wá wú aofuɛ’m be sa nun kɛ be nga b’a wlaman be klɛn’n sa,afin n bɔbɔ min yɛ n kan sɔ-ɔ.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
11 Kpɛkun Zoova kannin ndɛ kleli min ekun. Ɔ seli min kɛ:
12 “Sran wa, yi ngwlɛ* Tir famiɛn’n ti, yɛ se i kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ:
“Laa’n, fiɛn kaan sa nunman ɔ wun,a si ngwlɛlɛ,+ yɛ ɔ klanman’n ti dan.+
13 Laa’n, a o Edɛnin m’ɔ ti Ɲanmiɛn i fie klanman’n nun lɔ.
Yɔbuɛ kpakpa kwlaa tata ɔ wun:Ribi, topazi, zaspu, klizoliti, oniksi, yɛ zadi, safii, tikuazi+ nin emerodu.Be fali sika ɔkwlɛ be cili yɔbuɛ sɔ’m be wun.
Cɛn nga be wuli wɔ’n i nun yɛ be siesieli be-ɔ.
14 N kpali wɔ n sieli i ngunmin kɛ a yo seribɛn m’ɔ trɛ i ndɛwa’m be nun’n.
A o oka m’ɔ ti Ɲanmiɛn liɛ klonglo’n su,+ yɛ a wlanwlan yɔbuɛ mɔ be ti sin ngunmin’n be afiɛn.
15 Kɛ ɔ fin cɛn nga be yili wɔ’n ɔ ayeliɛ’n yoli kpalele naan b’a wun sa tɛ ɔ nun.+
16 Ɔ aata dilɛ dan’n ti’n,+a yoli nzaje sa dan, yɛ a yoli sa tɛ.+
Ee, seribɛn mɔ trɛ i ndɛwa’m be nun’n, kɛ mɔ w’a yo fiɛn’n ti’n, ń má kán ɔ bo Ɲanmiɛn i oka’n su, yɛ ń núnnún wɔ,+ń má yó maan á wá kɔ́ yɔbuɛ mɔ be ti sin ngunmin’n be wun mmua.
17 Ɔ klanman dan’n ti’n a tuli ɔ wun.+
A sacili ɔ ngwlɛlɛ’n, ɔ klanman dan’n ti.+
Ń má tó wɔ ń yí i asiɛ wun.+
Ń má yó maan famiɛn’m bé nían wɔ.
18 Ɔ sa tɛ dan’n ɔ nin ndrunmun mɔ a di i aata dilɛ nun’n ti’n, a yoli ɔ sua mɔ be ti be liɛ ngunmin’n be finfin.
Ń má yó maan sin kun wá júe ɔ nun, kpɛkun ɔ́ yrá wɔ mlɔnmlɔn.+
Ń má yó maan á káci nzuɛn asiɛ’n su, be kwlaa nga be nian wɔ’n be ɲrun lɛ.
19 Be kwlaa nga be si wɔ nvlenvle’m be nun’n bé nían wɔ siin, be nuan m’ɔ́ bó be wun dan’n ti.+
Awieliɛ’n ká lɛ wíe wɔ kpɛ kunngba, yɛ ɔ́ yó sro,a su tranman lɛ kun mlɔnmlɔn.”’”+
20 Zoova kannin ndɛ kleli min ekun. Ɔ seli min kɛ:
21 “Sran wa, kpɛ ɔ ɲin Sidɔn+ i su lɔ naan kan sa ng’ɔ́ wá jú i su’n i ndɛ kle i.
22 Ɔ fata kɛ a se i kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ:
“Ee Sidɔn, e nin wɔ e le i, yɛ min dunman’n ɔ́ wá fú ɔ nun lɔ.
Kɛ ń má tú i fɔ mɔ ń ɲán ɲrun i dunman nun ti’n, sran’m bé wá sí jrɛiin kɛ n ti Zoova.
23 Ń má súnman tukpacɛ m’ɔ sa ndɛndɛ’n i nun, yɛ mmoja’n sónji i nun akpɔ’m be su.
Kɛ tokofi’n wá fín i bue kwlaa su ɔ́ bɛ́ i su’n, be nga bé wá kún be’n, bé tɔ́ i afiɛn.Yɛ bé wá sí jrɛiin kɛ n ti Zoova.+
24 “‘“Kɛ ɔ ko yo sɔ’n, ijre mɔ be kpɛ kpa’n, ɔ nin owieowie mɔ be wɔ yaya’n be su bo sin yiaman Izraɛli nvle’n nunfuɛ’m be kun,+ be mɔ be yo be finfin’n be su bo sin yiaman be kun. Yɛ sran’m bé wá sí jrɛiin kɛ min yɛ n ti Miɛn Zoova m’ɔ Sie Like Kwlakwla’n niɔn.”’
25 “‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Kɛ ń má fá Izraɛli nvle’n nunfuɛ mun nvle nga be bo sanndili be nun’n be nun lɔ ń bá mɔ ń yía be nuan ekun’n,+ min dunman’n ɔ́ wá fú be afiɛn nvlenvle’m be ɲin bo lɛ.+ Yɛ bé wá trán mɛn+ nga n fa mannin min sufuɛ Zakɔbu m’ɔ ti be liɛ’n i nun.+
26 Bé wá trán nun fɔun nun,+ bé kplán sua mun yɛ bé dí viɲin fie.+ Kɛ ń má tú be nga be bo sin yia be mɔ be yo be finfin’n be fɔ’n,+ bé wá trán fɔun nun, yɛ bé wá sí jrɛiin kɛ n ti be Ɲanmiɛn Zoova.”’”
Ja ngua lɔ ndɛ mun
^ Annzɛ “to sɛ jue.”
