Ezekiɛli 29:1-21
29 Afuɛ blu su’n i anglo blu su’n, anglo’n i cɛn ba blu-nin-nɲɔn (12) su’n, Zoova kannin ndɛ kleli min ekun. Ɔ seli min kɛ:
2 “Sran wa, kpɛ ɔ ɲin Faraɔn m’ɔ ti Ezipti famiɛn’n i su lɔ, naan kan sa ng’ɔ́ wá jú i bɔbɔ ɔ nin Ezipti mɛn wunmuan’n su’n i ndɛ kle i.+
3 Kan ndɛ nga mun kle i, se i kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ:
“Faraɔn, wɔ mɔ a ti Ezipti famiɛn’n,+wɔ mɔ a ti jenvie’n nun nnɛn sroesroe m’ɔ la Nili Nzue’n i sama’m be nun’n, e nin wɔ e le i.+A seli kɛ: ‘Nili Nzue’n ti min liɛ.
N bɔbɔ min liɛ ti yɛ n yili-ɔ.’+
4 Sanngɛ ń má fá blalɛ wie mun ń wlá ɔ aoje’n nun, yɛ ń yó maan jue nga be o ɔ Nili’n nun’n bé mántan ɔ wun bui’m be su.
Ń má fá wɔ ɔ Nili Nzue’n nun ń fíte, ń fá wɔ nin Nili nun jue kwlaa nga be mantanmantan ɔ wun bui’m be su’n.
5 Ń má kó yáci wɔ aawlɛ flɛnnɛn’n nun lɔ, a nin ɔ Nili nun jue’m be kwlaa.
Á wá tɔ́ ijre’n nun lɔ, be su yiayiaman ɔ su, yɛ be su faman wɔ.+
Ń má fá wɔ ń mán asiɛ’n su blo nnɛn mun, ɔ nin anunman mɔ be tu sin nglo lɔ’n naan a kaci be aliɛ.+
6 Ɔ maan Eziptifuɛ’m be kwlaa bé wá sí jrɛiin kɛ n ti Zoova,afin b’a kwlá ukaman Izraɛlifuɛ mun, be yoli kɛ ijre kee* kaan kun sa.+
7 Kɛ be sɔli ɔ sa’n a bubuli,yɛ a yoli maan be wati’n kpali.
Kɛ be cisali ɔ su’n a bubuli,yɛ a yoli maan be ja’m* be usuli.”+
8 “‘I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: “Ń má fá tokofi kun ń bá ɔ su,+ yɛ ń kún sran nin nnɛn nga be o ɔ lɔ’n.
9 Ezipti mɛn’n ɔ́ tɔ́ srolo, yɛ ɔ́ sáci.+ Kpɛkun bé wá sí jrɛiin kɛ n ti Zoova, afin a seli kɛ: ‘Nili Nzue’n ti min liɛ. Min yɛ n yili-ɔ.’+
10 I sɔ’n ti’n, e nin wɔ e le i, yɛ e nin ɔ Nili’n e le i. Ɔ maan kɛ ɔ fɛ i Migidɔlu+ m’ɔ́ fá jú Siɛnin,+ lele m’ɔ́ fá jú Etiopi mɛn’n i awɛ’n su lɔ’n, ń má yó maan Ezipti mɛn’n ɔ́ sáci, ɔ́ káci lika kee, ɔ́ káci aawlɛ flɛnnɛn kun mɔ w’a tɔ srolo’n.+
11 I sran-o, i nnɛn-o, be nun wie fi su sinman lɔ,+ yɛ sran fi su tranman lɔ lele afuɛ ablanan (40).
12 Ń má yó maan Ezipti mɛn’n wá tɔ́ srolo trá mɛn’m be kwlaa, yɛ i klɔ’m bé wá tɔ́ srolo trá klɔ’m be kwlaa, ɔ́ yó sɔ lele afuɛ ablanan (40).+ Yɛ ń yó maan Eziptifuɛ’m bé bó sánndi nvlenvle’m be nun, yɛ bé bó sánndi mɛnmɛn’m be nun.”+
13 “‘Afin ndɛ nga Miɛn Zoova m’ɔ Sie Like Kwlakwla’n kan’n yɛ: “Kɛ afuɛ ablanan (40) ko sin’n, ń má kó fá Eziptifuɛ mun nvlenvle nga be bo sanndili be nun’n be nun lɔ ń bá.+
14 Ń má fá Eziptifuɛ mɔ be trali be ɔli’n ń sá be sin Patrɔsu+ m’ɔ ti be mɛn’n i nun, yɛ ń yó maan bé káci famiɛn diwlɛ kun m’ɔ leman ɲrun-ɔn.
15 Eziptifuɛ mun yɛ bé wá yó famiɛn diwlɛ’m be kwlaa be nun kaanfuɛ’n niɔn, ɔ maan be su kwlá sieman nvle onga’m be kun.+ Ń má yó maan be wunmiɛn’n wá kpɛ́ su dan ti’n be su kwlá sieman nvle onga mun.+
16 Izraɛli nvle’n nunfuɛ’m be su faman be wla be guɛmɛn i Ezipti su kun,+ sanngɛ ɔ́ yó maan be wla kpɛ́n fɔnlɛ mɔ kɛ be kpɛli be ɲin Ezipti su lɔ’n be fɔnnin’n su, yɛ bé wá sí jrɛiin kɛ min yɛ n ti Miɛn Zoova m’ɔ Sie Like Kwlakwla’n niɔn.”’”
17 Sanngɛ afuɛ ablaɔn-nin-nso’n (27) su’n, anglo klikli’n i cɛn ba klikli’n su’n, Zoova kannin ndɛ kleli min ekun, ɔ seli min kɛ:
18 “Sran wa, Famiɛn Nebikadnezaa*+ m’ɔ ti Babilɔnin famiɛn’n, ɔ yoli maan i sonja’m be dili junman kekle kpa naan b’a tɔ Tir su.+ Be kwlaa be ti’m be kpali, yɛ be wati’m be su kplokploli. Sanngɛ junman kekle nga i bɔbɔ nin i sonja’m be dili i Tir dunman nun’n, b’a ɲanman nun like fi.
19 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ń má fá Ezipti mɛn’n ń mán famiɛn Nebikadnezaa* m’ɔ ti Babilɔnin famiɛn’n.+ Ɔ́ wá fɛ́ i aɲanbeun ninnge mun, ɔ́ fá ninnge kpanngban yɛ ɔ́ fɛ́n i nun ninnge mun, yɛ i sɔ’n yó i sonja’m be akatua.’
20 “‘I nun nga ɔ́ tɔ́ klɔ’n* su’n, junman dan nga ɔ dili’n ti’n, ń má fá Ezipti mɛn’n ń mɛ́n i. Afin be dili junman mannin min.’+ Ndɛ nga Miɛn Zoova m’ɔ Sie Like Kwlakwla’n kan’n yɛ ɔ o lɛ-ɔ.
21 “Cɛn sɔ’n nun’n, ń má yó maan Izraɛli nvle’n nunfuɛ’m bé ɲán wunmiɛn,*+ kpɛkun ń mán ɔ atin naan a ijɔ be afiɛn. Kpɛkun bé wá sí jrɛiin kɛ n ti Zoova.”
Ja ngua lɔ ndɛ mun
^ Ebr., “ndɛma.”
^ Ebr., “be afiɛn mun.”
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “Nebikadrezaa.” I klɛlɛ wafa kun ekun-ɔn.
^ Yɛle kɛ, Tir.
^ Ebr., “wɛ.”
