Ezekiɛli 30:1-26
30 Zoova kannin ndɛ kleli min ekun. Ɔ seli min kɛ:
2 “Sran wa, kan sa ng’ɔ́ wá jú’n i ndɛ, se kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ:
“Amun kpan kekle se kɛ: ‘Ee, cɛn’n su ba!’
3 Afin cɛn’n w’a mantan koko, nanwlɛ, Zoova i cɛn’n w’a mantan koko.+
Cɛn sɔ’n ɔ́ wá yó kɛ nzue yɛ w’a mlan sa.+ Ɔ́ yó nvlenvle’m be fɔ tulɛ cɛn.+
4 Tokofi kun wá bá Ezipti su, yɛ kɛ be nga bé wá kún be’n bé tɔ́ Ezipti lɔ’n, Etiopi i wawɛ tɔ́ blo.B’a fɛ i aɲanbeun ninnge mun, b’a bubu i bo mɔ be wlɛli i ase’n.+
5 Etiopi,+ nin Puti,+ nin Ludi ɔ nin be kwlaa nga be fin nvle uflɛ nun’n,ɔ nin Kubu, nin nvle nga be trali aenguɛ’n* be mma mun,bé fá tokofi kún be kwlaa.”’
6 Ndɛ nga Zoova kan’n yɛ:
‘Be nga be suan Ezipti bo’n be kusu bé tɔ́ wie.Kpɛkun i kwlalɛ mɔ i ti yɛ maan ɔ tu i wun’n ɔ́ wíe.’+
“‘Kɛ ɔ fɛ i Migidɔlu+ m’ɔ́ fá jú Siɛnin’n+ bé fá tokofi bé kún be kwlaa nvle’n nun.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
7 ‘Be mɛn’n ɔ́ tɔ́ srolo trá mɛn’m be kwlaa, yɛ be klɔ’m bé sáci trá klɔ’m be kwlaa.+
8 Kɛ ń má fá sin ń yí i Ezipti mɛn’n nun’n, mɔ ń núnkun be nga ɔ nin be trali aenguɛ’n be kwlaa’n, bé wá sí jrɛiin kɛ n ti Zoova.
9 Cɛn sɔ’n nun’n, ń súnman sran wie mun mmeli’m be nun naan be ko yo naan Etiopi m’ɔ lafi i wun su dan’n ɔ usu. Ɲrɛnnɛn dan ng’ɔ́ wá tɔ́ Ezipti su’n ti’n be wawɛ tɔ́ blo, afin saan ɔ́ jú.’
10 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ń má sín Nebikadnezaa* m’ɔ ti Babilɔnin famiɛn’n i lika ń núnnún Ezipti i sran kpanngban mun.+
11 I bɔbɔ nin i sonja mɔ be ti nvlenvle’m be nun tɛ kpafuɛ’n,+ bé wá fá be bé bá naan be nunnun nvle’n. Bé wá cúɛn be tokofi mun Ezipti wun, yɛ be nga bé kún be’n be fuɛn’m bé yí nvle’n.+
12 Ń má yó maan Nili i sama’m bé wíe nun,+ be asiɛ’n wú kee. Yɛ ń yó nvle’n i atɛ sran nga be klun yo wi’n be sa nun. Ń má yó maan aofuɛ’m bé sáci mɛn’n,+ ɔ nin i nun ninnge’m be kwlaa. Min bɔbɔ Zoova yɛ n kan sɔ-ɔ.’
13 Ndɛ nga Miɛn Zoova m’ɔ Sie Like Kwlakwla’n kan’n yɛ: “Asa ekun’n, ń núnnún amuin mɔ be ti like kain’n* yɛ ń núnnún Nɔfu* lɔ amuin mɔ be timan like fi’n.+ Be su ɲanman sran dan* Ezipti mɛn’n nun lɔ kun, yɛ ń má yó maan srɛ wá kún Ezipti mɛn’n nunfuɛ mun.+
14 Ń má sáci Patrɔsu klɔ’n,+ yɛ ń fá sin ń yí i Zoan klɔ’n nun, kpɛkun ń tú No* klɔ’n i fɔ.+
15 Ń má fá min ya’n ń gúɛ i Sinin m’ɔ ti Ezipti i fiawlɛ’n i su. Yɛ ń má núnnún No lɔ sran’m be kwlaa.
16 Ń má fá sin ń yí i Ezipti mɛn’n nun, yɛ srɛ dan kpa wá kún Sinin. Bé wá fítí No i wun talɛ’n kpɛkun bé fá klɔ’n, yɛ bé fá alɛ wlɛ́ i Nɔfu* sin wia klengle kpa’n nun.
17 Bé wá fá tokofi bé kún Ɔnun* nin Pibesɛti lɔ gbanflɛn mun, kpɛkun bé trá klɔ’n nunfuɛ’m bé kɔ́.
18 Kɛ ń má búbú Ezipti i kɔmin su waka’n nun Tapanɛsi lɔ’n, lika’n wá lú tuun lɔ.+ I kwlalɛ mɔ i ti yɛ ɔ tu i wun’n ɔ́ wíe,+ ɲanmiɛn ble’n ɔ́ kɛ́tɛ i su. Kpɛkun bé trɛ́ i klɔ’n nunfuɛ mun kɔ́.+
19 Ń má tú Ezipti i fɔ, yɛ bé wá sí jrɛiin kɛ n ti Zoova.’”
20 Afuɛ blu-nin-kun’n (11) i anglo klikli’n su’n, anglo’n i cɛn ba nso su’n, Zoova kannin ndɛ kleli min ekun. Ɔ seli min kɛ:
21 “Sran wa, n buli Faraɔn m’ɔ ti Ezipti famiɛn’n i sa’n, be su ciciman su naan ɔ yo juejue, be su faman like be cicimɛn i sa’n naan w’a ɲan wunmiɛn w’a tra tokofi nun.”
22 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘E nin Faraɔn m’ɔ ti Ezipti famiɛn’n e le i.+ Ń má búbú i sa mun, ń bú i sa ng’ɔ le wunmiɛn kpa’n, ɔ nin i sa ng’ɔ ti buwa’n,+ ń yó maan tokofi’n fló i sa nun tɔ́.+
23 I sin’n, ń má yó maan Eziptifuɛ’m bé bó sánndi nvlenvle’m be nun, bé bó sánndi mɛnmɛn’m be nun.+
24 Ń má yó maan Babilɔnin i sa mun bé ɲán wunmiɛn,*+ kpɛkun ń fá min tokofi’n ń wlɛ́ i sa nun.+ Yɛ ń má búbú Faraɔn i sa mun, kpɛkun ɔ́ kplín kekle kpa kɛ sran m’ɔ su wu’n sa i ɲrun.*
25 Ń má yó maan Babilɔnin i sa’m bé ɲán wunmiɛn, sanngɛ Faraɔn i sa’m be liɛ’n bé glɔ́glɔ́. Kɛ ń má fá min tokofi’n ń wlɛ́ i Babilɔnin famiɛn’n i sa nun’n m’ɔ́ wá tɔ́ Ezipti mɛn’n su’n, bé wá sí jrɛiin kɛ n ti Zoova.+
26 Ń má yó maan Eziptifuɛ’m bé bó sánndi nvlenvle’m be nun, bé bó sánndi mɛnmɛn’m be nun,+ kpɛkun bé wá sí jrɛiin kɛ n ti Zoova.’”
Ja ngua lɔ ndɛ mun
^ Atrɛkpa’n, Izraɛlifuɛ mɔ be nin Ezipti be trali aenguɛ’n be ndɛ yɛ be kan-ɔn.
^ Ebr., “Nebikadrezaa.” I klɛlɛ wafa kun ekun-ɔn.
^ Annzɛ “siefuɛ.”
^ Annzɛ “Mɛnfisi.”
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Yɛle kɛ, Tebɛsi.
^ Annzɛ “Mɛnfisi.”
^ Yɛle kɛ, Eliopolisi.
^ Annzɛ “Ń má úkɛ i kwlalɛ’n su.”
^ Yɛle kɛ, Babilɔnin famiɛn’n i ɲrun.
