Ezekiɛli 32:1-32
32 Afuɛ blu-nin-nɲɔn (12) su’n, anglo blu-nin-nɲɔn (12) su’n, anglo’n i cɛn ba klikli’n su’n, Zoova kannin ndɛ kleli min ekun. Ɔ seli min kɛ:
2 “Sran wa, yi ngwlɛ Faraɔn m’ɔ ti Ezipti famiɛn’n i ti, se i kɛ:‘Laa’n, a ti kɛ nvlenvle’m be asɔmɔli gbanflɛn m’ɔ le wunmiɛn’n* sa,sanngɛ b’a yo maan w’a muan ɔ nuan’n su.
Laa’n, a ti kɛ jenvie’n nun nnɛn sroesroe wie sa,+ a kejekeje ɔ wun ɔ nzue ba’m be nun,a fa ɔ ja fa kputu nzue mun, yɛ a yo nzue ba mun* be fiɛn.’
3 Ndɛ nga Miɛn Zoova m’ɔ Sie Like Kwlakwla’n kan’n yɛ:
‘Ń má sín nvle kpanngban be lika ń tó min lala’n ń yí i ɔ su,bé wá fá min lala’n bé fá cúɛn wɔ nzue’n nun bé fíte.
4 Ń má yáci wɔ asiɛ wun lɛ,ń tó wɔ ń yí i ijre’n nun lɔ.
Yɛ ń má yó maan anunman mɔ be tu sin nglo lɔ’n bé trán ɔ su,ń yó maan asiɛ wunmuan’n su blo nnɛn mun bé dí wɔ yɛ be ku yí.+
5 Ń má tó ɔ nnɛn’n ń yí i oka’m be su,Kpɛkun ń fá ɔ onga’n ń gúɛ i kongo’m be nun naanbe yi.+
6 Ń má yó maan ɔ mmoja m’ɔ́ ɲrɛ́n’n, ɔ́ lúalúa mɛn’n lele fá jú oka’m be su lɔ,yɛ ɔ́ yí nzue ba mun.*
7 Kɛ a ko wu’n, ń má káta ɲanmiɛn m’ɔ la nglo lɔ plaii’n su, yɛ ń yó maan lɔ nzraama’m bé lú tuun.
Ń yó maan ɲanmiɛn ble’n káta wia’n su,yɛ anglo’n su taman.+
8 Ɔ dunman nun ti’n, ń má yó maan ɲanmiɛn su lɔ ninnge nga be kpaja’n be nun wie fi su kpajaman,yɛ ń má fá aosin tritri’n ń káta ɔ mɛn’n su.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
9 ‘Kɛ ń má fá ɔ sran mun ń kɔ́ nvle uflɛ nun mɔ ń fá be ń kɔ́ nvle mɔ a siman be’n be nun’n,+sran kpanngban be wla bó be wun.
10 Ń má yó maan sran kpanngban be nuan bó be wun,yɛ kɛ ń má yí min tokofi’n be ɲrun’n, srɛ dan kpa wá kún be famiɛn mun, ɔ dunman nun’n bé úsu.
Cɛn nga á tɔ́’n,bé úsu sa lele, be tinuntinun bé kókó be nguan’n i ti.’
11 Afin ndɛ nga Miɛn Zoova m’ɔ Sie Like Kwlakwla’n ɔ kan’n yɛ:
‘Babilɔnin famiɛn’n i tokofi’n ɔ́ bá ɔ su.+
12 Ń má yó maan safuɲrɛn’m bé wá fá tokofi bé kún ɔ sran kpanngban mun,nvle’m be nun tɛ kpafuɛ’n ɔ́ kún be kwlaa.+
Bé wá yó maan Ezipti i wun tulɛ’n kán ase, yɛ bé kún i sran kpanngban’m be kwlaa.+
13 Ń má kún i nnɛn’m be kwlaa i nzue kpanngban’m be wun lɛ,+yɛ klɔ sran ja annzɛ nnɛn ja fi su kputuman be kun.’+
14 ‘Blɛ sɔ’n nun’n, ń má yó maan be nzue’m bé yó sanwun,yɛ ń yó maan be nzue’m bé sónji kɛ ngo sa.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
15 ‘Kɛ ń má yó maan Ezipti tɔ́ srolo’n, mɔ ń yí ninnge kwlaa nga be o lɔ’n,+mɔ ń má kún i nunfuɛ’m be kwlaa’n,bé wá sí jrɛiin kɛ n ti Zoova.+
16 Ngwlɛ yilɛ jue yɛle nga, saan sran’m bé tó.Nvlenvle’m be mma bla mun bé wá tó.
Bé tó i Ezipti nin i sran kpanngban’m be kwlaa be ti.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
17 Afuɛ blu-nin-nɲɔn (12) su’n, anglo’n* i cɛn ba blu-nin-nnun (15) su’n, Zoova kannin ndɛ kleli min. Ɔ seli min kɛ:
18 “Sran wa, bo awuyomo Ezipti i sran kpanngban’m be ti, fɛ i jra ja ngua lɔ mɛn’n nun, fɛ i nin nvlenvle mɔ be le kwlalɛ’n be mma bla mun, ɔ nin be nga be jra kunman’n* nun lɔ’n.
19 “‘?Wan yɛ ɔ klanman trɛ i-ɔ? Jra ngua lɔ naan ko la be nga b’a wlaman be klɛn’n be wun lɔ!’
20 “‘Bé wá tɔ́ be nga be fali tokofi kunnin be’n+ be afiɛn. Be yili i be mannin tokofi’n, amun cuɛn i nin i sran kpanngban’m be kwlaa be wɔ mmua lɔ.
21 “‘Alɛ kunfuɛ mɔ be le kwlalɛ kpa’n, mɔ be o Ndia’n* i bo mmua kpa lɔ’n bé wá kán ndɛ klé i nin i ukafuɛ mun. Bé fá tokofi bé kún be, saan bé jrá ngua lɔ, yɛ bé lá kɛ be nga b’a wlaman be klɛn’n sa.
22 Lɛ yɛ Asiri nin i sran’m be kwlaa be o-ɔ. Be asieliɛ’n bo sin yiɛ i,* tokofi yɛ be fa kunnin be kwlaa-ɔ.+
23 I asieliɛ’m be o kunman’n* i bo mmua kpa lɔ, yɛ i sran mun be bo sin yiɛ i asieliɛ’n, tokofi yɛ be fa kunnin be kwlaa-ɔ, afin i nun mɔ be o nguan nun’n, be kleli sran’m be ɲrɛnnɛn.
24 “‘Lɛ yɛ Elamun+ wo-ɔ, i sran kpanngban’m be kwlaa be bo sin yiɛ i asieliɛ’n, tokofi yɛ be fa kunnin be kwlaa-ɔ. Be nga i nun mɔ be o nguan nun’n be kleli sran’m be ɲrɛnnɛn’n, be jrali ja ngua lɔ mɛn’n nun, b’a wlaman be klɛn. Siɛn’n, be nin be nga be jra kunman’n* nun lɔ’n bé wá wún ɲannzuɛn.
25 Be mɛnnin i lawlɛ be nga be kunnin be’n be afiɛn, yɛ i sran kpanngban’m be kwlaa be bo sin yiɛ i asieliɛ mun. B’a wlaman be nun wie fi i klɛn, be fali tokofi be kunnin be, afin i nun mɔ be o nguan nun’n, be kleli sran’m be ɲrɛnnɛn. Be nin be nga be jra kunman’n* nun lɔ’n bé wá wún ɲannzuɛn. Be fɛ i sieli be nga be kunnin be’n be nun.
26 “‘Lɛ yɛ Mesɛki nin Tubali,+ ɔ nin be* sran kpanngban’m be kwlaa be o-ɔ. Be* asieliɛ’m be o i wun lɛ. B’a wlaman be nun wie fi i klɛn, be fali tokofi be wɔwɔli be, afin i nun mɔ be o nguan nun’n, be kleli sran’m be ɲrɛnnɛn.
27 Be nin safuɲrɛn mɔ b’a wlaman be klɛn mɔ be kunnin be’n, mɔ be nin be alɛ kunlɛ ninnge mun be jrali Ndia’n* nun lɔ’n bé lá likawlɛ. Bé wá fá be tokofi mun bé síe i be ti’m be bo,* yɛ bé fá be sa tɛ mun bé síe i be owie’m be su, afin i nun mɔ safuɲrɛn sɔ’m be o nguan nun’n, be kleli sran’m be ɲrɛnnɛn.
28 Sanngɛ ɔ liɛ’n, bé wá núnkun wɔ be nga b’a wlaman be klɛn’n be afiɛn, yɛ á wá lá be nga be fali tokofi be kunnin be’n be wun lɛ.
29 “‘Lɛ yɛ Edɔmun+ wo-ɔ, i famiɛn mun nin i su kpɛn’m be kwlaa be o lɛ. Kannzɛ bɔbɔ be le kwlalɛ’n, sanngɛ be la be nga be fali tokofi be kunnin be’n be afiɛn. Be kusu be nin be nga b’a wlaman be klɛn’n,+ ɔ nin be nga be jra kunman’n* nun lɔ’n bé wá lá likawlɛ.
30 “‘Lɛ yɛ nglo lɔ lika’n nun sran dandan mun* be nin Sidɔnfuɛ’m+ be kwlaa be o-ɔ. Kannzɛ bɔbɔ be kwlalɛ’n ti’n be yo sro’n, sanngɛ be nin be nga be kunnin be’n be fali be ɲrun ɲannzuɛn’n be jrali lɔ. Sran sɔ mɔ b’a wlaman be klɛn’n be nin be nga be fali tokofi be kunnin be’n bé lá likawlɛ, be nin be nga be jra kunman’n* nun lɔ’n bé wún ɲannzuɛn.
31 “‘Sa kwlaa ng’ɔ juli Faraɔn i sran kpanngban’m be su’n ti’n, kɛ ɔ́ wá wún be kwlaa sɔ mun’n i wla gúa ase.+ Bé fá tokofi bé kún Faraɔn nin i sonja’m be kwlaa.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
32 “‘Bé síe Faraɔn nin i sran kpanngban’m be kwlaa, nin be nga b’a wlaman be klɛn’n, ɔ nin be nga be fali tokofi kunnin be’n be likawlɛ. Afin i nun mɔ i ɲin te o su’n, ɔ kleli sran’m be ɲrɛnnɛn.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
Ja ngua lɔ ndɛ mun
^ Ebr., “be nzue ba mun.”
^ Annzɛ “asɔmɔli gbanflɛn mɔ i kɔmin nun ndrɛ’n ti vɔɔ’n.”
^ Ebr., “yɛ á wá yí nzue ba’m be sonjiwlɛ mun.”
^ Atrɛkpa’n, anglo 12 su’n. An nian ndɛ mma 1 nun.
^ Annzɛ “ndia’n.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Atrɛkpa’n, Asiri famiɛn’n i ndɛ yɛ be kan-ɔn.
^ Annzɛ “ndia’n.”
^ Annzɛ “ndia’n.”
^ Annzɛ “ndia’n.”
^ Ebr., “i.”
^ Ebr., “I.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Atrɛkpa’n, safuɲrɛn mɔ be sie be nin be tokofi’n, mɔ be yi be ayɛ’n be ndɛ yɛ be kan-ɔn.
^ Annzɛ “ndia’n.”
^ Annzɛ “kpɛn mun.”
^ Annzɛ “ndia’n.”
