Ezekiɛli 34:1-31
34 Zoova kannin ndɛ kleli min ekun. Ɔ seli kɛ:
2 “Sran wa, kan sa ng’ɔ́ wá jú Izraɛli lɔ bua sunianfuɛ’m be su’n i ndɛ. Kan sa ng’ɔ́ wá jú’n i ndɛ. Se bua sunianfuɛ’m be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Izraɛli lɔ bua sunianfuɛ mɔ be ta be bɔbɔ be wun’n be yako!+ ?Nán bua mun yɛ ɔ fata kɛ bua sunianfuɛ’m be ta be-ɔ?+
3 Amun di nnɛn lui’n, amun wla nnɛn ndrɛ tralɛ. Amun kun nnɛn mɔ w’a lo kpa’n,+ sanngɛ amun manman nnɛn’m be aliɛ.+
4 Amun a yoman naan ng’ɔ ti fakafaka’n w’a ɲan wunmiɛn, amun a yoman ng’ɔ ti tukpacifuɛ’n i ayre, amun a ciciman be nun nga like yaya yoli i’n i kannin’n su, ng’ɔ su wlan daan’n amun a ko fɛmɛn i b’a baman, yɛ ng’ɔ mlinnin’n amun a ko kunndɛmɛn i.+ Sanngɛ amun yoli be kpokokpoko, yɛ amun tinnin be su.+
5 Ɔ maan be bo sanndili afin be leman sunianfuɛ,+ be bo sanndili yɛ be kacili bo’n nun lɔ nnɛn’m be kwlaa be aliɛ.
6 Min bua’m be wlannin daan oka’m be kwlaa nin kpɔlɛ fleiin’m be kwlaa be su. Min bua’m be bo sanndili asiɛ’n wunmuan’n su. Sran fi w’a ɔman be kunndɛlɛ, sran fi w’a kunndɛman kɛ ɔ́ kúnndɛ be naan w’a wun be.
7 “‘“I sɔ’n ti’n, bua sunianfuɛ mun, amun tie ndɛ nga Zoova kan’n.
8 ‘“Ndɛ nga Miɛn Zoova m’ɔ Sie Like Kwlakwla’n kan’n yɛ: ‘N wo lɛ sakpa, min bua’m b’a kaci kɛ nnɛn mɔ be trali be’n sa. B’a kaci bo’n nun lɔ nnɛn’m be kwlaa be aliɛ. Afin be leman sunianfuɛ, yɛ min nnɛn sunianfuɛ mun b’a kunndɛman min bua mun. Sanngɛ be tali be bɔbɔ be wun, b’a manman min bua’m be aliɛ.”’
9 I sɔ’n ti’n, bua sunianfuɛ mun, amun tie ndɛ nga Zoova kan’n.
10 Ndɛ nga Miɛn Zoova m’ɔ Sie Like Kwlakwla’n kan’n yɛ: ‘E nin bua sunianfuɛ mun e le i. Ń má úsa be min bua’m be su sa. Be su nianman min bua’m be lika kun.+ Yɛ bua sunianfuɛ’m be su taman be bɔbɔ be wun kun. Ń má dé min bua mun be nuan nun, yɛ be su diman be kun.’”
11 “‘Afin ndɛ nga Miɛn Zoova m’ɔ Sie Like Kwlakwla’n kan’n yɛ: “Min yɛ n wo yɛ. N bɔbɔ ń má kó kúnndɛ min bua mun, yɛ ń nían be lika.+
12 Ń má nían min bua’m be lika kɛ bua sunianfuɛ kun m’ɔ wunnin i bua mɔ be bo sanndili’n m’ɔ su man be aliɛ’n sa.+ Ɲanmiɛn ble nin aosin tritri cɛn’n nun’n, ń má dé be lika kwlaa nga be bo sanndili be nun lɔ’n be nun.+
13 Ń má kó fá be nvlenvle’m be nun ń fíte, yɛ ń yíayía be mɛnmɛn’m be nun. Kpɛkun ń má fá be ń sá be sin be asiɛ’n su, yɛ ń mán be aliɛ Izraɛli oka’m be su,+ nvle’n nun nzue ba nin lika nga sran’m be tran lɛ’n be kwlaa be wun lɛ.
14 Ń má mán be aliɛ nnɛn didiwlɛ kpa kun nun, yɛ Izraɛli oka fleiin’m be su yɛ bé dídí-ɔ.+ Bé lá lɔ, bé lá nnɛn didiwlɛ kpa kun nun.+ Yɛ bé dídí Izraɛli oka’m be su nnɛn didiwlɛ kpafuɛ’m be nun.”
15 “‘“N bɔbɔ ń má mán min bua’m be aliɛ.+ Yɛ n bɔbɔ ń yó maan bé lá.”+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
16 “Bua ng’ɔ mlinnin’n, ń kó kúnndɛ i,+ ng’ɔ wlan daan’n ń fɛ́ i ń bá. Nga like yaya yoli i’n, ń má cící i kannin’n su, yɛ ng’ɔ ti fakafaka’n ń mɛ́n i wunmiɛn. Sanngɛ be nun nga w’a lo kpa’n annzɛ ɔ le wunmiɛn kpa’n ń núnnún i. Ń fá fɔ bulɛ’n ń mán sran sɔ’n kɛ aliɛ sa.”
17 “‘Sanngɛ min bua mun, amun liɛ’n, amun tie ndɛ nga Miɛn Zoova m’ɔ Sie Like Kwlakwla’n kan’n: “Ń má dí bua kun nin i wiengu bua be afiɛn jɔlɛ. Yɛ ń yó sɔ wie bua ɲin mun, nin boli kpakpuɛ’m be afiɛn.+
18 ?Kɛ amun didi nnɛn didiwlɛ kpakpa’m be nun’n i sɔ’n ɔ juman amun? ?Yɛ nn ngue ti yɛ amun tiatia amun didiwlɛ’m be nun ijre nga be kali lɛ’n be su-ɔ? ?Yɛ kɛ amun ko wie nzue klengle kpafuɛ’n i nɔn’n, ngue ti yɛ amun tiatia nun be yo i fiɛn-ɔn?
19 ?Min bua mun yɛ ɔ fata kɛ be di ijre nga amun tiatiali su’n niɔn? ?Be yɛ ɔ fata kɛ be nɔn nzue mɔ amun tiatiali nun be yoli i fiɛn’n niɔn?”
20 “‘I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan kle be’n yɛ: “Min yɛ n wo yɛ. N bɔbɔ ń má dí bua mɔ w’a lo’n ɔ nin bua m’ɔ ti koklo’n be afiɛn jɔlɛ,
21 afin bua nga be kpinndinman’n, amun fa amun papla nun’n ɔ nin amun wati’n be su be bo. Yɛ amun fa amun wɛ’m be si be, lele be bo sanndi kɔ mmua.
22 Ń má dé min bua mun, be su traman be diman be kun.+ Yɛ ń má dí bua nin bua be afiɛn jɔlɛ.
23 Ń má mán be sunianfuɛ kun,+ yɛle min sufuɛ Davidi,+ ɔ́ mán be aliɛ. I bɔbɔ mán be aliɛ, yɛ ɔ́ káci be sunianfuɛ.+
24 N bɔbɔ min Zoova ń káci be Ɲanmiɛn,+ yɛ min sufuɛ Davidi, ɔ́ káci siefuɛ kun be afiɛn.+ Min bɔbɔ Zoova yɛ n kan sɔ-ɔ.
25 “‘“E nin be é wá trá fɔundi aenguɛ,+ yɛ ń yó maan blo nnɛn wlɛfuɛ wie fi su tranman be mɛn’n nun kun.+ Ɔ maan bé kwlá trán fɔun aawlɛ’n nun, yɛ bé kwlá lá bo’m be nun.+
26 Ń má yrá be bɔbɔ ɔ nin min kpɔlɛ’n i wun lɛ lika’m be su.*+ Ń má yó maan nzue’n wá tɔ́ blɛ ng’ɔ ti su’n i nun. Suyralɛ’n wá gúa kɛ nzue yɛ ɔ su tɔ sa.+
27 Fie’n nun waka’m bé sú mma, yɛ asiɛ’n yó like ye,+ yɛ bé trán mɛn’n nun fɔuun. Kɛ ń má búbú be kɔmin su waka’n nun’n,+ mɔ ń dé be be nga be fali be yoli be kanga’n be sa nun’n, bé wá sí jrɛiin kɛ n ti Zoova.
28 Be su kaciman nnɛn mɔ nvlenvle’m be tra be’n kun, asiɛ’n su blo nnɛn’m be su diman be, bé trán fɔun nun, sran fi su wlaman be ɲin nglonglo.+
29 “‘“Ń má mán be fie kun mɔ i dunman’n wá fú’n, awe’n su kunman be lele be su wuman mɛn’n nun kun,+ yɛ nvlenvle’m be su guaman be ɲin ase kun.+
30 ‘Ɔ maan bé wá sí jrɛiin kɛ min mɔ n ti be Ɲanmiɛn Zoova’n e nin be o nun, naan be kusu mɔ be ti Izraɛli nvle’n nunfuɛ’n be ti min nvle’n nunfuɛ.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”’
31 “‘Amun liɛ’n, min bua mun,+ bua mɔ n nian be lika’n, amun ti klɔ sran ngbɛn, yɛ n ti amun Ɲanmiɛn.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
Ja ngua lɔ ndɛ mun
^ Be kwla se ekun kɛ “Be dunman nun’n sran’m be liɛ yó ye.”
