Ezekiɛli 4:1-17
4 “Sanngɛ sran wa, ɔ liɛ’n, fa bliki kun naan fa sie ɔ ɲrun lɛ. Yi Zerizalɛmun klɔ’n i desɛn su.
2 Fa alɛ wla klɔ’n i sin,+ kplɛn i wun alɛ kunlɛ talɛ kun,+ kplɛn i wun alɛ kunlɛ like fleiin kun,+ bo i wun nanmue, yɛ fa waka nɔnninnɔnnin nga be fa bubu talɛ mun’n fa siesie i wun tɛɛn.+
3 Fa puali kun mɔ blalɛ yɛ be fa yoli’n, kpɛkun fa sie i wɔ nin klɔ’n amun afiɛn kɛ talɛ wie mɔ blalɛ yɛ be fa yoli’n sa. I sin’n, nian klɔ’n i siin. Bé wá fá alɛ wlá klɔ’n i sin, wɔ yɛ á fá alɛ wlɛ́ i sin-ɔn. Ɔ ti Izraɛli nvle’n i nzɔliɛ like.+
4 “I sin’n, la ɔ sa bɛ’n su, kpɛkun fa Izraɛli nvle’n i sa tɛ’n fa sie ɔ* su.+ Blɛ kwlaa nga á lá ɔ sa’n su’n, á súa be sa tɛ’n.
5 “Ń má sé wɔ kɛ a yo i sɔ cɛn ba ya nsan ablangwlan (390). Blɛ sɔ’n ɔ nin afuɛ nga be dili i sa tɛ yolɛ nun’n be sɛ.+ Kpɛkun wɔ yɛ á wá súa Izraɛli nvle’n i sa tɛ’n niɔn.
6 Yɛ ɔ fata kɛ a yo i sɔ lele guɛ i bo.
“I sin’n, á wá lá ekun, sanngɛ á wá lá ɔ sa fama’n su. Á wá súa Zida nvle’n+ i sa tɛ’n cɛn ba ablanan (40). Cɛn ba kun ti afuɛ kun, cɛn ba kun ti afuɛ kun. Like nga n seli wɔ kɛ a yo’n yɛ ɔ o lɛ-ɔ.
7 Kpɛkun ɲɔnɲɔn ɔ tralɛ’n i sa mun naan kpɛ ɔ ɲin Zerizalɛmun klɔ mɔ b’a fa alɛ b’a wlɛ i sin’n+ i su lɔ. Ɔ fata kɛ a kan sa ng’ɔ́ wá jú i su’n i ndɛ.
8 “Nian! Ń má fá ɲanman ń cí wɔ, i liɛ’n a su kwlá kpɛman ɔ wun laman ɔ bue uflɛ su lele saan cɛn ng’ɔ fata kɛ a fa utu klɔ’n w’a wie.
9 “Yɛ fa ble, nin ɔɔzu, nin alowa, nin lantii, nin mile, nin epotri, kpɛkun fa be guɛ i like kun nun naan fa be yo kpanwun naan di. Afin kɛ á wá lá ɔ sa’n su cɛn ba ya nsan ablangwlan’n (390), like nga á wá dí’n yɛ ɔ o lɛ-ɔ.+
10 Cɛn ba kun nun’n sunnzun aliɛ sikli ablaɔn (20)* naan di. Di i blɛ trele wie’m be su.
11 “Yɛ sunnzun nzue nga á wá nɔ́n’n, maan ɔ yo inin kun* mɔ be bubu nun nsiɛn’n i bue kun. Nɔn i blɛ trele wie’m be su.
12 “Di kpanwun sɔ’n kɛ nga a fa di ɔɔzu kpanwun kukluku’n sa. Fa sran wakasu mɔ w’a wu kee’n fa trɔ sin naan tɔn i be ɲin bo lɛ.”
13 Zoova seli min ekun kɛ: “Kɛ ń má yó maan Izraɛlifuɛ’m bé bó sánndi nvlenvle’m be nun’n, bé wá dí kpanwun fiɛn kɛ ngalɛ’n sa.”+
14 Yɛ n seli kɛ: “Ee, min Min Zoova, wɔ mɔ a Sie Like Kwlakwla’n, nán maan ɔ yo sɔ! Afin kɛ ɔ fɛ i min kaan nun lele andɛ’n, n nin-a diman nnɛn m’ɔ wu i sa su’n, ɔ nin nnɛn mɔ blo nnɛn wie titili i nun’n wie le, naan m’an wlu fiɛn nun.+ Nnɛn ng’ɔ ti fiɛn’n i wie nin-a kanman min nuan le.”+
15 Ɔ maan ɔ seli min kɛ: “N tili, ń má mán ɔ atin naan a fa nannin wakasu fa kaci sran wakasu’n, yɛ tɔn ɔ kpanwun’n su.”
16 I sin’n, ɔ seli min kɛ: “Sran wa, ń má yó maan Zerizalɛmun klɔ’n nun aliɛ’n ɔ́ wíe.*+ Yɛ aliɛ nga be sunnzun yɛ be di’n, kɛ bé dí’n bé kókó dan.+ Yɛ kɛ bé nɔ́n nzue nga be sunnzun yɛ be nɔn’n, srɛ dan kpa kún be.+
17 Sa sɔ’n wá jú, i liɛ’n aliɛ nin nzue mɔ be su ɲɛnmɛn i’n ti’n, bé nían be wiengu yɛ be nuan bó be wun, yɛ bé yó koklo be fɔnlɛ’n ti.
Ja ngua lɔ ndɛ mun
^ Ebr., “ɔ,” yɛle kɛ, Ezekiɛli i sa bɛ su.
^ Ebr., “ń búbú kpanwun waka mun.” Atrɛkpa’n, waka mɔ be fa kpanwun be fa wlawla su be sie’n i ndɛ yɛ be kan-ɔn.
