Ezekiɛli 44:1-31
44 Ɔ fa min sali min sin Ɲanmiɛn sua’n i awlo klun dan’n i anuan ng’ɔ o wia afiliɛ bue liɛ’n su lɔ’n i wun lɔ.+ Anuan sɔ’n ti ɲinwa.+
2 I sin’n, Zoova seli min kɛ: “Anuan ng’ɔ ti ɲinwa yɛ’n, ɔ́ ká sɔ titi. Afin Zoova m’ɔ ti Izraɛli Ɲanmiɛn’n ɔ sinnin nun.+ Be su tikeman, yɛ klɔ sran fi su sinman nun. Ɔ maan kɛ b’a ɲin i yɛ’n, ɔ́ ká sɔ titi.
3 Sanngɛ siefuɛ’n ɔ́ trán anuan’n nun lɛ ɔ́ dí i kpanwun’n Zoova ɲrun,+ afin ɔ ti siefuɛ. Ɔ́ sín anuan’n i ɲrun lɛ lika fleiin nga be sin i bo’n i nun yɛ ɔ́ wlú-ɔ, kpɛkun ɔ́ sín lɛ yɛ ɔ́ fíte-ɔ.”+
4 I sin’n, ɔ fali min sinnin nglo lɔ anuan’n nun, kpɛkun ɔ fali min ɔli Ɲanmiɛn sua’n i ɲrun lɔ. Kɛ n wo lɛ ń nían’n, n wunnin kɛ Zoova i aɲrunɲan’n w’a yi Zoova i sua’n.+ Ɔ maan n kotoli n utuli min ɲin ase.+
5 Kpɛkun Zoova seli min kɛ: “Sran wa, nian, yɛ sie ɔ su tie Zoova i sua’n i su ndɛ’n, ɔ nin i su mmla’n be su ndɛ kwlaa nga n kan kle wɔ’n i kpa. Fa ɔ ɲin sie su kpa.* Fa ɔ ɲin sie i Ɲanmiɛn sua’n i wluwlɛ’n su kpa, yɛ fa ɔ ɲin sie i lika m’ɔ ti Ɲanmiɛn liɛ klonglo’n i lika nga be sin lɛ be fite’n be kwlaa be su kpa.+
6 Ɔ fata kɛ a se Izraɛli nvle’n nunfuɛ mɔ be ɲin su ti kekle’n be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ee, Izraɛli nvle’n nunfuɛ mun, amun tete sa mun b’a flan min!
7 Kɛ amun fa aofuɛ mɔ b’a wlaman be awlɛn’n nin be wunnɛn’n be klɛn’n be ba min sua’n nun’n, be yo min sua’n i finfin. Amun fa min kpanwun, nin nnɛn lui’n, nin mmoja’n be ba min ɲrun, kusu nn amun tete sa’m be kwlaa be ti’n, min aenguɛ’n w’a saci.
8 Amun a nianman ninnge nga be ti min liɛ klonglo’n be lika.+ I kpa bɔbɔ’n, amun fali sran uflɛ mun naan be di min sua’n nun junman mun.”’
9 “‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Nán maan Izraɛli nvle’n nun aofuɛ nga b’a wlaman be awlɛn’n nin be wunnɛn’n be klɛn’n be wlu min sua’n nun.”’
10 “‘Kɛ Izraɛlifuɛ’m be kacili be sin sili min mɔ be suli be amuin mɔ be ti like kain’n* be su’n, Levifuɛ nga be kacili be sin sili min+ wie’n, bé wá wún be sa tɛ’n i su afɛ’n.
11 Bé wá káci min sua nun lɔ junman difuɛ, bé nían min sua’n i anuan’m be su,+ yɛ bé dí junman min sua’n nun lɔ. Bé wá kún nnɛn nga be fa yi tɛ nga kɛ bé yí’n be yra nnɛn’n i kɔlikɔli’n, ɔ nin nnɛn nga be fa yi tɛ onga mun’n bé mán nvlefuɛ mun. Bé wá jrán nvlefuɛ’m be ɲrun bé dí junman mán be.
12 Be jrannin be amuin mɔ be ti like kain’n be ɲrun be dili junman mannin be, yɛ be kacili kɛ yɔbuɛ mɔ be ja kpla su’n sa, be yoli maan Izraɛli nvle’n nunfuɛ’m be yoli sa tɛ.+ I sɔ’n ti’n, n mannin min sa’n su n tali nda: Bé wá wún be sa tɛ’n i su afɛ’n.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
13 ‘Be su baman min ɲrun be diman Ɲanmiɛn ɲrun jranlɛ junman’n kun. Yɛ be su mantanman ninnge nga be ti min liɛ klonglo’n, annzɛ ninnge nga be ti be liɛ ngunmin mɔ be ti min liɛ klonglo’n be kun. Tete ninnge nga be yoli be’n ti’n, bé wá wún ɲannzuɛn dan.
14 Sanngɛ ń má fá min sua’n nun lɔ junman’n ń wlá be sa nun, bé dí i nun lɔ junman’n, bé yó like kwlaa ng’ɔ fata kɛ be yo i lɔ’n.’+
15 “‘Levifuɛ nga be ti Ɲanmiɛn ɲrun jranfuɛ’n, mɔ be ti Zadɔku i mma+ mun’n, mɔ kɛ Izraɛlifuɛ’m be kacili be sin sili min’n,+ be dili min sua’n nun junman mun’n, bé wá bá min ɲrun bé dí junman bé mán min. Bé wá jrán min ɲrun bé fá nnɛn lui’n+ nin mmoja’n+ bé mán min.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
16 ‘Be yɛ bé wá wlú min sua’n nun lɔ-ɔ, bé wúnnge min tabli’n i wun lɔ bé dí junman mán min.+ Bé dí junman ng’ɔ fata kɛ be di man min’n.+
17 “‘Kɛ bé bá awlo klun kaan’n i anuan’m be nun lɛ’n, maan be wla lɛn tralɛ.+ Kɛ bé dí junman awlo klun kaan’n i anuan’m be nun lɛ’n, annzɛ i klun lɔ’n, nán maan be wla nnɛn ndrɛ tralɛ.
18 Ɔ fata kɛ be fa tannin tanmue be bo be ti, yɛ be wla lɛn cɛkoto be fa kata be bo.+ Nán be wla like wie fi m’ɔ kwla yo maan nvufle tu be’n.
19 Ka naan b’a fite b’a wɔ awlo klun dan’n nun lɔ’n, awlo klun dan mɔ nvlefuɛ’m be o nun lɔ’n nun’n, ɔ fata kɛ be yi be junman dilɛ tralɛ mun+ naan be fa be sie i like diwlɛ* mɔ be ti Ɲanmiɛn liɛ klonglo’n be nun lɔ.+ I sin’n, maan be wla tralɛ uflɛ. I liɛ’n, be tralɛ’m be su yoman naan sanwun yolɛ’n w’a sa nvlefuɛ mun.*
20 Ɔ fataman kɛ be kpu be ti’n su,+ annzɛ be yaci be ti ndrɛ’n i lɛ naan ɔ yo tɛnndɛn. Ɔ fata kɛ be kpɛkpɛ be ti’n su.
21 Kɛ Ɲanmiɛn ɲrun jranfuɛ’m bé wlú awlo klun kaan’n nun lɔ’n, ɔ fataman kɛ be nɔn duvɛn.+
22 Ɔ fataman kɛ be ja angbeti bla, annzɛ bla kun mɔ i wun yrɛli i’n.+ Sanngɛ be kwla ja Izraɛli osu’n nun bla kun m’ɔ nin-a siman bian’n, annzɛ Ɲanmiɛn ɲrun jranfuɛ kun i angbeti’n.’+
23 “‘Ɔ fata kɛ be kle min nvlefuɛ mun ngbaciɛ ng’ɔ o like ng’ɔ ti Ɲanmiɛn liɛ klonglo’n nin ng’ɔ timɛn i liɛ klonglo’n be afiɛn’n. Yɛ ɔ fata kɛ be kle be ngbaciɛ ng’ɔ o like ng’ɔ ti sanwun’n, ɔ nin like ng’ɔ timan sanwun’n be afiɛn’n.+
24 Sɛ ndɛ tɔ’n, be yɛ ɔ fata kɛ be di ndɛ’n niɔn.+ Maan be nian min mmla’m be su be di ndɛ’n.+ Ɔ fata kɛ be nanti min cɛn’m+ be kwlaa be su mmla mun nin be su ndɛ nga n kan’n su, yɛ be bu min wunmiɛn-lolɛ-cɛn mun be cinnjin.
25 Ɔ fataman kɛ be wunnge sran fi i fuɛn’n i wun lɔ, sɛ be yo sɔ’n bé wlú fiɛn nun. Sanngɛ sɛ ɔ ti be si, annzɛ be nin, annzɛ be wa yasua, annzɛ be wa bla, annzɛ be niaan bian, annzɛ be niaan bla m’ɔ leman bian’n, i liɛ’n be kwla wlu fiɛn nun.+
26 Kɛ be ko yo Ɲanmiɛn ɲrun jranfuɛ kun i sanwun ko wie’n, ɔ fata kɛ ɔ minndɛ cɛn nso.
27 Cɛn ng’ɔ wlu lika m’ɔ ti Ɲanmiɛn liɛ klonglo’n nun lɔ’n, yɛle kɛ awlo klun kaan’n nun lɔ’n, naan ɔ́ kó dí junman lika m’ɔ ti Ɲanmiɛn liɛ’n klonglo’n nun lɔ’n, ɔ fata kɛ ɔ yi i sa tɛ’n i ti tɛ.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
28 “‘Yɛ be aja like nga bé ɲɛ́n i’n yɛ: N bɔbɔ min yɛ n ti be aja like liɛ’n niɔn.+ Ɔ fataman kɛ amun man be asiɛ Izraɛli nvle’n nun, afin n bɔbɔ min yɛ n ti be asiɛ liɛ’n niɔn.
29 Be yɛ bé dí ble annzɛ i wunsu like mɔ be fa man min’n,+ ɔ nin nnɛn nga be fa yi sa tɛ’n i ti tɛ’n, nin sa tɛ’n i ti kpatalɛ tɛ’n+ niɔn. Kpɛkun like kwlaa nga be fa man min Izraɛli nvle’n nun m’ɔ ti min liɛ mlɔnmlɔn’n, ɔ́ káci be liɛ.+
30 Amun ninnge’m be su mma klikli’m be kwlaa be nun kpakpa mun, ɔ nin ninnge wafawafa kwlaa nga amun fa man min’n, bé yó Ɲanmiɛn ɲrun jranfuɛ’m be liɛ.+ Amun fa amun ninnge’m be mma klikli’n be sanmlɛn klikli ng’ɔ timan mlɛnnɛnnɛn’n be man Ɲanmiɛn ɲrun jranfuɛ mun.+ Sɛ amun yo sɔ’n, amun awlo’n nunfuɛ’m be liɛ yó ye.+
31 Ɔ fataman kɛ Ɲanmiɛn ɲrun jranfuɛ’m be di anunman annzɛ nnɛn ng’ɔ wu i sa su’n, annzɛ nga nnɛn wie titili i nun’n.’+
Ja ngua lɔ ndɛ mun
^ Ebr., “fa ɔ awlɛn’n sie su.”
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Annzɛ “sua ba mun.”
^ Ebr., “I liɛ’n, be su faman be tralɛ’m be yoman nvlefuɛ’m be sanwun.”
