Ezekiɛli 45:1-25
45 “‘Kɛ amún wá cɛ́cɛ́ nvle’n nun naan ɔ yo aja like’n,+ ɔ fata kɛ amun man Zoova i lika kun m’ɔ ti i liɛ ngunmin’n nvle’n nun.+ Maan i tɛnndɛn nun’n yo kude* akpiakpi ablaɔn-nin-nnun (25.000), yɛ maan i tɛtrɛ nun’n yo kude akpiakpi blu (10.000).+ Lika sɔ’n i wunmuan’n ɔ́ yó lika kun m’ɔ ti i liɛ ngunmin-ɔn.
2 Maan lika kun m’ɔ ti Ɲanmiɛn liɛ klonglo’n ɔ tran lika sɔ’n i afiɛn. Maan i bue nnan mun be sɛ, maan be tinuntinun be yo kude ya nnun (500),+ yɛ maan nnɛn didiwlɛ lika mɔ be tinuntinun be tɛtrɛ nun’n ti kude ablenun’n (50), be bo sin yia lika’n.+
3 Sunnzun lika kun lika m’ɔ ti Ɲanmiɛn liɛ klonglo’n nun, maan i tɛnndɛn nun’n yo kude akpiakpi ablaɔn-nin-nnun (25.000), yɛ maan i tɛtrɛ nun’n yo kude akpiakpi blu (10.000). Lika sɔ’n nun yɛ Ɲanmiɛn i sua’n ɔ́ trán-ɔn, ɔ ti i liɛ ngunmin, yɛ ɔ ti Ɲanmiɛn liɛ klonglo.
4 Nvle’n i lika sɔ m’ɔ ti i liɛ ngunmin’n, ɔ́ yó Ɲanmiɛn ɲrun jranfuɛ mɔ be di junman Ɲanmiɛn i sua’n nun’n, mɔ be kɔ Zoova ɲrun be ko di junman be mɛn i’n+ be liɛ.+ Ɔ́ yó be sua’m be kplanlɛ lika, yɛ ɔ́ yó Ɲanmiɛn i sua’n i lika m’ɔ ti i liɛ ngunmin-ɔn.
5 “‘Levifuɛ mɔ be di junman Ɲanmiɛn sua’n nun lɔ’n, bé ɲán lika kun, i tɛnndɛn nun’n yó kude akpiakpi ablaɔn-nin-nnun (25.000), i tɛtrɛ nun’n yó kude akpiakpi blu (10.000),+ yɛ bé ɲán like diwlɛ*+ ablaɔn (20).
6 “‘Ɔ fata kɛ amun fa lika kun mɔ i tɛnndɛn nun’n ti kude akpiakpi ablaɔn-nin-nnun’n (25.000) (ɔ nin lika m’ɔ ti Ɲanmiɛn liɛ klonglo’n be mantan su), mɔ i tɛtrɛ nun’n ti kude akpi nnun’n (5.000) be man klɔ’n.+ Ɔ́ yó Izraɛli nvle’n nunfuɛ’m be kwlaa be liɛ.
7 “‘Siefuɛ’n i lika’n ɔ́ trán lika m’ɔ ti Ɲanmiɛn liɛ klonglo’n, ɔ nin lika m’ɔ ti klɔ’n i liɛ’n be bue nɲɔn’m be su. I lika’n mántan lika m’ɔ ti Ɲanmiɛn liɛ klonglo’n, ɔ nin lika m’ɔ ti klɔ’n i liɛ’n. I lika’n i bue trán wia atɔliɛ lɔ, yɛ bue trán wia afiliɛ lɔ. Kɛ ɔ fɛ i wia atɔliɛ lɔ awɛ’n su m’ɔ́ fá jú wia afiliɛ lɔ awɛ’n su’n, lika’n i tɛnndɛn nun’n nin akpasua nga be o i wun lɛ’n be liɛ’n bé yó kun.+
8 Lika sɔ’n ɔ́ yó siefuɛ’n i liɛ Izraɛli nvle’n nun. Min siefuɛ mun be su yoman min nvle’n nunfuɛ’m be tɛtɛ kun.+ Bé nían Izraɛli nvle’n nunfuɛ’m be akpasua’m be su yɛ bé mán be lika’n niɔn.’+
9 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Izraɛli siefuɛ mun, amun sa tɛ’n w’a yo dan w’a tratra su!
“‘Amun yaci nzaje sa mun, ɔ nin sran’m be yalɛ klelɛ’n, yɛ amun yo sa ng’ɔ ti su’n ɔ nin sa ng’ɔ ti kpa’n.+ Amun yaci min nvlefuɛ’m be ninnge’m be delɛ.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
10 ‘Maan amun toe’m be yo sɛsɛ, maan efa nga amun fa sunnzun ninnge mun’n* be yo sɛsɛ, yɛ maan bati nga amun fa sunnzun ninnge mun’n* be yo sɛsɛ.+
11 Maan efa’n nin bati’n be sɛ. Maan bati kun yo ɔmɛɛ* kun mɔ be bubuli nun blu’n i bue kun, yɛ maan efa kun yo ɔmɛɛ kun mɔ be bubuli nun blu’n i bue kun. Ɔmɛɛ’n su yɛ be nian be sunnzun-ɔn.
12 Maan sikli’n+ yo gera ablaɔn (20). Yɛ kɛ be fa sikli ablaɔn (20) be uka sikli ablaɔn-nin-nnun (25) su’n, mɔ be fa sikli blu-nin-nnun (15) be uka su’n, maan amun bu i mane kun.’*
13 “‘Like ng’ɔ fata kɛ amun fa man’n yɛ: Ble ɔmɛɛ kun nun’n, amun fa efa kun mɔ be bubuli nun nsiɛn’n i bue kun, yɛ ɔɔzu ɔmɛɛ kun nun’n, amun fa efa kun mɔ be bubuli nun nsiɛn’n i bue kun.
14 Ngo ng’ɔ fata kɛ be fa man’n, bati’n su yɛ ɔ fata kɛ be nian naan b’a man-ɔn. Bati’n ti kɔɔ kun* mɔ be bubuli nun blu’n i bue kun, yɛ bati blu ti ɔmɛɛ kun, afin bati blu nin ɔmɛɛ kun be sɛ.
15 Izraɛli lɔ nnɛn’m be nun’n, sɛ be bubu be bua’m be nun ya nɲɔnnɲɔn’n, bua ya nɲɔn (200) kwlaa su’n, maan be fa kun be man. Ɔ́ wá yó ble annzɛ i wunsu like mɔ be fa man Ɲanmiɛn’n,+ ɔ nin tɛ nga kɛ bé yí’n be yra nnɛn’n i kɔlikɔli’n,+ ɔ nin bo kun yolɛ tɛ’n+ be liɛ. Bé wá fá kpáta nvlefuɛ’m be ti.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
16 “‘Nvle’n nunfuɛ’m be kwlaa bé wá yí ninnge sɔ mun+ bé mán Izraɛli siefuɛ’n.
17 Sanngɛ cɛn dilɛ blɛ’m be nun’n,+ nin anglo le kun mun nin Wunmiɛn-lolɛ-cɛn’m be nun’n,+ ɔ nin Izraɛli nvle’n nunfuɛ’m be cɛn nga be di be titi’n be kwlaa be nun’n,+ siefuɛ’n yɛ ɔ́ mán nnɛn nga bé fá yí tɛ nga kɛ bé yí’n be yra nnɛn’n i kɔlikɔli’n,+ nin ble annzɛ i wunsu like mɔ be fa man Ɲanmiɛn’n,+ nin nzan nga be guɛ i tɛ yiwlɛ’n su’n niɔn. I yɛ ɔ́ mán sa tɛ’n i ti tɛ’n i nnɛn’n, ɔ nin ble annzɛ i wunsu like mɔ be fa man Ɲanmiɛn’n, ɔ nin tɛ nga kɛ bé yí’n be yra nnɛn’n i kɔlikɔli’n i nnɛn’n, ɔ nin bo kun yolɛ tɛ’m be nnɛn mun-ɔn. Bé fá kpáta Izraɛli nvle’n nunfuɛ’m be ti.’
18 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Anglo klikli’n nun’n, anglo i cɛn ba klikli’n nun’n, ɔ fata kɛ a fa nnɛn’m be nun nannin gbanflɛn kun mɔ lɛ nunmɛn i wun’n, kpɛkun ɔ fata kɛ a yo Ɲanmiɛn i sua’n i sanwun.+
19 Ɲanmiɛn ɲrun jranfuɛ’n fá nnɛn nga bé fá yí sa tɛ’n i ti tɛ’n i mmoja’n wie fá klíklí Ɲanmiɛn sua’n i anuan’n i kadri’m be su,+ ɔ́ fá wie klíklí tɛ yiwlɛ’n i nuan su’n i cɔnjɔ nnan’m be su, kpɛkun ɔ́ fá wie klíklí awlo klun kaan’n i anuan’n i kadri’m be su.
20 Like ng’ɔ fata kɛ a yo man sran ng’ɔ fɔnnin m’ɔ yoli sa tɛ’n, annzɛ ɔ siman kɛ sa ng’ɔ yoli’n ti tɛ’n,+ anglo’n i cɛn ba nso su’n yɛ ɔ o lɛ-ɔ. Yɛ ɔ fata kɛ amun yi tɛ fa kata sa tɛ’n su naan Ɲanmiɛn sua’n yo sanwun.+
21 Anglo klikli’n nun’n, anglo’n i cɛn ba blu-nin-nnan (14) su’n, amun di Delɛ Cɛn’n.+ Amun fa cɛn nso be di kpanwun mɔ levii nunman nun’n.+
22 Cɛn sɔ’n nun’n, siefuɛ’n mán nannin gbanflɛn kun naan be fa yi sa tɛ’n i ti tɛ, i bɔbɔ nin nvle’n nunfuɛ’m be kwlaa be liɛ.+
23 Cɛn nso nga bé fá dí cɛn’n be nun’n, ɔ́ mán nannin gbanflɛn nso mɔ lɛ nunman be wun’n, ɔ nin bua ɲin nso mɔ lɛ nunman be wun’n, naan be fa yi tɛ nga kɛ bé yí’n be yra nnɛn’n i kɔlikɔli’n be man Zoova, cɛn nso’m be kwlaa be nun.+ Ɔ́ mán boli yasua kun naan be fa yi sa tɛ’n i ti tɛ cɛn kwlaa.
24 Asa ekun’n, ɔ fata kɛ ɔ fa ble annzɛ i wunsu like mɔ be fa man Ɲanmiɛn’n efa kun naan ɔ fa uka nannin gbanflɛn kwlaa su, yɛ ɔ fa efa kun ɔ fa uka bua kwlaa su, yɛ maan ɔ fa ngo inin* kun ɔ fa uka efa kwlaa su.
25 Anglo nso’n su’n, anglo’n i cɛn ba blu-nin-nnun (15) su’n, cɛn nso nga bé dí cɛn’n be nun’n,+ ɔ fata kɛ ɔ man nnɛn nga bé fá yí sa tɛ’n i ti tɛ’n, ɔ nin nga bé fá yí tɛ nga kɛ bé yí’n be yra nnɛn’n i kɔlikɔli’n, ɔ nin ble annzɛ i wunsu like mɔ bé fá mán Ɲanmiɛn’n, ɔ nin ngo.’”
Ja ngua lɔ ndɛ mun
^ Annzɛ “sua ba.”
