Ezekiɛli 6:1-14
6 Zoova kannin ndɛ kleli min ekun. Ɔ seli min kɛ:
2 “Sran wa, kpɛ ɔ ɲin Izraɛli oka’m be su lɔ, kpɛkun kan sa ng’ɔ́ wá jú be su’n i ndɛ.
3 Ɔ fata kɛ a se be kɛ: ‘Ee, Izraɛli oka mun, amun tie ndɛ nga Miɛn Zoova m’ɔ Sie Like Kwlakwla’n ɔ kan’n. Ndɛ nga Miɛn Zoova m’ɔ Sie Like Kwlakwla’n kan kle oka mun, nin kpɔlɛ mun nin nzue ba mun ɔ nin kongo mun’n yɛ: “Amun nian! Ń má súnman tokofi kun amun sin, kpɛkun ń sáci amun lika nglonglo mun.
4 Bé wá búbú amun tɛ yiwlɛ mun mlɔnmlɔn. Bé búbú amun ansan yrawlɛ mun,+ kpɛkun ń tó amun sran nga be wuli mun be fuɛn mun ń gúa be amun amuin mɔ be ti like kain’n*+ be ɲrun lɛ.
5 Ń má tó Izraɛlifuɛ’m be fuɛn mun ń gúa be amuin mɔ be ti like kain’n be ɲrun lɛ, kpɛkun ń sánndi amun owie’m be nun tɛ yiwlɛ’n i wun tɛɛn sín yía nun.+
6 Lika kwlaa nga amun tran lɛ’n bé búbú amun klɔ mun,+ bé sáci amun lika nglonglo mun mlɔnmlɔn, yɛ bé ká kɛ ngalɛ’n sa.+ Bé sáci amun tɛ yiwlɛ mun mlɔnmlɔn, bé fúfú be nun, bé núnnún amun amuin mɔ be ti like kain’n. Bé kpɛ́ amun ansan yrawlɛ’m be bo, kpɛkun bé núnnún ninnge nga amun yoli be’n be kwlaa.
7 Be nga bé kún be’n bé tɔ́ amun afiɛn lɛ,+ yɛ amún wá sí jrɛiin kɛ n ti Zoova.+
8 “‘“Sanngɛ ń má yáci wie’m be lɛ, afin kɛ amún wá bó sánndi mɛnmɛn’m be nun nin nvlenvle’m be nun’n, be su faman tokofi kunman amun nun wie mun.+
9 Be nga bé ká lɛ’n be wla kpɛ́n min su nvlenvle’m be nun lɔ, kan be trali be ɔli lɔ’n.+ Bé wá wún i wlɛ kɛ kɛ be kacili be sin be sili min’n, mɔ be ɲin trannin amuin mɔ be ti like kain’n be sin’n,+ min awlɛn’n kpɔtɔli min klun.+ Sa tɛtɛ nin tete sa nga be yoli be’n bé kún be ɲannzuɛn, kpɛkun bé yó be kain.+
10 Bé wá sí jrɛiin kɛ n ti Zoova, naan sa yaya nga n seli kɛ ń fá yí be su’n ɔ timan ndɛ kanlɛ sa ngbɛn.”’+
11 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Bo ndɛ, yɛ sisi ɔ ja’m be ase, kpɛkun sa tɛtɛ nin tete sa nga Izraɛli nvle’n nunfuɛ’m be yoli’n ti’n bo awuyomo, afin tokofi’n nin awe’n, ɔ nin tukpacɛ m’ɔ sa ndɛndɛ’n bé kún be.+
12 Sran ng’ɔ o mmua’n tukpacɛ m’ɔ sa ndɛndɛ’n ɔ́ kún i, sran ng’ɔ o koko’n tokofi’n kún i, yɛ sran nga tukpacɛ m’ɔ sa ndɛndɛ’n nin tokofi’n b’a kunmɛn i naan ɔ ka lɛ’n awe’n ɔ́ kún i. Ń má fá min ya’n i kwlaa ń gúa be su.+
13 Kɛ bé wá wún kɛ be sran nga be kunnin be’n be lala be amuin mɔ be ti like kain’n be afiɛn’n, nin be tɛ yiwlɛ’m be wun’n,+ ɔ nin kpɔlɛ nglonglo’m be kwlaa be su’n, nin oka’m be kwlaa be ti su nglo’n, nin waka kwlaa nga be le nɲa kpanngban’n be bo’n, ɔ nin waka dandan’m be sa mma’m be bo’n, kan be yi tɛ m’ɔ bɔn fanninfannin lɛ be man be amuin mɔ be ti like kain’n+ be kwlaa naan be klun jɔ be wun’n, bé wá sí jrɛiin kɛ n ti Zoova.+
14 Ń má tínngɛ min sa’n nun be wun, yɛ ń yó maan mɛn’n tɔ́ srolo. Lika kwlaa nga be tran lɛ’n ɔ́ tɔ́ srolo trá aawlɛ flɛnnɛn ng’ɔ o Dibla i wun lɛ’n. Yɛ bé wá sí jrɛiin kɛ n ti Zoova.’”
Ja ngua lɔ ndɛ mun
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
