Ezekiɛli 8:1-18
8 Afuɛ nsiɛn’n su’n, anglo nsiɛn’n i cɛn ba nnun’n su mɔ n ti min awlo lɔ’n, mɔ Zida kpɛnngbɛn’m be titi min ɲrun lɛ’n, min Min Zoova m’ɔ Sie Like Kwlakwla’n ɔ fɛli i sa’n trali min lɛ.
2 Kɛ ń nían’n, n wunnin like kun m’ɔ ti kɛ sran sa’n, i wafa’n ti kɛ sin sa. Kɛ ɔ fɛ i like m’ɔ ti kɛ i afiɛn sa’n su m’ɔ́ fá jrá’n, sin o lɛ.+ Kɛ ɔ fɛ i i afiɛn m’ɔ́ fá fú nglo’n, ɔ kpaja kpa. Ɔ bo mianmian kɛ sika ɔkwlɛ mɔ be sɛnngɛnnin i nin sika’n sa.+
3 I sin’n, ɔ tinngɛli like m’ɔ ti kɛ i sa sa’n nun, kpɛkun ɔ sɔli min ti ndrɛ’n. Aolia nun like nga Ɲanmiɛn yili i nglo kleli min’n nun’n, wawɛ kun mannin min su ɔli asiɛ’n nin ɲanmiɛn m’ɔ la nglo lɔ plaii’n be afiɛn’n nun. Ɔ fali min ɔli Zerizalɛmun, awlo klun kaan’n i anuan+ nga i ɲin kpɛ nglo lɔ lika’n nun’n i nun lɔ, kan kwla silɛ amuin’n i nzɔliɛ mɔ maan be si kwla’n ɔ taka lɛ’n.+
4 Kpɛkun ń nían-ɔn, Izraɛli Ɲanmiɛn’n i aɲrunɲan’n yɛ ɔ o yɛ.+ Ɔ ti kɛ like nga n wunnin i lika kpɛtɛkplɛɛ’n nun lɔ’n sa.+
5 I sin’n ɔ seli min kɛ: “Sran wa, yaci man ɔ ɲin su nian nglo lɔ lika’n nun lɔ.” Ɔ maan n mannin min ɲin su n niannin nglo lɔ lika’n nun. Kɛ ń nían tɛ yiwlɛ’n i anuan ng’ɔ kpɛ nglo lɔ lika’n nun’n, n wunnin kɛ kwla silɛ’n i nzɔliɛ like sɔ’n ɔ o anuan’n nun lɛ.
6 Ɔ seli min kɛ: “?Sran wa, a wun ninnge tɛtɛ nin tete ninnge nga Izraɛli nvle’n nunfuɛ’m be yo be wa+ mɔ be ti’n n jaso min sua’n nun lɛ n kɔ mmua’n?+ Sanngɛ á wá wún tete ninnge uflɛ wie mun ekun mɔ be tɛ tra ngalɛ’n niɔn.”
7 I sin’n, ɔ fali min ɔli awlo klun’n i anuan’n nun lɔ, yɛ kɛ ń nían’n n wunnin buɛ kun talɛ’n nun.
8 Ɔ seli min kɛ: “Sran wa, yaci fiti talɛ’n.” Ɔ maan n fitili talɛ’n, yɛ n wunnin wluwlɛ kun.
9 Ɔ seli min kɛ: “Wlu lɔ naan nian ninnge tɛtɛ nin tete ninnge nga be yo be wa’n.”
10 Ɔ maan n wluli lɔ naan ń nían, yɛ n wunnin nnɛn wafawafa kwlaa nga be cuɛn be wun ase’n,+ ɔ nin nnɛn kainkain mun, nin amuin mɔ be ti like kainkain’m* be kwlaa be nzɔliɛ mɔ Izraɛli nvle’n nunfuɛ’m be yoli’n.+ Be yili be desɛn mun talɛ’n su tɛɛn.
11 Izraɛli nvle’n nun kpɛnngbɛn ableso (70) be jinjin be ɲrun lɛ. Zaazania i wa Safan+ o be nun wie. Kpongbo mɔ be yra ansan nun’n ɔ o be sa nun sɛsɛsɛ. Yɛ ansan nga be yrɛ i’n, i wunsre m’ɔ bɔn fannin’n ɔ fu kɔ nglo.+
12 Ɔ seli min kɛ: “?Sran wa, a wun like nga Izraɛli nvle’n nun kpɛnngbɛn’m be tinuntinun be yo i aosin nun, sua ba nga be o be sua’m be klun mmua kpa’n be nun, kan be amuin’m be o lɛ’n? Afin be se kɛ: ‘Zoova wunman e, Zoova w’a jaso nvle’n nun.’”+
13 Ɔ seli min ekun kɛ: “Á wá wún tete ninnge wie mun ekun mɔ be yo mɔ be ti tɛ tra ngalɛ’n niɔn.”
14 Ɔ maan ɔ fali min ɔli Zoova i sua’n i anuan ng’ɔ o nglo lɔ lika’n nun’n i nun lɔ. Kpɛkun n wunnin bla wie mun, be titi lɛ be su sun amuin nga be flɛ i kɛ Tamizi’n.
15 Ɔ seli min ekun kɛ: “?Sran wa, a wun like nga? Á wá wún tete ninnge wie mun ekun mɔ be tɛ tra nga mun-ɔn.”+
16 Ɔ maan ɔ fali min ɔli Zoova i sua’n i awlo klun kaan’n nun lɔ.+ Lika sɔ’n nun lɛ’n, Zoova i sua’n i anuan’n nun lɛ’n, sua’n i lika ng’ɔ ti fleiin kpa’n ɔ nin tɛ yiwlɛ’n be afiɛn’n nun lɛ’n, yasua kɔe ablaɔn-nin-nnun (25) b’a kaci be sin b’a si Zoova i sua’n, yɛ be ɲin kpɛ wia afiliɛ lɔ, be su koto wia’n i bo.+
17 Ɔ seli min kɛ: “?Sran wa, a wun nga? ?Tete ninnge nga Zidafuɛ’m be yo be fa fɔkɔ min awlɛn’n, mɔ nzaje sa yolɛ’n w’a yi mɛn’n piɛ’n,+ ɔ juman be? Siɛn’n be su fa waka sama* bé bá min bue nuan.
18 Ɔ maan ń má fa ajalɛ ya su. N su siman be aunnvɔɛ,* yɛ be su yoman min annvɔ.+ Kannzɛ bɔbɔ be kpan min su’n nun kekle kpa’n, n su sieman min su be nuan bo.”+
Ja ngua lɔ ndɛ mun
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Ɔ ti weiin kɛ waka sama wie mɔ be fa sɔ amuin’n i ndɛ yɛ be kan-ɔn.
^ Ebr., “Min ɲinma’n su siman be aunnvɔɛ.”
