Nga Pɔlu klɛli Filemɔn’n 1:1-25
1 Min Pɔlu mɔ Klisi Zezi ti’n n wo bisua’n,+ mɔ min nin e niaan bian Timote+ yɛ e o wa’n, ń klɛ́ fluwa nga ń blɛ́ wɔ Filemɔn mɔ a ti e wiengu junman difuɛ kpa’n,
2 ɔ nin e niaan bla Afia nin Aasipu+ m’ɔ ti sonja kɛ e sa’n, ɔ nin asɔnunfuɛ nga be yia ɔ awlo lɔ’n:+
3 Maan e Si Ɲanmiɛn nin e Min Zezi Klisi be yo amun ye, yɛ maan be yo naan amun di fɔundi.
4 Kɛ ń srɛ́ Ɲanmiɛn mɔ n kan ɔ ndɛ’n, n la Ɲanmiɛn ase titi.+
5 Afin n ti i titi kɛ a lafi e Min Zezi su naan a klo i kpa, yɛ a klo i sran’m be kwlaa sɔ wie.
6 Ń srɛ́ kɛ like nga a nin aniaan onga’m be lafi su’n, ɔ yo naan a wun i wlɛ kɛ Klisi ti’n, ninnge kpakpa kwlaa ti sin yia e.
7 Kɛ n tili klolɛ nga a yi i nglo’n i su ndɛ’n, min klun jɔli dan kpa. Afin min niaan, ɔ dunman nun ti’n Ɲanmiɛn i sran’m be wla guali ase.
8 I sɔ’n ti’n, Klisi mɔ e nin i e o nun’n ti’n, n kwla kle wɔ like trele nga sɛ a yo-ɔ, ɔ ti su’n.
9 Sanngɛ sɛ n wla ɔ fanngan kɛ a yo sɔ’n ɔ flunman, klolɛ mɔ a yi i nglo’n ti. Afin min Pɔlu m’an yo kpɛnngbɛn, yɛ Klisi Zezi i dunman nun ti’n, m’an yo bisuafuɛ.
10 Min wa Onezimun+ ti’n, ń srɛ́ wɔ kpa, afin m’an kaci kɛ i si+ sa bisua wa.
11 Laa’n, ɔ timan ɔ sran kpa, sanngɛ siɛn’n, ɔ ti ɔ sran kpa, yɛ ɔ ti min sran kpa wie.
12 N su fa sran sɔ m’ɔ ti min awlɛn su sran’n, ń blɛ́ wɔ.
13 Ɔ ka min ngunmin’n, ɔ́ ká min wun wa. I liɛ’n, ɔ́ sín ɔ ja nun ɔ́ úka min, bisua mɔ jasin fɛ’n ti’n be wlali min’n i nun wa.+
14 Sanngɛ n kunndɛman kɛ ń yó like nga a manman min atin kɛ n yo’n. I liɛ’n, sa kpa nga ɔ waan á yó’n, a su yomɛn i mianlɛ su, sanngɛ á yó i ɔ klunklo su.+
15 Atrɛkpa’n, i sɔ’n ti yɛ ɔ wanndili ɔ sa nun le nɲɔn kun’n niɔn, kɛ ɔ ko yo naan w’a sɛ i sin ɔ wun lɔ mlɔnmlɔn’n ti.
16 A su sɔmɛn i nun kɛ kanga sa kun,+ sanngɛ w’a yo kpa w’a tra kanga. Yɛle kɛ w’a kaci e niaan kpa.+ N klo i kpa, sanngɛ ɔ liɛ’n á wá kló i kpa trá min, afin ɔ ti ɔ kanga, kpɛkun amun Min’n w’a yo kun.
17 Ɔ maan sɛ a bu min ɔ janvuɛ’n, sɔ i nun kɛ min yɛ a su sɔ min nun sa.
18 Asa ekun’n, sɛ ɔ yoli wɔ sa wie’n, annzɛ sɛ ɔ sika o i su’n, fɛ i ngba gua min su.
19 Min Pɔlu mɔ n bɔbɔ n su klɛ fluwa yɛ’n, ń má yí ń mán wɔ. Asa kusu’n, nán ɔ wla fi su kɛ min kalɛ o ɔ su. Afin ɔ bɔbɔ wunmuan’n a ti min liɛ.
20 Aniaan bian, yo min ye e Min’n i dunman nun. Gua min awlɛn su nzue Klisi dunman nun.
21 N lafi su kɛ á yó like nga n se wɔ kɛ a yo’n, i ti yɛ n su klɛ ndɛ nga n blɛ wɔ-ɔ. N si kɛ like nga á wá yó’n, ɔ́ trá nga n se wɔ kɛ a yo’n bɔbɔ.
22 Asa ekun’n, kunndɛ lika kun sie min. Afin Ɲanmiɛn mɔ amun srɛ i be man min’n ti’n, atrɛkpa’n bé yáci min nun naan m’an kwla ko nian amun osu.+
23 Epafrasi+ mɔ Klisi Zezi ti’n, ɔ o bisua kɛ min sa’n, ɔ́ yó ɔ like.
24 Marki nin Aristaki+ nin Demasi+ nin Liki+ mɔ be ti min wiengu junman difuɛ’n, bé yó ɔ like wie.
25 Akunndan kpa mɔ amun bu’n ti’n, maan e Min Zezi Klisi yo amun ye.
