Jɔlɛ Difuɛ Mun 1:1-36
1 Kɛ Zozie wuli’n,+ Izraɛlifuɛ’m* be usali Zoova kɛ:+ “?E nun onin yɛ ɔ nin Kanaanfuɛ’m bé dún mmua kún alɛ-ɔ?”
2 Zoova tɛli su kɛ: “Zida yɛ ɔ́ kɔ́-ɔ.+ Amun nian! M’an fa mɛn’n m’an wlɛ i sa nun.”
3 Yɛ Zida seli i niaan bian Simeɔn kɛ: “Bla maan e wɔ min lika’n nun lɔ+ naan e nin Kanaanfuɛ mun e ko kun alɛ. I sin’n, e nin wɔ é kɔ́ ɔ lika liɛ’n nun lɔ.” Ɔ maan Simeɔn nin i be ɔli.
4 Kɛ Zidafuɛ’m be ɔli’n, Zoova fali Kanaanfuɛ mun nin Perizifuɛ mun wlali be sa nun,+ be kunnin sran akpiakpi blu (10.000) Bezɛki lɔ.
5 Be wunnin Adonin-Bezɛki Bezɛki lɔ, be nin i kunnin, kpɛkun be kwlali Kanaanfuɛ mun+ nin Perizifuɛ mun.+
6 Kɛ Adonin-Bezɛki wanndili’n, be suli i su be ko trɛli i, be kpɛkpɛli i sa mma kokotre mun nin i ja mma kokotre mun.
7 Yɛ Adonin-Bezɛki seli kɛ: “Famiɛn ableso (70) mɔ be kpɛkpɛli be sa mma kokotre mun nin be ja mma kokotre mun’n, be isa aliɛ ng’ɔ fin min tabli’n su gua’n. Like nga n yoli’n yɛ Ɲanmiɛn yi mannin min-ɔn.” I sin’n, be fɛ i be ɔli Zerizalɛmun,+ kpɛkun ɔ wuli lɔ.
8 Asa ekun’n, Zidafuɛ’m be nin Zerizalɛmunfuɛ’m be kunnin alɛ,+ yɛ be fali klɔ’n. Be fali tokofi be kunnin sran mun, kpɛkun be fali sin wɔli klɔ’n nun.
9 I sin’n, Zidafuɛ’m be ɔli kpɛkun be nin Kanaanfuɛ nga be tran okaoka lika’n nun lɔ’n, ɔ nin Negɛbu nin Sefela’n be kunnin alɛ.+
10 Ɔ maan Zidafuɛ mun nin Kanaanfuɛ nga be tran Ebrɔn lɔ’n be ko kunnin alɛ, be kwlali Sesai nin Aiman nin Talmai.+ (Laa’n, Ebrɔn i dunman’n yɛle Kiriati-Aaba.)
11 Be fɛli i lɛ be nin Debii lɔfuɛ’m be ko kunnin alɛ.+ (Laa’n, Debii i dunman’n yɛle Kiriati-Sefɛɛ.)+
12 I sin’n, Kalɛbu+ seli kɛ: “Sran ng’ɔ tɔ Kiriati-Sefɛɛ klɔ’n su naan ɔ fa klɔ’n, ń fá min wa bla Aksa ń mɛ́n i naan ɔ yo i yi.”+
13 Kpɛkun Kenazi+ i wa Ɔtiniɛli+ m’ɔ ti Kalɛbu i sinma’n, ɔ fali klɔ’n. Ɔ maan Kalɛbu fɛli i wa bla Aksa mɛnnin i naan ɔ yo i yi.
14 Kɛ talua’n kɔ́ Ɔtiniɛli i awlo lɔ’n, ɔ jrɛnnin i wun kɛ ɔ se i si* naan ɔ mɛn i fie kun. I sin’n, talua’n fin i aflunmun’n su jrali.* Kalɛbu usɛli i kɛ: “?Ngue yɛ a kunndɛ kɛ n yo n man wɔ-ɔ?”
15 Ɔ tɛli i su kɛ: “Yaci, cɛ min like kun naan n wun kɛ ɔ klun jɔ min wun. Afin ngua lɔ* asiɛ’n i bue nga a fa mannin min’n ɔ ti lika kee. Fa Gulɔti-Maimun* man min wie.” Ɔ maan Kalɛbu fali Nglo lɔ Gulɔti’n nin Ngua lɔ Gulɔti’n mɛnnin i.
16 Moizi i sia+ m’ɔ ti Keninfuɛ’n,+ i mma’m be nin Zidafuɛ mun be fɛli i nglesia klɔ’n+ su lɛ be ɔli Zida aawlɛ flɛnnɛn’n nun lɔ, Aradi i ja ngua lɔ lika’n nun.+ Be ɔli lɔ kpɛkun be ko trannin lɔfuɛ’m be afiɛn.+
17 Zida nin i niaan bian Simeɔn be nin Kanaanfuɛ nga be tran Zefati’n be ko kunnin alɛ, be nunnunnin klɔ’n.+ Ɔ maan be tɔnnin klɔ’n i dunman kɛ Ɔɔma.*+
18 I sin’n, Zida fali Gaza+ ɔ nin i wun lɛ lika’n, Askalɔn+ ɔ nin i wun lɛ lika’n, Ekrɔn+ ɔ nin i wun lɛ lika’n.
19 Zoova o Zidafuɛ’m be sin, ɔ maan be fali okaoka lika’n. Sanngɛ b’a kwlá fuanman be nga be tran kongo’n nun lɔ lika’n nun’n, afin be le alɛ kunlɛ kakaklolo mɔ blalɛ o be ja’m be su’n.*+
20 Be fali Ebrɔn mannin Kalɛbu, kɛ nga Moizi fa kannin’n sa,+ yɛ ɔ fuannin Anaki i mma nsan mun+ lika sɔ’n nun lɛ.
21 Sanngɛ Bɛnzamɛnfuɛ’m b’a fuanman Zebisifuɛ nga be tran Zerizalɛmun lɔ’n. Ɔ maan andɛ nin andɛ’n, Zebisifuɛ’m be nin Bɛnzamɛnfuɛ mun be te tran Zerizalɛmun lɔ.+
22 Kɛ ɔ́ yó sɔ’n, nn Zozɛfu i mma mun+ nin Betɛlifuɛ’m b’a wɔ alɛ kunlɛ, yɛ Zoova jrannin be sin.+
23 Zozɛfu i mma’m be ko kplali Betɛli klɔ’n niannin. (Laa’n, klɔ’n i dunman’n yɛle Lizi.)+
24 Be nga be ɔli klɔ’n i kpla nianlɛ’n be wunnin yasua kun, ɔ su fin klɔ’n nun fite. Be seli i kɛ: “Yaci, kle e lika nga be sin be wlu klɔ’n nun’n. I liɛ’n, é yó ɔ ye.”*
25 Bian’n kleli be atin nga be fa wlu klɔ’n nun’n. Kpɛkun be fali tokofi kunnin klɔ’n nunfuɛ mun. Sanngɛ be yacili bian’n nin i awlofuɛ’m be nun be ɔli.+
26 Bian’n ɔli Ɛtifuɛ’m be mɛn’n nun lɔ, ɔ kplannin klɔ kun yɛ ɔ tɔnnin i dunman kɛ Lizi. Andɛ nin andɛ’n be te flɛ klɔ’n i sɔ.
27 Manase w’a faman Bɛti-Sean nin i wun lɛ klɔ mun,* nin Tanaki+ nin i wun lɛ klɔ mun, nin Dɔɔfuɛ mun nin be wun lɛ klɔ mun, nin Ibleamunfuɛ mun nin be wun lɛ klɔ mun, nin Megidofuɛ mun nin be wun lɛ klɔ mun.+ Kanaanfuɛ’m be kali mɛn sɔ’n nun kekle nun.
28 Kɛ Izraɛlifuɛ’m be ɲannin wunmiɛn’n, be miannin Kanaanfuɛ’m be kɛ be di junman man be,+ sanngɛ b’a fuanman be ngba.+
29 Efraimun kusu w’a fuanman Kanaanfuɛ nga be tran Gezɛɛ lɔ’n. Kanaanfuɛ’m be trannin be afiɛn titi Gezɛɛ lɔ.+
30 Zabilɔn w’a fuanman Kitrɔnfuɛ mun nin Naalɔlufuɛ mun.+ Kanaanfuɛ’m be trannin be afiɛn titi. Be miannin be kɛ be di junman man be.+
31 Azɛɛ w’a fuanman Akofuɛ mun, nin Sidɔnfuɛ mun,+ nin Alabufuɛ mun, nin Akizibufuɛ mun,+ nin Ɛlbafuɛ mun, nin Afikifuɛ mun,+ ɔ nin Reɔbufuɛ mun.+
32 Ɔ maan Azɛɛfuɛ’m be trannin Kanaanfuɛ nga be tran mɛn sɔ’n nun’n be afiɛn titi, afin b’a fuanman be.
33 Nɛftali w’a fuanman Bɛti-Semɛsifuɛ mun nin Bɛti-Anatifuɛ mun.+ Be trannin Kanaanfuɛ nga be tran mɛn sɔ’n nun’n be afiɛn titi.+ Bɛti-Semɛsifuɛ mun nin Bɛti-Anatifuɛ’m be kacili be junman difuɛ.
34 Amɔɔfuɛ’m be yoli maan Danfuɛ’m be kali okaoka lika’n nun lɔ, afin b’a manman be atin kɛ be jra kongo nun lɔ lika’n nun.+
35 Ɔ maan Amɔɔfuɛ’m be kali Erɛsi Oka’n su lɔ, ɔ nin Azalɔn+ nin Salibimun+ lɔ kekle nun. Sanngɛ kɛ Zozɛfu i mma’m be wunmiɛn’n* yoli dan’n* be miannin be kɛ be di junman man be.
36 Amɔɔfuɛ’m be lika’n fɛ i Akrabimun kpɔlɛ’n+ su lɛ, ɔ fɛ i Sela lɛ fu kɔ okaoka lika’n nun lɔ.
Ja ngua lɔ ndɛ mun
^ Ebr., “Izraɛli i mma mun.”
^ Yɛle kɛ, Kalɛbu.
^ Be kwla se ekun kɛ “kɛ ɔ o i aflunmun’n su’n ɔ boli ndɛ.”
^ Annzɛ “Negɛbu.”
^ I bo’n yɛ: “Nzue Lika.”
^ I bo’n yɛ: “Like m’ɔ fata kɛ be nunnun i’n.”
^ Ebr., “blalɛ kakaklolo mun.”
^ Ebr., “é klé kɛ e klo wɔ.”
^ Annzɛ “klɔ nga be bo sin yiɛ i’n.”
^ Ebr., “be sa’n.”
^ Ebr., “nɔnnin’n.”
