Jɔlɛ Difuɛ Mun 12:1-15
12 I sin’n, be wa yiali Efraimun lɔ yasua mun, be kpɛli nzue’n be ɔli Zafɔn,* yɛ be seli Zɛfte kɛ: “?Ngue ti yɛ kɛ á kpɛ́ nzue’n mɔ a nin Amɔnfuɛ mun bé kó kún’n, w’a flɛman e-ɔ?+ É wá wɔ́ ɔ sua’n ɔ nin ɔ bɔbɔ amun nun.”
2 Sanngɛ Zɛfte seli be kɛ: “E nin min sran mun nin Amɔnfuɛ mun e kunnin alɛ dan kpa. N flɛli amun kɛ amun wa uka min, sanngɛ amun a deman min be sa nun.
3 Kɛ n wunnin kɛ amun su deman min’n, n fali ajalɛ kɛ ń fá min nguan’n ń síe i wie nuan naan e nin Amɔnfuɛ mun é kó kún.+ Zoova kusu fali be wlali min sa nun. ?Ɔ maan ngue ti yɛ amun a ba andɛ kɛ amun nin min bé kún alɛ-ɔ?”
4 I sin’n, Zɛfte yiali Galaadi lɔ yasua’m be kwlaa,+ kpɛkun be nin Efraimunfuɛ’m be kunnin alɛ. Galaadi lɔ yasua’m be kwlali Efraimunfuɛ mɔ be seli kɛ: “Galaadifuɛ mun, amun tran Efraimun nin Manase be lika’n nun’n, sanngɛ amun ti Efraimunfuɛ yɛ amun wanndili-ɔ.”
5 Galaadifuɛ’m be fali lika nga be kpɛ Zurdɛn’n be ja nun lɛ’n+ m’ɔ o Efraimunfuɛ’m be ɲrun ndɛnman su’n. Kɛ Efraimun lɔ yasua’m be waan bé sín’n, be se be kɛ: “Amun yaci min nun maan n sin.” Kpɛkun Galaadi lɔ yasua’m be usa be tinuntinun kɛ: “?A ti Efraimunfuɛ?” Sɛ ɔ tɛ su kɛ: ‘Cɛcɛ’n,’
6 be se i kɛ: “Yaci, se kɛ Suibolɛti.” Sanngɛ ɔ se kɛ: “Sibolɛti.” Afin ɔ simɛn i kan kpa. Kɛ ɔ ko yo sɔ’n, be trɛ i kpɛkun be kun i lika nga be kpɛ Zurdɛn’n be ja nun lɛ’n. Efraimunfuɛ akpiakpi ablanan-nin-nɲɔn (42.000) be wuli blɛ sɔ’n nun.
7 Zɛfte dili Izraɛlifuɛ’m be jɔlɛ afuɛ nsiɛn. I sin’n, Zɛfte m’ɔ ti Galaadifuɛ’n wuli, yɛ be sieli i i klɔ m’ɔ o Galaadi lɔ’n su.
8 Kɛ Zɛfte i blɛ’n sinnin’n, Ibzan m’ɔ fin Bɛtleɛmun’n yɛ ɔ wa dili Izraɛlifuɛ’m be jɔlɛ-ɔ.+
9 Ɔ ɲannin ba yasua ablasan (30) nin ba bla ablasan (30). Ɔ fɛli i mma bla mun mannin yasua wie mɔ be timɛn i osufuɛ’n naan be ja be, yɛ ɔ ko fali bla ablasan (30) bali, kpɛkun ɔ fali be mɛnnin i mma yasua mun naan be ja be. Ɔ dili Izraɛlifuɛ’m be jɔlɛ afuɛ nso.
10 I sin’n, Ibzan wuli yɛ be sieli i Bɛtleɛmun lɔ.
11 Kɛ Ibzan i blɛ’n sinnin’n, Elɔn m’ɔ ti Zabilɔnfuɛ’n yɛ ɔ wa dili Izraɛlifuɛ’m be jɔlɛ-ɔ. Ɔ dili be jɔlɛ afuɛ blu.
12 I sin’n, Elɔn m’ɔ ti Zabilɔnfuɛ’n wuli. Be sieli i Azalɔn lɔ, Zabilɔn mɛn’n nun lɔ.
13 Kɛ Elɔn i blɛ’n sinnin’n, Ilɛli m’ɔ ti Piratɔnfuɛ’n i wa Abdɔn yɛ ɔ wa dili Izraɛlifuɛ’m be jɔlɛ-ɔ.
14 Ɔ ɲannin ba yasua ablanan (40), nin anunman ablasan (30). Be le aflunmun ableso (70) yɛ be fu su-ɔ. Ɔ dili Izraɛlifuɛ’m be jɔlɛ afuɛ mɔcuɛ.
15 I sin’n, Ilɛli m’ɔ ti Piratɔnfuɛ’n i wa Abdɔn wuli. Be sieli i Piratɔn lɔ, Efraimun mɛn’n nun lɔ, Amalɛkifuɛ’m+ be oka’n su lɔ.
Ja ngua lɔ ndɛ mun
^ Be kwla se ekun kɛ “be kpɛli nzue’n be ɔli nglo lɔ lika’n nun lɔ.”
