Jɔlɛ Difuɛ Mun 14:1-20
14 I sin’n, Samsɔn ɔli Timina, yɛ ɔ wunnin Filisti bla kun Timina lɔ.
2 Ɔ ɔli ko seli i si nin i nin be kɛ: “N wunnin Filisti bla kun Timina lɔ. N kunndɛ kɛ amun jɛ i be man min.”
3 Sanngɛ i si nin i nin be seli i kɛ: “?A kwlá faman bla ɔ osufuɛ nin ɔ nvle’n nunfuɛ’m be afiɛn?+ ?Ngue ti yɛ Filistifuɛ mɔ b’a wlaman be klɛn’n be afiɛn yɛ á kó fá bla-ɔ?” Sanngɛ ɔ seli i si kɛ: “Amun ko jɛ i be man min, afin i yɛ ɔ nin min fata-ɔ.”*
4 I si nin i nin be siman kɛ sa sɔ’n fin Zoova. Ɔ* su kunndɛ Filistifuɛ’m be utre, afin blɛ sɔ’n nun’n Filistifuɛ mun yɛ be sie Izraɛlifuɛ mun-ɔn.+
5 Samsɔn nin i si nin i nin be ɔli Timina. Kɛ Samsɔn juli Timina lɔ viɲin fie’m be nun lɛ’n, ɔ́ nían-ɔn, asɔmɔli kun* yɛ ɔ́ kpán bɛ́ i su yɛ.
6 Ɔ maan Zoova i wawɛ’n mɛnnin i wunmiɛn.+ Yɛ ɔ fɛli i sa ngbɛn tili asɔmɔli’n i nun nɲɔn kɛ sran kun fa ti boli gbanflɛn kun i nun nɲɔn’n sa. Sanngɛ w’a boman sa sɔ’n su w’a klemɛn i si nin i nin.
7 I sin’n ɔ ɔli, yɛ ɔ nin bla’n be kokoli yalɛ, ɔ wunnin kɛ bla sɔ’n nin i fata sakpa.+
8 I sin’n, kɛ ɔ ɔli naan ɔ́ kó fá bla’n bɛ́ i awlo’n,+ ɔ ko niannin asɔmɔli’n i fuɛn’n. Ɔ́ nían-ɔn, awɛma mun yɛ b’a lo nun yɛ.
9 Ɔ maan ɔ yili awɛma nzue’n guɛli i i sa klun, yɛ kɛ ɔ́ nánti kɔ́’n nn ɔ́ dí. Kɛ ɔ toli i si nin i nin’n, ɔ mannin be wie kɛ be di. Sanngɛ w’a seman be kɛ asɔmɔli kun i fuɛn’n nun yɛ ɔ yili awɛma nzue’n niɔn.
10 I sin’n, Samsɔn i si’n ɔli bla’n i wun lɔ, yɛ Samsɔn yoli maan be dili cɛn lɔ. Afin i sɔ yɛ gbanflɛn’m be yo i titi-ɔ.
11 Kɛ be wunnin i’n, be fali gbanflɛn ablasan (30) naan be su i su.
12 Samsɔn seli be kɛ: “Ń má bú ɲanndra kun ń klé amun. Sɛ cɛn nso nga é fá dí cɛn’n nun’n, amun wun i wlɛ naan amun tu i bo kle min’n, ń mán amun lɛn tralɛ ablasan (30), nin tralɛ uflɛ ablasan (30) ekun.
13 Sanngɛ sɛ amun a kwlá tumɛn i bo b’a kleman min’n, amún mán min lɛn tralɛ ablasan (30) nin tralɛ uflɛ ablasan (30) ekun.” Be tɛli i su kɛ: “Bo ɔ ɲanndra’n su kle e. E kunndɛ kɛ é tí ɲanndra sɔ’n.”
14 Ɔ maan ɔ seli be kɛ:
“Like kun mɔ be di’n, ɔ fin like ng’ɔ di like’n i nun fiteli,
Like mlɛnmlɛn kun fin like ng’ɔ le wunmiɛn’n i nun fiteli.”+
Lele m’ɔ́ fá dí cɛn nsan’n, be nin-a kwlá tuman ɲanndra sɔ’n i bo.
15 I cɛn nnan su’n be seli Samsɔn i yi’n kɛ: “Laka ɔ wun’n+ naan ɔ tu ɲanndra’n i bo kle e. Ɔ timɛn i ti’n, é fá sin é wɔ́ ɔ bɔbɔ nin ɔ si i sua’n nun. ?E bo ninnge’m be fɛnlɛ ti yɛ a yiali e wa-ɔ?”
16 Ɔ maan Samsɔn i yi’n sun guɛli i wun, ɔ seli i kɛ: “A kpɔ min, a kloman min.+ A buli ɲanndra kun kleli min nvle’n nunfuɛ mun, sanngɛ w’a tumɛn i bo w’a kleman min.” Kɛ ɔ kannin sɔ’n, ɔ tɛli i su kɛ: “Nian! M’an boman su m’an kleman min si nin min nin bɔbɔ. ?Ngue ti yɛ ń bó su ń klé wɔ-ɔ?”
17 Bla’n sunnin Samsɔn i wun cɛn ba nso nga be fa dili cɛn’n i onga’n nun. Kɛ mɔ bla’n kleli i yalɛ dan’n ti’n, i agualiɛ su’n, i cɛn nso su’n, ɔ kan kleli i. Yɛ bla’n kusu ko tuli ɲanndra’n i bo kleli i nvle’n nunfuɛ mun-ɔn.+
18 I cɛn nso su’n ka naan wia’n w’a tɔ’n,* klɔ’n nun yasua’m be seli i kɛ:
“?Ngue yɛ ɔ ti mlɛnmlɛn tra awɛma nzue-ɔ?
?Yɛ ngue yɛ ɔ le wunmiɛn tra asɔmɔli-ɔ?”+
Ɔ tɛli be su kɛ:
“Sɛ amun a faman min nannin talua’n b’a tutuman lika’n,+
nn amun a siman min ɲanndra’n i bo.”
19 I sin’n, Zoova i wawɛ’n mɛnnin i wunmiɛn,+ yɛ ɔ ɔli Askalɔn.+ Ɔ ko kunnin lɔ yasua ablasan (30), yɛ ɔ fali be tralɛ mun mannin be nga be tuli i ɲanndra’n i bo’n.+ Kɛ ɔ́ sɛ́ i sin i si i awlo’n nn w’a fa ya kpa.
20 Be fali Samsɔn i yi’n+ be mannin i janvuɛ nga be su i su’n be nun kun.+
Ja ngua lɔ ndɛ mun
^ Ebr., “ɔ ti kpa min ɲin su.”
^ Atrɛkpa’n Ɲanmiɛn ndɛ yɛ be kan-ɔn.
^ Annzɛ “asɔmɔli gbanflɛn mɔ i kɔmin nun ndrɛ’n ti vɔɔ’n.”
^ Be kwla se ekun kɛ “ka naan w’a wlu i sua ba’n nun lɔ’n.”
