Jɔlɛ Difuɛ Mun 15:1-20
-
Samsɔn tuli i klunngbɔ Filistifuɛ’m be su (1-20)
15 Kɛ ɔ cɛli kan’n, ble kpɛlɛ blɛ nun’n, Samsɔn ɔli i yi’n i wun wunlɛ. Kɛ ɔ́ kɔ́’n, ɔ fali boli gbanflɛn kun. Ɔ seli kɛ: “N kunndɛ kɛ ń wlú min yi sin sua ba’n nun lɔ.” Sanngɛ bla’n i si’n w’a kplinman su kɛ ɔ wlu lɔ.
2 I si’n seli kɛ: “N seli min wun kɛ: ‘A kpɔ i.’+ Ɔ maan n fɛli i n mannin ɔ janvuɛ’n.+ ?I sinma bla’n i klanman trɛmɛn i lele? Yaci, fɛ i fa sie i osu.”
3 Sanngɛ Samsɔn seli be kɛ: “Andɛ liɛ’n, Filistifuɛ’m be su seman kɛ m’an yo be tɛ.”
4 Samsɔn ɔli ko trali blo alua ya nsan (300). Ɔ fali blo alua’m be lua mun cicili be nɲɔnnɲɔn. Kpɛkun ɔ fali tɛ wlawlali blo alua’m be lua ng’ɔ cicili be’n be afiɛn.
5 Ɔ sɔli tɛ’m be nuan, kpɛkun ɔ yacili blo alua’m be nun Filistifuɛ’m be fie’m be nun. Be nin-a kpɛman fie sɔ’m be su ninnge mun. Ɔ wɔli be ninnge’m be kwlaa be nun: Be ninnge nga b’a kpɛ mɔ be cicili be sɔlɛsɔlɛ mun-o, i nga be nin-a kpɛman’n nin-o, be viɲin fie mun-o, be olivie fie mun-o, ɔ wɔli be kwlaa be nun.
6 Filistifuɛ’m be usali kɛ: “?Wan yɛ ɔ yoli sa nga-ɔ?” Be tɛli be su kɛ: “Timina bian’n i sia Samsɔn-ɔn. Afin ɔ fɛli i yi’n mɛnnin i janvuɛ’n.”+ Kɛ Filistifuɛ’m be tili i sɔ’n, be ko fali sin be wɔli bla’n nin i si be nun.+
7 Samsɔn seli be kɛ: “Like nga amun yoli i lɛ’n ti’n, saan ń tú min klunngbɔ amun su ka naan min wla w’a gua ase.”+
8 Ɔ kunnin be kunngunngun. Ɔ kunnin be kunlɛ kpa. I sin’n, ɔ ɔli ko trannin Etamun yɔbuɛ buɛ’n nun lɔ.
9 Kɛ ɔ́ kɔ́ i ɲrun’n, Filistifuɛ’m be ɔli be ko boli be nanmue Zida lɔ, yɛ be wlan sinsin lika’n nun Lei lɔ.+
10 Ɔ maan Zidafuɛ’m be seli kɛ: “?Ngue ti yɛ amun a ba kɛ amun nin e kún alɛ-ɔ?” Be tɛli be su kɛ: “E bali Samsɔn i tralɛ* naan like ng’ɔ fa yoli e’n é fá yó i wie.”
11 Zidafuɛ akpi nsan (3.000) be ɔli Etamun yɔbuɛ buɛ’n nun lɔ. Be seli Samsɔn kɛ: “?A siman kɛ Filistifuɛ mun yɛ be sie e-ɔ?+ ?Ngue ti yɛ a yoli e sɔ-ɔ?” Ɔ tɛli be su kɛ: “Like nga be fa yoli min’n, yɛ n kusu n fa yoli be wie-ɔ.”
12 Yɛ be seli i kɛ: “E bali ɔ tralɛ* naan é fá wɔ wlá Filistifuɛ’m be sa nun.” Samsɔn tɛli be su kɛ: “Amun ta min nda kɛ amun bɔbɔ amun su yoman min like fi.”
13 Be tɛli i su kɛ: “E su yoman wɔ like fi. É trá wɔ é kó mán be ngbɛn, e su kunman wɔ.”
Be cili i nin ɲanman uflɛuflɛ nɲɔn, naan b’a fɛ i yɔbuɛ buɛ’n nun b’a fite.
14 Kɛ ɔ juli Lei lɛ mɔ Filistifuɛ’m be wunnin i’n, be kpannin kwlalɛ kpanlɛ. I sin’n, Zoova i wawɛ’n mɛnnin i wunmiɛn,+ kpɛkun ɲanman nga be cici i sa’n be yoli kɛ lɛn ɲanman wie mɔ sin w’a yrɛ i’n sa. Ɲanman’m be floli i sa guali.+
15 Kɛ ɔ yoli sɔ’n, ɔ wunnin aflunmun yasua aoje uflɛuflɛ kun, ɔ fali naan w’a fa kun sran akpi kun (1.000).+
16 Kpɛkun Samsɔn seli kɛ:
“Aflunmun aoje kun, kwle kun, kwle nɲɔn.
N fali aflunmun aoje kun n kunnin sran akpi kun (1.000).”+
17 Kɛ ɔ wieli ijɔ’n, ɔ toli aflunmun aoje’n yili i lɔ. Yɛ ɔ tɔnnin lika sɔ’n i dunman kɛ Ramati-Lei.*+
18 I sin’n, nzuewe kunnin i dan, ɔ maan ɔ kpan flɛli Zoova. Ɔ seli kɛ: “Wɔ yɛ a mannin ɔ sufuɛ’n i kwlalɛ dan nga-ɔ. ?Sanngɛ á yáci min lɛ naan nzuewe kun min lele naan n wu, yɛ n tɔ sran mɔ b’a wlaman be klɛn’n be sa nun?”
19 Ɔ maan Ɲanmiɛn tikeli kunman kun m’ɔ o Lei lɔ’n su, kpɛkun nzue fin nun fiteli.+ Kɛ ɔ nɔnnin’n, i wunmiɛn’n bɛli i nun ekun yɛ ɔ ɲannin fanngan. I sɔ’n ti’n, ɔ flɛli lika’n kɛ Ɛnin-Akore.* Lele nin andɛ’n lika sɔ’n wo Lei lɔ.
20 Samsɔn dili Izraɛlifuɛ’m be jɔlɛ afuɛ ablaɔn (20) Filistifuɛ’m be blɛ su.+
Ja ngua lɔ ndɛ mun
^ Annzɛ “i cilɛ.”
^ Annzɛ “ɔ cilɛ.”
^ I bo’n yɛ: “Aoje Kpɔlɛ.”
^ I bo’n yɛ: “Sran ng’ɔ flɛli’n i nzue ti’n.”
