Jɔlɛ Difuɛ Mun 16:1-31
16 Cɛn kun’n, Samsɔn ɔli Gaza. Ɔ wunnin tekle bla kun, kpɛkun ɔ wluli i sua’n nun lɔ.
2 Be seli Gazafuɛ’m be kɛ: “Samsɔn w’a ba wa.” Be bo sin yiɛli i, be ko bu sali klɔ’n i anuan’n nun kɔnguɛ wunmuan’n nun. Be trannin diin kɔnguɛ wunmuan’n nun, be seli be wiengu kɛ: “Kɛ wia’n fite cɛ’n, é kún i.”
3 Sanngɛ Samsɔn lali lɛ lele kɔnguɛ afiɛn. Kpɛkun ɔ jasoli kɔnguɛ afiɛn, ɔ trali klɔ’n i anuan mun nin be kadri nɲɔn mun kpɛkun ɔ tuli be, ɔ nin waka ng’ɔ ja anuan’n i sin’n. Ɔ fa be boli i wati ɔli oka ng’ɔ o Ebrɔn i ɲrun ndɛnman su lɛ’n i ti su lɔ.
4 I sin’n, ɔ wa kloli bla kun, ɔ tran Sɔrɛki Kongo’n nun lɔ’n. Be flɛ i kɛ Delila.+
5 Ɔ maan Filistifuɛ’m be siefuɛ’m be ɔli Delila i wun lɔ, be ko seli i kɛ: “Lɛkɛlɛkɛ i+ naan si like ng’ɔ mɛn i wunmiɛn dan sɔ’n, ɔ nin wafa nga e sa kwla tin i su naan y’a ci i, naan y’a ɲɛn i’n. Sɛ a yo sɔ’n, e tinuntinun é mán wɔ sika mma akpi kun ya kun (1.100).”
6 Kɛ ɔ yoli sɔ’n, Delila seli Samsɔn kɛ: “Yaci, kle min lika nga ɔ wunmiɛn dan’n fin’n, ɔ nin like nga be kwla fa ci wɔ naan b’a ɲan wɔ’n.”
7 Samsɔn seli i kɛ: “Sɛ be fa ta ɲanman uflɛuflɛ* nso mɔ be nin-a wuman kee’n be ci min’n, ń yó fakafaka kɛ sran onga’m be sa.”
8 Ɔ maan Filistifuɛ’m be siefuɛ’m be fali ta ɲanman uflɛuflɛ nso mɔ be nin-a wuman kee’n be blɛli i, kpɛkun ɔ fa be cili i.
9 Kɛ ɔ́ yó sɔ’n, nn sran wie’m b’a bu b’a sa sua’n i klun lɔ sua ba kun nun, kpɛkun bla’n kpan flɛli i. Ɔ seli kɛ: “Samsɔn, Filistifuɛ’m be o ɔ su!” Kɛ ɔ yoli sɔ’n, ɔ kpɛkpɛli ta ɲanman’m be nun kɛ lɛn ɲanman wie yɛ sin w’a yrɛ i sa-ɔ.+ B’a siman kan i wunmiɛn’n fin’n.
10 Delila seli Samsɔn kɛ: “Nian, a yoli min finfin yɛ a lakali min. Yaci, kle min like nga be kwla fa ci wɔ’n.”
11 Ɔ maan ɔ seli i kɛ: “Sɛ be fa ɲanman uflɛuflɛ mɔ be nin-a fa diman junman’n be ci min’n, ń yó fakafaka kɛ sran onga’m be sa.”
12 Delila fali ɲanman uflɛuflɛ wie mun, ɔ fa be cili i kpɛkun ɔ kpan seli kɛ: “Samsɔn, Filistifuɛ’m be o ɔ su!” (Kɛ ɔ́ yó sɔ’n, nn sran’m be sa sua ba’n nun lɔ.) Ɔ kpɛkpɛli ɲanman nga be fa cili i sa’n be nun kɛ jese wie mun sa.+
13 I sin’n, Delila seli Samsɔn kɛ: “Lele mɔ w’a fa ju yɛ’n, min finfin yɛ a yo-ɔ, yɛ a laka min.+ Kle min like nga be kwla fa ci wɔ’n.” Ɔ tɛli i su kɛ: “Ɔ fata kɛ a fa jese fa wɔ min timuɛn mɔ be kpacikpacili nun nso’n.”
14 Ɔ fɛli i timuɛn mɔ be wɔli’n cicili waka kun,* kpɛkun ɔ kpan flɛli i kɛ: “Samsɔn, Filistifuɛ’m be o ɔ su!” Yɛ ɔ tinngeli-ɔ, ɔ tuli waka’n nin i su jese’n.
15 Yɛ bla’n seli i kɛ: “A se min kɛ: ‘N klo wɔ,’+ kusu nn ɔ awlɛn nunman min su. W’a yo min finfin kpɛ nsan, yɛ w’a kleman min kan ɔ wunmiɛn dan’n fin’n.”+
16 Cɛn kwlaa ɔ jin i su sa cɔcɔcɔ, yɛ ɔ kle i yalɛ. I sɔ’n flɛnnin i dan ti’n, w’a kwlá trɛmɛn i awlɛn kun.+
17 Ɔ maan ɔ kannin ndɛ’n i kwlaa kleli i. Ɔ seli kɛ: “Razuaa nin-a kanman min ti’n le, afin kɛ ɔ fin min awuliɛ lele’n,* n ti Ɲanmiɛn i Nazirifuɛ.+ Sɛ be yi min ti’n, min wunmiɛn’n wíe min nun, ń yó fakafaka yɛ ń yó kɛ sran onga’m be sa.”
18 Kɛ Delila wunnin kɛ w’a kan ndɛ’n i kwlaa w’a kle i’n, ɔ ka lɛ flɛli Filistifuɛ’m be siefuɛ mun,+ kpɛkun ɔ seli be kɛ: “Amun bla, afin andɛ liɛ’n w’a kan ndɛ’n i kwlaa w’a kle min.” Ɔ maan Filistifuɛ’m be siefuɛ’m be bɛli i sin, be fali sika’n be bali.
19 Bla’n yoli maan ɔ lafili i ja su. Kɛ ɔ yoli sɔ’n, ɔ flɛli sran kun naan ɔ wa yi i timuɛn mɔ be kpacikpacili nun nso’n. I sa wa kwlɛli i siɛn’n, afin i wunmiɛn’n w’a wie i nun.
20 Yɛ ɔ kpan seli kɛ: “Samsɔn, Filistifuɛ’m be o ɔ su!” Kɛ ɔ tinngeli’n, ɔ seli kɛ: “Ń má fíte nun kɛ titi liɛ’n sa.+ Kɛ n ko kpinndin min wun’n, nn m’an ɲan min ti.” Sanngɛ ɔ siman kɛ Zoova w’a jaso i sin.
21 Ɔ maan Filistifuɛ’m be trɛli i, be boboli i ɲinma mun. Be fɛ i ɔli Gaza lɔ, kpɛkun be cili i nin aaba jrɔkɔ nɲɔn. Bisua lɔ’n, i yɛ ɔ si ble’n niɔn.
22 Kɛ ɔ́ yó sɔ’n, nn i ti mɔ be yili’n ɔ su fu ekun.+
23 Filistifuɛ’m be siefuɛ’m be ti yiali naan bé yí tɛ bé mán Dagɔn+ m’ɔ ti be ɲanmiɛn’n, naan bé dí cɛn. Afin be seli kɛ: “E ɲanmiɛn’n w’a fa Samsɔn m’ɔ ti e kpɔfuɛ’n w’a wla e sa nun!”
24 Kɛ sran’m be wunnin i’n, be manmannin be amuin’n, be seli kɛ: “E ɲanmiɛn’n w’a fa e kpɔfuɛ’n w’a wla e sa nun. I yɛ ɔ sacili e mɛn’n niɔn,+ ɔ kunnin e nun sran kpanngban kpa.”+
25 Kɛ mɔ be klun ti jɔwa dan’n ti’n, be seli kɛ: “Amun ko flɛ Samsɔn naan e wa fɛ i e yiyi e ɲin su.” Ɔ maan be ko flɛli Samsɔn bisua lɔ naan bé fɛ́ i bé yíyí be ɲin su. Be fɛ i jrannin sua ja mlomlo’m be afiɛn.
26 Yɛ Samsɔn seli gbanflɛn ng’ɔ trɛ i sa’n nun’n kɛ: “Maan n kan sua ja mlomlo nga be suan sua’n i bo’n naan n cisa be su.”
27 (Yasua nin bla nga be o sua’n nun lɔ’n be sɔnnin kpa. Filistifuɛ’m be siefuɛ’m be kwlaa be o lɛ, yɛ kɛ bé fá Samsɔn bé yíyí be ɲin su’n, nn yasua nin bla akpi nsan (3.000) be o sua’n i ti su lɔ yɛ be niɛn i-ɔ.)
28 I sin’n, Samsɔn+ kpan flɛli Zoova, ɔ seli kɛ: “Min Min Zoova, wɔ mɔ a Sie Like Kwlakwla’n, yaci, maan ɔ wla kpɛn min su yɛ man min wunmiɛn.+ Ɔo Ɲanmiɛn, yaci, man min wunmiɛn blɛ nga nun ngunmin naan n tu min klunngbɔ Filistifuɛ’m be su, min ɲinma nɲɔn’n be nun kun ti.”+
29 Samsɔn fɛli i sa fuali sua ja mlomlo nɲɔn nga be o afiɛn’n be wun. Ɔ suli be bo, i sa fama’n wo kun su, yɛ i sa bɛ’n wo kun su.
30 Samsɔn kpan seli kɛ: “Maan e nin Filistifuɛ mun e wu!” I sin’n, ɔ fɛli i wunmiɛn’n kwlaa suli sua ja’m be bo, kpɛkun sua’n bu guali Filistifuɛ’m be siefuɛ mun nin sran’m be kwlaa nga be o sua’n nun’n be su.+ Ɔ maan sran ng’ɔ kunnin be i wie cɛn nun’n, be sɔnnin tra be ng’ɔ kunnin be blɛ mɔ i ɲin o su’n.+
31 I sin’n, i niaan mun nin i si i awlofuɛ’m be bali be wa fɛli i. Be fɛ i ɔli, kpɛkun be sieli i Zora+ nin Ɛstaɔlu be afiɛn’n nun, i si Manoa+ i asieliɛ’n nun. Ɔ dili Izraɛlifuɛ’m be jɔlɛ afuɛ ablaɔn (20).+
Ja ngua lɔ ndɛ mun
^ Annzɛ “nnɛn jasin ndin m’ɔ ti mɔnnɛn’n.”
^ Yɛle kɛ, waka kun mɔ tannin wufuɛ’m be fa di junman’n.
^ Ebr., “kɛ ɔ fɛ i min nin klun lele’n.”
