Jɔlɛ Difuɛ Mun 17:1-13
-
Mise i amuin ba mun nin i amuin’m be ɲrun jranfuɛ’n (1-13)
17 Bian kun tran Efraimun okaoka lika’n nun lɔ,+ be flɛ i kɛ Mise.
2 Cɛn kun’n, ɔ seli i nin kɛ: “Sika mma akpi kun ya kun (1.100) mɔ be fɛli i ɔ sa nun’n, mɔ a boli su sannzan mɔ n tili’n, ɔ o min sa nun. Min yɛ n fali-ɔ.” Kɛ ɔ kannin sɔ’n i nin’n seli kɛ: “Maan Zoova yra min wa’n su.”
3 Ɔ maan ɔ fali sika mma akpi kun ya kun’n (1.100) mɛnnin i nin. Sanngɛ i nin’n seli kɛ: “Saan ń fá min sika’n ń mán Zoova. N kunndɛ kɛ a bo sika sɔ’n fa yo amuin naan a klo wie fa yo amuin kun.+ I sɔ’n ti’n, de, n su fa man wɔ.”
4 Kɛ ɔ fali sika sɔ’n mɛnnin i nin’n, i nin fali sika mma ya nɲɔn (200), ɔ fa mannin ajuin difuɛ’n. Ɔ boli sika’n fa yoli amuin, yɛ ɔ kloli wie fa yoli amuin kun. Kpɛkun be fa sieli i Mise i awlo lɔ.
5 Mise sɔ’n, ɔ le amuin sua kun. Ɔ yoli efɔdu kun+ nin awlo amuin mun,*+ yɛ ɔ sieli i mma’m be nun kun kɛ ɔ yo i amuin’m be ɲrun jranfuɛ.+
6 Blɛ sɔ nun’n, famiɛn nunman Izraɛli lɔ.+ Like nga sran kun bu i kɛ ɔ ti kpa’n yɛ ɔ yo-ɔ.*+
7 Gbanflɛn kun m’ɔ fin Bɛtleɛmun’n,+ m’ɔ o Zida mɛn’n nun lɔ’n, ɔ ti Zida osu’n nunfuɛ.* Ɔ ti Levifuɛ,+ yɛ ɔ tran mɛn sɔ’n nun w’a di le nɲɔn kun.
8 Ɔ jasoli Bɛtleɛmun m’ɔ o Zida lɔ’n su naan ɔ́ kó kúnndɛ lika uflɛ trán nun. Kɛ ɔ́ tú ajalɛ’n, ɔ ɔli Efraimun okaoka lika’n nun lɔ, Mise i awlo lɔ.+
9 I sin’n, Mise usɛli i kɛ: “?Nin yɛ a fin-ɔn?” Ɔ tɛli i su kɛ: “N ti Levifuɛ. N tran Bɛtleɛmun m’ɔ o Zida lɔ’n su, yɛ n su kunndɛ lika kun ń trán nun.”
10 Mise seli i kɛ: “Tran min wun wa naan kaci min si* nin min amuin’m be ɲrun jranfuɛ. Afuɛ nuan kun nun’n, ń mán wɔ sika mma blu, nin tralɛ, ɔ nin aliɛ.” Ɔ maan Levifuɛ’n wluli i sua’n nun.
11 Levifuɛ’n kplinnin su kɛ ɔ nin bian’n bé trán. Gbanflɛn’n kacili kɛ i mma’m be nun kun sa.
12 Asa ekun’n, Mise fali Levifuɛ’n sieli i i amuin’m be ɲrun jranfuɛ,+ yɛ ɔ trannin Mise i awlo lɔ.
13 I sin’n, Mise seli kɛ: “Siɛn’n, n si kɛ Zoova wá yó min ye. Afin Levifuɛ kun yɛ w’a kaci min amuin’m be ɲrun jranfuɛ-ɔ.”
Ja ngua lɔ ndɛ mun
^ Annzɛ “amuin ba mun.” Ebr., “terafimun mun.”
^ Annzɛ “like ng’ɔ ti kpa sran kun i ɲin su’n yɛ ɔ yo-ɔ.”
^ Atrɛkpa’n i sɔ’n kle kɛ ɔ tran Zida lɔ ngbɛn.
^ Annzɛ “afɔtuɛ manfuɛ.”
