Jɔlɛ Difuɛ Mun 21:1-25
-
B’a nunnunman Bɛnzamɛn akpasua’n (1-25)
21 Mizpa lɔ’n,+ Izraɛlifuɛ’m be tali nda. Be seli kɛ: “E nun wie fi su fɛmɛn i wa bla manman Bɛnzamɛn yasua wie kɛ ɔ yo i yi.”+
2 Kɛ ɔ yoli sɔ’n, nvlefuɛ’m be bali Betɛli+ be wa trannin Ɲanmiɛn Kpli i ɲrun lele nnɔsua. Be boli awuyomo, yɛ be sunnin kpa.
3 Be seli kɛ: “?Zoova, Izraɛli i Ɲanmiɛn, ngue ti yɛ sa kɛ nga sa juli Izraɛli wa-ɔ? ?Ngue ti yɛ ɔ fata kɛ akpasua kun tu Izraɛli nvle’n nun andɛ-ɔ?”
4 Kɛ i aliɛ cɛnnin’n, nvlefuɛ’m be jasoli nglɛmun ndɛ kpa, be kplannin tɛ yiwlɛ kun lɛ naan bé yí tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ+ su.
5 I sin’n, Izraɛlifuɛ’m be seli kɛ: “?Izraɛli akpasua’m be kwlaa be nun’n, oninfuɛ’n yɛ w’a baman aɲia’n i bo Zoova ɲrun-ɔn?” Afin be tali nda cinnjin kpa kun kɛ sran kwlaa nga w’a ɔman Zoova ɲrun Mizpa lɔ’n, saan bé kún i.
6 Izraɛlifuɛ’m be wla boli be wun, sa ng’ɔ juli be niaan Bɛnzamɛnfuɛ’m be su’n ti. Be seli kɛ: “Andɛ’n, akpasua kun w’a tu Izraɛli nvle’n nun.
7 ?Kɛ mɔ e tali Zoova nda+ kɛ e su faman e mma bla’m be nun wie fi e manman be’n,+ ngue yɛ é yó naan y’a ɲan bla y’a man be nga be kali lɛ’n mun-ɔn?”
8 Be usali kɛ: “?Izraɛli akpasua’m be nun’n, oninfuɛ’n yɛ w’a ɔman Zoova ɲrun Mizpa lɔ-ɔ?”+ Be wunnin kɛ Zabɛsi-Galaadi lɔ sran fi w’a ɔman kan nvlefuɛ’m be yiali lɔ’n.
9 Kɛ be kali sran mun’n, be wunnin kɛ Zabɛsi-Galaadi lɔfuɛ wie fi nunman be nun.
10 Ɔ maan nvlefuɛ’m be sunmannin alɛ kunfuɛ kpakpa akpiakpi blu-nin-nɲɔn (12.000). Be seli be kɛ: “An wɔ naan amun fa tokofi be kun Zabɛsi-Galaadi lɔfuɛ mun. Bla mun nin ba kanngan mun bɔbɔ’n, amun kun be wie.+
11 Like ng’ɔ fata kɛ amun yo’n yɛ: Amun kun yasua mun, ɔ nin bla nga b’a si yasua’n be kwlaa.”
12 Zabɛsi-Galaadi lɔfuɛ’m be nun’n, be ɲannin talua ya nnan (400) mɔ be nin-a siman yasua’n. Be fa be ɔli Silo+ lɔ nanmue’n nun, Kanaan mɛn’n nun lɔ.
13 I sin’n, nvlefuɛ’m be kwlaa be sunmannin sran Bɛnzamɛnfuɛ nga be o Rimɔn yɔbuɛ’n+ su lɔ’n be sin naan be ko se be kɛ be siesie be afiɛn.
14 Ɔ maan Bɛnzamɛnfuɛ’m be sali be sin blɛ sɔ’n nun. Be fali Zabɛsi-Galaadi lɔ bla nga be yacili be nguan nun’n be mannin be,+ sanngɛ bla nga be ɲannin be’n b’a juman be ngba.
15 Sa ng’ɔ juli Bɛnzamɛnfuɛ’m be su’n ti’n, nvlefuɛ’m be wla boli be wun.+ Afin Zoova yoli maan Izraɛli akpasua’m be nun bubuli.
16 Nvlefuɛ’m be su kpɛnngbɛn’m be seli kɛ: “?Ngue yɛ é yó naan y’a ɲan bla y’a man yasua nga be kali lɛ’n mun-ɔn? Afin e kunnin Bɛnzamɛn akpasua’n nun bla’m be kwlaa.”
17 Be tɛli su kɛ: “Ɔ fata kɛ Bɛnzamɛnfuɛ nga be kali nguan nun’n be ɲan aja like kun, i liɛ’n akpasua kun su tuman Izraɛli nvle’n nun.
18 E liɛ’n, e leman atin e faman e mma bla mun e manman be kɛ be fa be yo be yi. Afin Izraɛlifuɛ’m be tali nda kɛ: ‘Sran ng’ɔ fa bla kun man Bɛnzamɛnfuɛ wie kɛ ɔ yo i yi’n, maan be bo i sannzan.’”+
19 I sin’n, be seli kɛ: “An nian! Afuɛ kwlaa’n be di cɛn man Zoova Silo lɔ.+ Ɔ o Betɛli i nglo lɔ lika’n nun, atin dan ng’ɔ fɛ i Betɛli kɔ Sisɛmun’n i wia afiliɛ lɔ, yɛ ɔ o Lebona i ngua lɔ.”
20 Ɔ maan be seli Bɛnzamɛn yasua’m be kɛ: “Amun ko bu sa viɲin fie’m be nun lɔ.
21 Kɛ amun wun kɛ Silo lɔ talua mun* b’a fite naan b’a bo nɲrele be su si able’n, maan amun tinuntinun amun fin viɲin fie’m be nun fite. Yɛ maan amun tra Silo lɔ talua mun fa yo amun yi, kpɛkun amun sa amun sin Bɛnzamɛn mɛn’n nun lɔ.
22 Sɛ be si mun annzɛ be niaan bian’m be sanman e’n, é sé be kɛ: ‘Be dunman nun ti’n, amun si e aunnvɔɛ. Afin kɛ e kunnin alɛ’n, bla nga e ɲannin be’n b’a juman be ngba,+ yɛ kusu sɛ amun bɔbɔ amun man be bla’n, nn amun a fɔn.’”+
23 Ɔ maan Bɛnzamɛnfuɛ’m be yoli i kɛ nga be kan kleli be’n sa cɛ. Be trali bla nga be su si able’n be nun wie mun yoli be yi. I sin’n, be sali be sin be lika m’ɔ ti be aja like’n nun lɔ, be kplannin be klɔ’m be uflɛ+ kpɛkun be trannin be nun.
24 Kɛ ɔ yoli sɔ’n, Izraɛlifuɛ’m be sanndili. Be tinuntinun be ɔli be akpasua’m be nun, nin be awlobo’m be nun. Be jasoli lɛ be ɔli, be tinuntinun be ɔli be lika m’ɔ ti be aja like’n nun lɔ.
25 Blɛ sɔ nun’n, nn famiɛn nunman Izraɛli mɛn’n nun.+ Like ng’ɔ ti kpa sran kun i ɲrun’n yɛ ɔ yo-ɔ.*
