Jɔlɛ Difuɛ Mun 5:1-31
5 Cɛn sɔ’n nun’n, Debora+ nin Abinoamun i wa Baraki+ be toli jue nga:+
2 “Izraɛli lɔ alɛ kunfuɛ’m be timuɛn mɔ be ɲannjili nun’n ti’n,*
nvlefuɛ mɔ be klun klo su be bali’n+ ti’n,
An manman Zoova!
3 Famiɛn mun, amun tie! Siefuɛ mun, amun sie amun su!
Ń tó jue ń mánmán Zoova.
Ń tó jue* ń mánmán Zoova+ m’ɔ ti Izraɛli i Ɲanmiɛn’n.+
4 Zoova, kɛ a fin Seii+ lɔ fiteli’n,
kɛ a jasoli Edɔmun lika’n nun lɔ’n,
asiɛ’n kejeli, ɲanmiɛn su lɔ’n tikeli,
nzue fin ɲanmiɛn ble’n nun guali.
5 Oka’m be kloli* Zoova i ɲrun,+
Sinai’n bɔbɔ kloli Zoova m’ɔ ti Izraɛli i Ɲanmiɛn’n+ i ɲrun.+
6 Samgaa+ m’ɔ ti Anati i wa’n i blɛ su’n,
Zaɛli+ i blɛ su’n, atin’m be tɔli srolo.
Ajalɛ tufuɛ’m be fali blo atin mun.
7 Izraɛli klɔ’n sufuɛ’m be nunman lɛ kun,
b’a wunman be kun, lele min Debora+ n jasoli,
Lele n jasoli kɛ niɛn kun sa Izraɛli nvle’n nun.+
8 Nvlefuɛ’m be suli ɲanmiɛn uflɛ,+
ɔ maan be kunnin alɛ klɔ’n i anuan’m be nun.+
Izraɛli sonja akpiakpi ablanan (40.000) be afiɛn’n,
b’a kwlá wunman ɲrɛn annzɛ cua fi.
9 N wo Izraɛli kpɛnngbɛn’m be sin,+
n wo be nga be klun klo su be nin nvlefuɛ’m be bali’n be sin.+
An manman Zoova!
10 Amun mɔ amun fu aflunmun’m be su’n,
amun mɔ amun tran tapi nglanman’m be su’n,
yɛ amun mɔ amun nanti atin’n su’n,
an bu ndɛ yɛ’n i akunndan.
11 Be tili nzue safuɛ’m be nɛn’n nzue sawlɛ’m be nun.
Be kan sa kpakpa nga Zoova yo be’n be ndɛ lɔ,
be kan sa kpakpa nga i klɔ’n sufuɛ’m be yo be Izraɛli nvle’n nun’n be ndɛ.
Ɔ maan Zoova i sran mun be ɔli klɔ’n i anuan’m be nun lɔ.
12 Tinnge, Debora, tinnge!+
Tinnge, tinnge, to jue kun!+
Baraki, jaso!+ Wɔ mɔ a ti Abinoamun i wa’n, fa be nga a trali be’n bla.
13 Ɔ maan be nga be kali lɛ’n be bali kpɛnngbɛn’m be sin.
Zoova i sran’m be bali min sin naan be nin safuɲrɛn’m bé kó kún.
14 Be nga be o kongo’n nun lɔ’n, be fin Efraimun.
Ee, Bɛnzamɛn, be su ɔ su ɔ nvlefuɛ’m be afiɛn.
Kpɛnngbɛn’m be fin Makii+ lɔ bali,
yɛ be nga be kpa sonja mun’n* be fin Zabilɔn lɔ bali.
15 Isakaa lɔ sran dandan’m be o Debora sin.
Kɛ nga Isakaa fa yoli’n sa’n, Baraki+ kusu yoli sɔ wie.
Be sunmɛnnin i kɛ ɔ nanti i ja wɔ kongo’n nun lɔ.+
Ribɛnin akpasua’n su sran mun be sisili be bo dan.
16 ?Ngue ti yɛ a trannin bajɛ* nɲɔn’m be afiɛn-ɔn?
?Ngue ti yɛ a tie blo nga be bo be man nnɛn mun’n niɔn?+
Ribɛnin akpasua’n sufuɛ’m be sisili be bo dan.
17 Galaadi kali Zurdɛn’n i bue kun lɔ.+
?Yɛ Dan li? ?Ngue ti yɛ ɔ kali mmeli’m be wun lɔ-ɔ?+
Azɛɛ trannin jenvie’n i nuan. Nán kɛ like wie yɛ ɔ su yo-ɔ.
Ɔ kɛli i mmeli jranwlɛ’m* be wun lɛ.+
18 Zabilɔn ti nvle kun m’ɔ fɛli i nguan’n sieli i wie nuan-ɔn, ɔ ka kan naan w’a wu.
Nɛftali kusu+ yoli sɔ wie kpɔlɛ’m be su.+
19 Tanaki lɔ’n, Megido nzue’m be wun lɛ’n,+
famiɛn’m be bali, be kunnin alɛ.
Kanaan famiɛn’m bekunnin alɛ.+
Sanngɛ b’a faman sika* b’a ɔman.+
20 Nzraama mɔ be o ɲanmiɛn su lɔ’n be kunnin.
Kɛ be o ɲanmiɛn su lɔ’n be nin Sizera be kunnin.
21 Kisɔn nzue’n fali be ɔli,+
Kisɔn nzue ba’n mɔ nán andɛ sa yɛ ɔ sonji’n, ɔ fali be ɔli.
A tiatiali safuɲrɛn’m be su.
22 Kɛ i alɛ kunlɛ nnɛn kpanngɔ’m bé wánndi kekle kpa bé kɔ́’n,
be ja bo’n tɛman aɔwi.+
23 Zoova i anzi’n seli kɛ: ‘An bo Merozu i sannzan,
ɛɛn, an bo be nga be tran lɔ’n be sannzan,
afin b’a baman Zoova i ukalɛ,
b’a faman be safuɲrɛn mun b’a baman Zoova i ukalɛ.’
24 Zaɛli+ m’ɔ ti Ebɛɛ+ m’ɔ ti Keninfuɛ’n i yi’n,
be yrɛli i su dan bla’m be nun.
Be yrɛli i su trali bla nga be tran tannin sua nun’n be kwlaa.
25 Sizera srɛli i nzue, ɔ mɛnnin i nɔnnɔn.
Ɔ fali nɔnnɔn guɛli i cɛn dilɛ klowa klanman kun nun fa mɛnnin i.+
26 Ɔ fɛli i sa kun fali tannin sua ja’n,
ɔ fɛli i sa fama’n fali maato nga ajuin difuɛ’m be fa di junman’n.
Kpɛkun ɔ fali maato finnin Sizera, ɔ kpɔtɔli i ti’n,
ɔ fufuli i ti’n i papla nun, yɛ ɔ fitili i.+
27 Ɔ glɔli i ja afiɛn lɛ, ɔ tɔli, yɛ ɔ lali lɛ.
Ɔ glɔli i ja afiɛn lɛ, ɔ tɔli.
Kɛ ɔ glɔli lɛ’n, lɛ yɛ be kwlɛli i-ɔ.
28 Bla kun su nian fenɛtri nun,
Sizera i nin’n su nian fenɛtri’n i gliazi’n nun.
‘?Ngue ti yɛ i kakaklolo’n w’a cɛ sɔ-ɔ?
?Ngue ti yɛ be timɛn i nnɛn kpanngɔ’m be ngan-ɔn?’+
29 I awlo lɔ bla nga be le ɲrun’n be nun ng’ɔ si ngwlɛlɛ kpa’n ɔ́ tɛ́ i su.
Ɛɛn, i kusu ɔ́ sé i klun lɔ kɛ:
30 ‘Kɔlɛ’n be su cɛcɛ ninnge nga be ɲɛnnin i’n nun,
sonja kun fa talua kun,* annzɛ talua nɲɔn,*
tannin mɔ be wlɛli i ayre nun’n ti Sizera liɛ, tannin mɔ be wlɛli i ayre nun’n,
tannin kun mɔ be yili nun desɛn’n, tannin mɔ be wlɛli i ayre nun’n, tannin nɲɔn mɔ be yili nun desɛn’n,
be ti ninnge fɛnfuɛ’m be kɔmin su gualɛ liɛ.’
31 Zoova, maan ɔ kpɔfuɛ’m be kwlaa be wu.+
Sanngɛ maan be nga be klo wɔ’n be yo kɛ wia m’ɔ su fite m’ɔ bo ɲanɲan’n sa.”
Ɔ maan mɛn’n tɔli fɔuun afuɛ ablanan (40).+
Ja ngua lɔ ndɛ mun
^ Atrɛkpa’n i sɔ’n kle kɛ b’a fa be wun b’a man Ɲanmiɛn.
^ Annzɛ “Ń bó miziki.”
^ Be kwla se ekun kɛ “kejeli.”
^ Be kwla se ekun kɛ “be nga fluwa klɛfuɛ’n i ninnge’m be o be sa nun’n.”
^ Yɛle kɛ, like nga be fa sie nnɛn’m be su mɔ be tran su’n.
^ Annzɛ “lika nga be jra lɛ’n.”
^ Wa’n like nga be fa yi sika mma’n i ndɛ yɛ be kan-ɔn.
^ Ebr., “ku sɛ kun.”
^ Ebr., “ku sɛ nɲɔn.”
