Kalɛ 23:1-30
23 Balaamun seli Balaki kɛ: “Kplan tɛ yiwlɛ nso wa,+ naan kunndɛ nannin tola nso nin bua ɲin nso fa man min.”
2 Be ja nun lɛ’n, Balaki yoli like nga Balaamun seli i kɛ ɔ yo’n. Yɛ be nɲɔn’n be fali nannin tola kun nin bua ɲin kun fa yili tɛ tɛ yiwlɛ’m be su kunngunngun.+
3 I sin’n, Balaamun seli Balaki kɛ: “Jran wa, ka ɔ tɛ nga kɛ á yí’n a yrali nnɛn mun kɔlikɔli’n, i wun wa. Ń kɔ́ min ɲrun lɔ kan. Atrɛkpa’n, Zoova yí i wun nglo klé min. Yɛ ndɛ kwlaa ng’ɔ́ kán klé min’n, ń bó su klé wɔ.” Kpɛkun ɔ ɔli kpɔlɛ kun i ti su lɔ.
4 I sin’n Ɲanmiɛn yili i wun nglo kleli Balaamun.+ Yɛ Balaamun seli i kɛ: “M’an kplan tɛ yiwlɛ nso m’an lɔngɔ su. Yɛ n yili be su tɛ. Kun su nannin tola kun nin bua ɲin kun.”
5 Zoova fali ndɛ kun wlali Balaamun i nuan.+ Kpɛkun ɔ seli i kɛ: “Sa ɔ sin Balaki i wun lɔ. Ndɛ ng’ɔ fata kɛ a kan kle i’n yɛ ɔ o lɛ-ɔ.”
6 Yɛ ɔ sɛli i sin-ɔn. Ɔ wunnin kɛ Balaki nin Moabu lɔ sran dandan’m be kwlaa be jin tɛ yiwlɛ’m be wun lɛ.
7 Yɛ ɔ kannin ndɛ nga seli kɛ:+
“Balaki m’ɔ ti Moabu famiɛn’n ko fali min Aramun lɔ,+wia afiliɛ lɔ okaoka’m be nun:
‘Bla naan bo Zakɔbu i sannzan man min.
Bla wa kan Izraɛli i ndɛ tɛtɛ.’+
8 ?Be nga Ɲanmiɛn w’a boman be sannzan’n, n bo be sannzan-ɔn, ɔ yo ye?
?Yɛ be nga Zoova w’a kanman be ndɛ tɛtɛ’n, n kan be ndɛ tɛtɛ-ɔ, ɔ yo ye?+
9 Kɛ n wo yɔbuɛ’m be su’n, n wun be,kɛ n fu kpɔlɛ’m be su’n, n wun be.
Kɛ be o lɛ’n, be ti kɛ nvle kun mɔ i ngunmin yɛ ɔ wo’n sa,+be faman be wun wlaman nvle onga’m be nun.+
10 Zakɔbu i mma’m be sɔnnin kɛ ndutre sa. ?Wan yɛ ɔ kwla ka be-ɔ?+?Sɛ be bubu be nun nnan bɔbɔ’n, be kwla ka bue kun?
Maan n wu kɛ sran kpa’m be liɛ’n sa,
yɛ maan agualiɛ’n gua min kɛ be liɛ’n sa.”
11 Balaki seli Balaamun kɛ: “?Ngue ti yɛ a yoli min sɔ-ɔ? N fali ɔ bali naan a bo min kpɔfuɛ’m be sannzan. Kpɛkun á jú wa-o, muae yɛ a su bo man be-ɔ.”+
12 Ɔ tɛli su kɛ: “?Nán ndɛ nga Zoova fa wla min nuan’n, i cɛ yɛ ń kán-ɔn?”+
13 Balaki seli i kɛ: “Yaci, bla maan e wɔ lika uflɛ mɔ a kwla wun be’n. A su wunman be ngba, be bue kaan sa yɛ á wún be-ɔ. Kpɛkun bo be sannzan lɛ man min.”+
14 Yɛ ɔ fɛli i ɔli Zofimun fie’n nun, Pisga i ti su nglonglo kpa’n su lɔ.+ Kpɛkun ɔ kplannin tɛ yiwlɛ nso naan w’a fa nannin tola kun nin bua ɲin kun w’a fa yi tɛ be su kunngunngun.+
15 Balaamun seli Balaki kɛ: “Ka ɔ tɛ nga a yili mɔ a yrali nnɛn mun kɔlikɔli’n, i wun wa. Ń kɔ́ min ɲrun lɔ naan Ɲanmiɛn yi i wun nglo kle min.”
16 Zoova yili i wun nglo kleli Balaamun. Kpɛkun ɔ fali ndɛ kun wlɛli i nuan naan w’a se i kɛ:+ “Sa ɔ sin Balaki i wun lɔ. Ndɛ ng’ɔ fata kɛ a kan kle i’n yɛ ɔ o lɛ-ɔ.”
17 Kɛ ɔ wa toli Balaki’n, ɔ wunnin kɛ ɔ su minndɛ i tɛ ng’ɔ yili be’n, be wun lɛ. Moabu lɔ sran dandan’m be o i wun lɛ wie. Yɛ Balaki usɛli i kɛ: “?Ngue ndɛ yɛ Zoova kannin-ɔn?”
18 Balaamun kannin ndɛ nga seli kɛ:+
“Balaki, jaso naan sie ɔ su.
Zipɔɔ i wa, tie min ndɛ’n.
19 Ɲanmiɛn timan klɔ sran naan w’a bua ato,+ɔ timan sran wa naan w’a kaci aniɛn.*+
?Sɛ ɔ kan kɛ ɔ́ yó like kun’n, ɔ su yoman?
?Sɛ ndɛ kun fin i nuan fite’n, ɔ su yiɛmɛn i nuan?+
20 Nian! Be ko fali min kɛ n bo muae,muae kusu yɛ ɔ boli-ɔ,+ n kwlá kacimɛn i kun.+
21 Ɔ kplinman su kɛ be cici Zakɔbu.Ɔ kplinman su kɛ be kle Izraɛli i ɲrɛnnɛn.
I Ɲanmiɛn Zoova jin be sin,+be boli i su ndɛ kekle kpa kɛ ɔ ti be su famiɛn.
22 Ɲanmiɛn fa be Ezipti lɔ fite.+
Ɔ ti kɛ blo nannin’n* i wɛ mun sa, yɛ ɔ uka be.+
23 Afin bae dilɛ ninnge wie fi kwlá ɲanman Zakɔbu i osu’n nunfuɛ mun,+wunnzue yifuɛ fi kwlá tanndanman Izraɛlifuɛ’m be ɲrun.+
Blɛ sɔ’n nun’n, be kwla kan Zakɔbu nin Izraɛli be ndɛ se kɛ:
‘Amun nian sa nga Ɲanmiɛn yoli’n.’
24 Nvle kun yɛ, ɔ́ jáso kɛ asɔmɔli wie sa,ɔ́ mɛ́n i wun su kɛasɔmɔli’n sa.+
Sɛ á wún kɛ w’a la’n, nn w’a di nnɛnyɛ w’a nɔn nnɛn ng’ɔ kunnin be’n be mmoja’n.”
25 Yɛ Balaki seli Balaamun kɛ: “Sɛ ɔ li a kwlá boman be sannzan’n, nán bo muae kusu man be.”
26 Balaamun tɛli i su kɛ: “?M’an seman wɔ kɛ like kwlaa nga Zoova se min kɛ n yo’n, yɛ ń yó-ɔ?”+
27 Balaki seli Balaamun kɛ: “Yaci, bla maan n fa ɔ wɔ lika uflɛ. Atrɛkpa’n, Ɲanmiɛn Kpli kplín su kɛ a bo be sannzan lɔ.”+
28 Yɛ Balaki fɛ i ɔli Peɔɔ i ti su nglo lɔ. Kɛ be wo lɔ’n, be wun Zesimɔn.*+
29 Balaamun seli Balaki kɛ: “Kplan tɛ yiwlɛ nso wa, naan kunndɛ nannin tola nso nin bua ɲin nso fa man min.”+
30 Balaki yoli like nga Balaamun seli i kɛ ɔ yo’n. Kpɛkun ɔ fali nannin tola kun nin bua ɲin kun fa yili tɛ tɛ yiwlɛ’m be su kunngunngun.
Ja ngua lɔ ndɛ mun
^ Annzɛ “sa w’a yo i nsisɔ.”
^ Nnɛn sɔʹn ti kɛ awɛ sa.
^ Be kwla se ekun kɛ “aawlɛ flɛnnɛn’n.”