Kalɛ 24:1-25
24 Kɛ Balaamun wunnin i kɛ Zoova klo kɛ be yra Izraɛlifuɛ’m be su’n, w’a kunndɛman kɛ ɔ́ wúa be amuin kun.+ Sanngɛ ɔ kpɛli i ɲin aawlɛ flɛnnɛn’n su lɔ.
2 Kɛ Balaamun mɛnnin i ti’n su’n, ɔ wunnin Izraɛlifuɛ mɔ b’a trantran akpasuaakpasua’n.+ Kpɛkun Ɲanmiɛn wawɛ’n jrɛli i su.+
3 Yɛ ɔ kannin ndɛ nga:+
“Balaamun m’ɔ ti Beɔɔ i wa’n i nuan ndɛ’n,sran nga i ɲinma’n tikeli’n i nuan ndɛ’n,
4 sran m’ɔ ti ndɛ nga Ɲanmiɛn kan’n,m’ɔ wunnin Sran m’ɔ Kwla Like Kwlaa Yo’n aolia nun’n,mɔ kɛ ɔ́ kóto’n i ɲinma’n ti tikewa’n, i nuan ndɛ’n yɛ:+
5 Zakɔbu, ɔ tannin sua’m be ti nglanman-o,Izraɛli, lika sɔ’m be nun yɛ a tran-ɔn!+
6 Be ti kɛ kongo nga be nannan plaii’n sa,+be ti kɛ lika nglanman nga be o nzue ba nuan’n sa,be ti kɛ aloɛsi* nga Zoova tali’n sa,be ti kɛ sɛdri mɔ be o nzue ba nuan’n sa.
7 I jru ba nɲɔn mɔ be fali nnɛn kplo be yoli’n, nzue fin nun sonji titi,yɛ be luɛli i like’n nzue kpanngban nuan.*+
I famiɛn’n+ ɲán ɲrun trá Agagi,+yɛ bé mɛ́nmɛ́n i famiɛn diwlɛ’n.+
8 Ɲanmiɛn su fɛ i Ezipti lɔ fite,ɔ ti kɛ blo nannin’n* i wɛ mun sa, ɔ uka be.
Ɔ́ núnnún nvlenvle mun, be nga be kle i yalɛ’n,+yɛ ɔ́ bóbó be owie’n, ɔ́ fɛ́ i ta mma mun kún be sekeseke.
9 Ɔ lali, ɔ la lɛ kɛ asɔmɔli sa,yɛ ɔ ti kɛ asɔmɔli sa. ?Wan yɛ ɔ kwla mɛn i su-ɔ?
Be nga be bo muae man wɔ’n, be ɲan muae,yɛ be nga be bo ɔ sannzan’n, be su yoman kpa.”+
10 I sɔ’n ti’n, Balaki fali Balaamun i wun ya dan kpa. Ɔ boli ndɛ ya su, yɛ ɔ seli i kɛ: “Min kpɔfuɛ’m be sannzan bolɛ ti yɛ n flɛli wɔ-ɔ.+ Sanngɛ muae yɛ a bo mannin be lele kpɛ nsan-ɔn.
11 Ɔ maan sa ɔ sin kɔ ɔ tranwlɛ icra’n. Min waan ń yó naan a ɲan ɲrun dan.+ Sanngɛ nian! Zoova yoli maan w’a ɲanman ɲrun.”
12 Balaamun tɛli Balaki su kɛ: “?M’an seman sran nga a sunmannin be’n kɛ:
13 ‘Sɛ Balaki fɛ i sua mɔ sika annzɛ sika ɔkwlɛ w’a yi i piɛ’n man min bɔbɔ’n, n su kwlá yoman like nga n bɔbɔ n klo’n, naan kannzɛ like sɔ’n ti kaan-o annzɛ ɔ ti dan-o, n su yoman like nga Zoova w’a seman min kɛ n yo’n? ?M’an seman kɛ ndɛ nga Zoova se min kɛ n kan’n yɛ ń kán-ɔn’?+
14 N su kɔ min fuɛ’m be sin. Sanngɛ bla maan n kan sa nga cɛn wie lele’n, sran sɔ’m bé wá yó ɔ sran liɛ mun’n i ndɛ n kle wɔ.”
15 I sɔ’n ti’n, ɔ kannin ndɛ nga:+
“Balaamun m’ɔ ti Beɔɔ i wa’n i nuan ndɛ’n,sran nga be tikeli i ɲinma’n i nuan ndɛ’n,+
16 sran m’ɔ ti ndɛ nga Ɲanmiɛn kan’n,m’ɔ si Ɲanmiɛn m’ɔ o Like Kwlaa Ti Su’n,m’ɔ wunnin Sran m’ɔ Kwla Like Kwlaa Yo’n aolia nun’n,mɔ kɛ ɔ́ kóto’n i ɲinma’n ti tikewa’n, i nuan ndɛ’n yɛ:
17 Ń wún i, sanngɛ nán dɔ nga su-ɔ,min ɲinma tɛ́ i, sanngɛ nán icra’n niɔn.
Nzraama kun+ fín Zakɔbu osu’n nun,yɛ famiɛn dilɛ kpɔnman kun+ jáso Izraɛli osu’n nun.+
Saan ɔ́ kpúke Moabu i ngban su+ɔ nin ba nga be yo nzaje sa’m be ti kongloman’n.
18 Edɔmun yó sran uflɛ liɛ,+nanwlɛ, Seii+ káci i kpɔfuɛ’m be liɛ,+kɛ ɔ́ yó sɔ’n, nn Izraɛli klé kɛ ɔ ti yakpafuɛ.
19 Zakɔbu i osu’n nun sran kun kwlɛ́ i kpɔfuɛ mun,+yɛ ɔ́ núnnún klɔ’n nunfuɛ nga b’a wuman’n.”
20 Kɛ ɔ wunnin Amalɛki’n, ɔ kɛnnin i ndɛ’n ekun:
“Amalɛki ti nvle’m be nun klikli’n,*+sanngɛ i agualiɛ su’n, ɔ́ núnnún sekeseke.”+
21 Kɛ ɔ wunnin Keninfuɛ mun’n,+ ɔ kɛnnin i ndɛ’n ekun:
“Ɔ tranwlɛ’n wo lika kpa’n nun. Yɔbuɛ’n su yɛ a tran-ɔn.
22 Sanngɛ sran kun wɔ́ Kainin nun.
?Ɔ́ dí le nɲɛ naan Asirifuɛ’m b’a tra wɔ b’a wɔ?”
23 Ɔ kɛnnin i ndɛ’n ekun:
“Amun yako! ?Kɛ Ɲanmiɛn wá yó i sɔ like’n, wan yɛ ɔ́ fíte nun-ɔn?
24 Mmeli’m bé fín Kitimun+ lɔ bé bá,bé wá sáci Asiri mɛn’n,+kpɛkun bé klé Ebɛɛ i ɲrɛnnɛn kpa.
Sanngɛ i kusu, ɔ́ núnnún sekeseke wie.”
25 Kɛ ɔ yoli sɔ’n, Balaamun+ jasoli naan w’a sɛ i sin i klɔ. Balaki kusu fɛli i atin’n ɔli.
Ja ngua lɔ ndɛ mun
^ Ɔ ti waka. Be fɛ i bue nzue’n nin i ngo’n be fa yo palifɛn.
^ Be kwla se ekun kɛ “Yɛ i osu’n nunfuɛ’m bé trán nzue kpanngban nuan.”
^ Nnɛn sɔʹn ti kɛ awɛ sa.
^ Yɛle kɛ, kɛ Izraɛlifuɛ’m be fin Ezipti lɔ fiteli’n, nvle sɔ’n yɛ ɔ dun mmua fali alɛ wlali be sin-ɔn.
