Mmla’n 34:1-12
34 I sin’n, Moizi fɛli i Moabu lɔ lika kpɛtɛkplɛɛ’n nun lɛ ɔli Nebo Oka’n+ su lɔ. Ɔ fuli Pisga+ m’ɔ o Zeriko i ɲrun ndɛnman su’n+ i ti su lɔ. Kpɛkun Zoova fali lika wunmuan’n kleli i. Yɛle kɛ lika ng’ɔ fɛ i Galaadi lele fa ju Dan’n,+
2 nin Nɛftali i lika’n, nin Efraimun nin Manase be lika’n, nin Zida i lika wunmuan’n lele fa ju jenvie ng’ɔ o wia atɔliɛ lɔ’n,*+
3 nin Negɛbu,+ nin Zurdɛn asa’n,+ nin Zeriko m’ɔ ti nglesia klɔ’n i lika kpɛtɛkplɛɛ’n, lele fa ju Zoaa.+
4 I sin’n, Zoova seli i kɛ: “Mɛn nga ti yɛ n tali Abraamun nin Izaaki nin Zakɔbu be nda’n, yɛ ɔ o lɛ-ɔ. N seli kɛ: ‘Mɛn sɔ’n yó ɔ osu’n nunfuɛ’m be liɛ.’+ N yacili ɔ nun naan ɔ ɲinma gua mɛn sɔ’n i wun. Sanngɛ a su juman lɔ.”+
5 Kɛ ɔ yoli sɔ’n, Moizi m’ɔ ti Zoova i sufuɛ’n wuli Moabu mɛn’n nun lɛ, kɛ nga Zoova fa kannin’n sa.+
6 Ɔ sieli i kongo’n nun Moabu mɛn’n nun lɔ, Bɛti-Peɔɔ i ɲrun ndɛnman su lɛ. Andɛ nin andɛ’n, sran fi siman lika trele nga i asieliɛ’n wo’n.+
7 Kɛ Moizi wú’n, nn ɔ le afuɛ ya kun ablaɔn (120).+ Kɛ ɔ́ yó sɔ’n, nn ɔ te wun ase kpa, yɛ ɔ te le wunmiɛn kpa.
8 Izraɛlifuɛ’m be sunnin Moizi Moabu lɔ lika kpɛtɛkplɛɛ’n nun cɛn ba ablasan (30).+ Yɛ cɛn nga be fa yoli Moizi i sɛ’n, mɔ be fa sunnin i’n, be wieli-ɔ.
9 Zozie m’ɔ ti Nɛn i wa’n si ngwlɛlɛ kpa,* afin Moizi fɛli i sa’n fuɛli i su.+ Kɛ ɔ yoli sɔ’n, Izraɛlifuɛ’m be fali ndɛ ng’ɔ kan’n su, kpɛkun be nantili ndɛ nga Zoova kan kleli Moizi’n su sɛsɛsɛ.+
10 Sanngɛ kɛ ɔ fɛ i lɛ’n, b’a wunman Ɲanmiɛn nuan ijɔfuɛ kun mɔ Zoova si i kpa liɛ su*+ kɛ Moizi sa’n,+ Izraɛli mɛn’n nun kun le.
11 Ɔ yoli sa dandan nin abonuan sa kwlaa nga Zoova sunmɛnnin i kɛ ɔ ko yo be Ezipti lɔ Faraɔn nin i sufuɛ’m be kwlaa be ɲrun’n, ɔ nin Ezipti mɛn wunmuan’n nun’n,+
12 kpɛkun ɔ kleli Izraɛlifuɛ’m be kwlaa be ɲrun lɛ kɛ wunmiɛn ng’ɔ o i sa’n nun’n ti dan naan i tinmin’n yo sro.+
Ja ngua lɔ ndɛ mun
^ Yɛle kɛ, Jenvie Dan’n, mɔ be flɛ i ekun kɛ Mediterane’n.
^ Annzɛ “ngwlɛlɛ nga Ɲanmiɛn tinmin’n man’n.”
^ Ebr., “be ɲin ta be wiengu ɲrun.”
