Naɔmun 1:1-15
1 Ndɛ nga ti Ninivu i wun ndɛ.+ Like nga Naɔmun* m’ɔ fin Ɛlkɔsu’n wunnin i aolia nun’n, yɛ fluwa nga kɛn i ndɛ-ɔ.
2 Zoova ti Ɲanmiɛn kun m’ɔ kunndɛ kɛ i kunngba cɛ yɛ be su i-ɔ,+ ɔ tu i klunngbɔ.
Zoova tu i klunngbɔ, yɛ ɔ su wa yi i ya’n i nglo.+
Zoova tu i klunngbɔ i kpɔfuɛ’m be su.
I kpɔfuɛ’m be wun ya o i klun.
3 Zoova faman ya ndɛndɛ,+ sanngɛ i tinmin’n cɛnnin.+
Sran ng’ɔ nin fɔ tulɛ fata’n, Zoova su yaci cɛmɛn i.+
Kɛ ɔ́ bá’n, aunmuan nin seke mɔ be saci like’n be tu,yɛ ɲanmiɛn ble’n ti i ja wun ndutre.+
4 Ɔ ijɔ jenvie’n,+ kpɛkun jenvie’n wie nun.
Yɛ ɔ yo maan nzue ba’m be kwlakwla be wie nun.+
Basan nin Kaamɛli lɔ ijre nin nɲanɲa’m be glɔ,+Liban lɔ ijre nɲrɛ’m be glɔ.
5 I ti’n, oka’m be keje,yɛ kpɔlɛ’m be klo.+
I ɲrun’n ti’n, asiɛ’n jáso kendengleiin,mɛn’n nin be nga be tran su’n, bé jáso sɔ wie.+
6 ?Wan yɛ ɔ kwla jrɛn i ya’n i ɲrun-ɔn?+
?Yɛ wan yɛ ɔ kwla jrɛn i ya ble’n i ɲrun-ɔn?+
I ya’n júe be su kɛ sin sa,yɛ i ti’n, yɔbuɛ tanda’m bé kpúke.
7 Zoova ti kpa.+ Awlabɔɛ blɛ nun’n, ɔ ti fiawlɛ kpa.+
Be nga be fiɛ i sin’n, be ndɛ lo i.*+
8 Ɔ́ fá nzue núnnún i* lika’n,yɛ i kpɔfuɛ’m bé trán aosin nun.
9 ?Zoova i wun ndɛ benin yɛ a kwla cici sie-ɔ?
Ɔ su wa nunnun wɔ sekeseke.
Ɲrɛnnɛn’n su juman kpɛ nɲɔn.+
10 B’a to b’a blabla nun kɛ owieowie mun sa.
Be ti kɛ sran mɔ b’a nɔn biɛli* b’a bo’n sa.
Sanngɛ bé wɔ́ be nun kɛ ijre kee wie sa.
11 Sran kun m’ɔ cici Zoova wun ndɛ’n, ɔ́ fín ɔ nun fíte.
Afɔtuɛ ng’ɔ man’n, ɔ su yoman like fi ye.
12 Ndɛ nga Zoova kan’n yɛ:
“Kannzɛ be le wunmiɛn kpa naan be sɔnnin kpa’n,bé kpɛ́ be bo, kpɛkun be su wunman be kun mlɔnmlɔn.*
N kleli ɔ* ɲrɛnnɛn, sanngɛ n su kleman ɔ ɲrɛnnɛn kun.
13 Ń má búbú i waka m’ɔ fa sieli ɔ kɔmin su’n,+yɛ like ng’ɔ fa cili wɔ’n, ń kpɛ́ nun nɲɔn.
14 Zoova kannin ɔ* ndɛ seli kɛ:
‘Be su boman ɔ dunman kun mlɔnmlɔn.
Nzɔliɛ like nga be fali waka nin like nga be klo i’n be fa yoli mɔ be o ɔ amuin’m be sua’n nun’n, ń búbú be nun.
Ń má kpɛ́ wɔ asieliɛ, afin a timan like fi.’
15 Nian! Sran ng’ɔ bo jasin fɛ’n,m’ɔ kan fɔundi dilɛ ndɛ’n, ɔ fin oka’m be su lɔ ɔsu ba.+
Zida, di ɔ cɛn mun.+ Yia nda nga a tali be’n be nuan,afin sran ng’ɔ timan like fi’n, ɔ su sinman ɔ nun kun.
Bé núnnún i sekeseke.”
Ja ngua lɔ ndɛ mun
^ I bo’n yɛ: “Fɔnvɔfuɛ.”
^ Annzɛ “ɔ nian be lika.”
^ Yɛle kɛ, Ninivu.
^ Annzɛ “ble biɛli.”
^ Be kwla se ekun kɛ “kpɛkun ɔ́ sín.”
^ Yɛle kɛ, Zida.
^ Yɛle kɛ, Asiri.
