Zɔbu 1:1-22
1 Bian kun wo Izi nvle’n nun lɔ’n, be flɛ i kɛ Zɔbu.*+ Ɔ ti sran ndɛnmanfuɛ, ɔ nanti seiin.*+ Ɔ sro Ɲanmiɛn yɛ ɔ kloman kɛ ɔ́ yó sa tɛ bɔɔ kaan sa.+
2 Ɔ wuli ba yasua nso nin ba bla nsan.
3 Ɔ le bua akpi nso (7.000), nin ɲɔnngɔnmin akpi nsan (3.000), nin nannin akpi kun (1.000),* nin aflunmun* ya nnun (500). I sufuɛ’m be kusu be sɔnnin kpanngban kpa. Ɔ maan ɔ ɲannin ɲrun trali Wia Afiliɛ lɔfuɛ’m be kwlakwla.
4 I wa yasua’m be le be cɛn mun sɛsɛsɛ. Kɛ sran kun i cɛn liɛ’n ko ju’n, ɔ sɔ i niaan’m be nun i awlo lɔ. Kɛ bé yó sɔ́’n, be yia be niaan bla nsan mun. Be nin be di like yɛ be nɔn nzan.
5 Kɛ be di be cɛn sɔ mun m’ɔ sin yia nun’n, Zɔbu flɛ be naan ɔ́ yó be sanwun. Kpɛkun ɔ jaso nglɛmun ndɛ kpa’n, ɔ yi tɛ nga kɛ bé yí’n be yra nnɛn’n i kɔlikɔli’n+ be tinuntinun be dunman nun. Afin Zɔbu seli kɛ: “Atrɛkpa’n, min mma’m be yoli sa tɛ yɛ be boli Ɲanmiɛn i sannzan be awlɛn’n nun lɔ.” Kɛ Zɔbu yo sɔ tititi-ɔ.+
6 Cɛn kun mɔ Ɲanmiɛn Kpli i mma’m*+ be ɔli ko jranjrannin Zoova i ɲrun lɛ’n,+ Satan+ fɛli i wun wlali be nun wie.+
7 Yɛ Zoova seli Satan kɛ: “?A fin nin?” Satan tɛli Zoova su kɛ: “N ko nianniannin asiɛ’n su lɔ, n ɔli lɔ wlanwlanlɛ kan.”+
8 Yɛ Zoova seli Satan kɛ: “?A fali ɔ ɲin sieli* min sufuɛ Zɔbu su? Sran fi nin i sɛman asiɛ’n su. Ɔ ti sran ndɛnmanfuɛ, ɔ nanti seiin.*+ Ɔ sro Ɲanmiɛn, yɛ ɔ kloman kɛ ɔ́ yó sa tɛ bɔɔ kaan sa.”
9 Sanngɛ Satan tɛli Zoova su kɛ: “?Be waan Zɔbu sro Ɲanmiɛn ngbɛn?+
10 ?W’a sisiman klangla kun i bɔbɔ+ nin i awlo’n nin i sa nun ninnge’m be kwlaa be wun w’a fa sasaman be? Like kwlaa ng’ɔ yo’n, a yra su maan ɔ yo ye i sa nun.+ Yɛ i nnɛn’m b’a trɛ kpanngban kpa nvle’n nun.
11 Sanngɛ tinngɛ ɔ sa’n nun naan saci i sa nun ninnge’m be ngba naan nian, ɔ́ káci. Sannzan cɛ yɛ ɔ́ jrán ɔ ɲrun ɔ́ bó wɔ-ɔ.”
12 Yɛ Zoova seli Satan kɛ: “Nian, i sa nun ninnge mun yɛ be o lɛ, be o ɔ sa nun. Sanngɛ i bɔbɔ bafuɛ’n, nán maan ɔ sa kɛn i.” Yɛ Satan jasoli Zoova i ɲin bo* lɛ ɔli-ɔ.+
13 Cɛn kun mɔ Zɔbu i mma yasua nin i mma bla’m be o lɛ bé dí like mɔ bé nɔ́n duvɛn be niaan bian ng’ɔ ti be ɲrun kpɛn’n i awlo lɔ’n,+
14 sran kun wa seli Zɔbu kɛ: “Nannin’m be o lɛ bé tú kacɛ, yɛ aflunmun’m be kusu be o be wun lɛ bé dídí,
15 kpɛkun Sabefuɛ’m be wa tɔli be su, be trali be ɔli. Be fali tokofi be kunnin ɔ sufuɛ mun. Min kunngba yɛ n fiteli nun-ɔn, yɛ n ba ɔ kan klelɛ.”
16 I nuan nin-a tɔman, kpɛkun sran kun ekun bali wa seli i kɛ: “Ɲanmiɛn i sin’n* fin ɲanmiɛn su lɔ jrali, ɔ tɔli bua mun nin ɔ sufuɛ’m be afiɛn. Yɛ ɔ yrali be sekeseke. Min kunngba yɛ n fiteli nun-ɔn, yɛ n ba ɔ kan klelɛ.”
17 I nuan nin-a tɔman, kpɛkun sran kun ekun bali wa seli i kɛ: “Kaldefuɛ’m+ be bubuli be wun nun akpasua nsan. Be wa tɔli ɲɔnngɔnmin’m be su, yɛ be trali be ɔli. Be fali tokofi kunnin ɔ sufuɛ mun. Min kunngba yɛ n fiteli nun-ɔn, yɛ n ba ɔ kan klelɛ.”
18 I nuan nin-a tɔman, kpɛkun sran kun ekun bali wa seli i kɛ: “Ɔ mma yasua nin ɔ mma bla’m be o be niaan bian ng’ɔ ti be ɲrun kpɛn’n i awlo lɔ bé dí like, nn bé nɔ́n duvɛn.
19 Kpɛkun é nían-ɔn, aunmuan dan kpa kun m’ɔ fin aawlɛ flɛnnɛn’n nun lɔ’n, ɔ wa finnin sua’n i cɔnjɔ nnan mun. Ɔ maan sua’n bu guali ba’m be su, ɔ kunnin be. Min kunngba yɛ n fiteli nun-ɔn, yɛ n ba ɔ kan klelɛ.”
20 Yɛ Zɔbu jasoli-ɔ. Ɔ titili i wun tralɛ’n nun. I sin’n ɔ yili i ti’n. Kpɛkun ɔ bubu guali asiɛ’n wun gblo! Yɛ ɔ utuli i ɲin ase
21 naan w’a se kɛ:“Kɛ ń fín min nin’n i ku sɛ nun ń fíte’n, min wun ti kplɛn,min wun kplɛn kusu yɛ ń fá sá min sin-ɔn.+Zoova yɛ ɔ mannin-ɔn,+ yɛ Zoova kusu yɛ ɔ fali-ɔ.Maan be manman Zoova i dunman’n tititi.”
22 I kwlaa sɔ’n nun’n, Zɔbu w’a yoman sa tɛ. Yɛ w’a seman kɛ Ɲanmiɛn yoli sa tɛ.*
Ja ngua lɔ ndɛ mun
^ Atrɛkpa i bo’n yɛ: “Sran mɔ be Kpɔ i’n.”
^ Annzɛ “be kwlá sacimɛn i wun.”
^ Ebr., “nannin nɲɔnnɲɔn sɔ lele ya nnun.”
^ Ebr., “aflunmun bla.”
^ Ebre nun ndɛ nga be kacili i Wawle’n nun lɛ’n, be fa kan anzi mun mɔ be ti Ɲanmiɛn i mma mun’n be ndɛ.
^ Ebr., “A fali ɔ awlɛn sieli.”
^ Annzɛ “be kwlá sacimɛn i wun’n.”
^ Ebr., “i ɲrun.”
^ Be kwla se ekun kɛ “angblannan’n.”
^ Annzɛ “w’a faman sa ng’ɔ timan su’n i wie fi w’a guaman Ɲanmiɛn su.”
