Zɔbu 5:1-27
5 “Yaci, kpan naan nian. ?Á ɲán sran tɛ́ ɔ su??Anzi’m be nun onin yɛ á kán ndɛ klé i-ɔ?
2 Afin klunngbɔ’n kún sinnglinfuɛ’n,yɛ konvi’n kún sran ng’ɔ siman sa’n.
3 N wunnin kɛ sinnglinfuɛ’n trali ndin,sanngɛ bé nían-ɔn, b’a bo i tranwlɛ’n i sannzan.
4 I mma’m be su ɲanman be ti kaan sa,bé wɛ́tɛ be klɔ’n i anuan’n nun lɛ,+ sran fi su deman be.
5 I fie’n su like ng’ɔ kpɛ’n, yɛ sran nga awe kun i’n di-ɔ,ɔ fa be owieowie’m be nun bɔbɔ,yɛ i bɔbɔ nin i mma’m be ninnge’m be tɔ aya nun.
6 Afin ninnge nga be kwla yo sran abɔlɛ’n be fifiman ndutre’n nun,yɛ ɲrɛnnɛn’n finman asiɛ’n nun yɛ ɔ fite-ɔ.
7 Afin ɲrɛnnɛn wunlɛ ti yɛ be wu klɔ sran-ɔn,kɛ nga sɛnmlɛn mma’m be tutu kɔ nglo’n sa.
8 Sanngɛ sɛ ɔ ti min’n, nn ń kán klé Ɲanmiɛn,yɛ ń fá sa ng’ɔ o min su’n ń wlá Ɲanmiɛn sa nun,
9 ń kán klé Sran ng’ɔ yo ninnge dandan nga be tra klɔ sran kpɛn’n,mɔ abonuan sa ng’ɔ yo be’n, be siman be nuan’n.
10 Ɔ yo maan nzue tɔ asiɛ’n suyɛ ɔ yo maan nzue guagua fie’m be su.
11 Sran ng’ɔ leman ɲrun’n, ɔ mɛn i su sie i nglo,yɛ sran nga i wla w’a bo’n, ɔ mɛn i su naan ɔ fite nun.
12 Ɔ yo maan like nga gblɛfuɛ’m be sunnzun kɛ bé yó’n, ɔ kpi ase,ɔ maan like nga be yo’n, ɔ yoman ye be sa nun.
13 Ɔ fa ngwlɛlɛfuɛ’m be bɔbɔ be gblɛ’n fa tra be,+ɔ maan ajalɛ nga akunndanfuɛ’m be fa’n, ɔ kpi ase.
14 Wia nun’n, aosin’n yɛ be wun i-ɔ,mindi su bɔbɔ’n, be fuafua be sa kɛ kɔnguɛ sa.
15 Ɔ de be naan be nga tokofi o be nuan nun’n, b’a ɲanman be,ɔ de yalɛfuɛ’n sran ng’ɔ le kwlalɛ’n i sa nun,
16 ɔ maan be nga be leman ɲrun’n, be le like kun be fa cici be wla,sanngɛ sran tɛ’m be liɛ’n, be ɲanman nuan be kanman ndɛ.
17 Nian! Sran nga Ɲanmiɛn tu i fɔ’n, i liɛ su ti ye.I sɔ’n ti’n, kɛ Sran m’ɔ Kwla Like Kwlaa Yo’n kle ɔ ngwlɛlɛ’n, nán kpalo i!
18 Afin ɔ fa ɲrɛnnɛn yi sran su, sanngɛ ɔ cici kannin’n su.Ɔ fufu i, sanngɛ i bɔbɔ* yo maan ɔ yo juejue.
19 Ɔ́ yó maan á fín ɲrɛnnɛn nsiɛn nun fíte,i nso su’n bɔbɔ su yoman ɔ like fi.
20 Kɛ awe’n kpɛn’n, ɔ́ dé wɔ wie’n i sa nun,yɛ alɛ’n nun’n, ɔ́ yó maan tokofi su ɲanman wɔ.
21 Ɔ́ sásá ɔ naan be nga be nuan’n+ yo ya kɛ ɲantiaan sa’n, b’a ɲanman wɔ,yɛ kɛ bé wá sáci lika’n, srɛ su kunman wɔ.
22 Kɛ lika’n wá sáci’n mɔ awe’n wá kpɛ́n’n, á srí,yɛ a su sroman blo nnɛn mun.
23 Afin blo lɔ yɔbuɛ’m be su yoman ɔ abɔlɛ,*yɛ blo nnɛn nga be o fie su lɔ’n, be nin ɔ trán fɔuun.
24 Á wá wún kɛ ɔ tannin sua’n nun ti fɔuun,yɛ kɛ á wá níannían ɔ nnɛn mun’n, á wún kɛ wie fi w’a tuman nun.
25 Á wá wú ba kpanngban kpa,ɔ osu’n nunfuɛ’m bé sɔ́n kpanngban kɛ asiɛ’n su ijre’n sa.
26 Kɛ á kɔ́ ndia’n nun’n, nn a te le wunmiɛn kpa,kɛ ble* ja nga be kpɛ be i blɛ’n su sɛsɛsɛ’n sa.
27 Nian! E buli su akunndan lelele. Kusu kɛ ɔ ti sɔ-ɔ.Sie ɔ su tie naan fa su.”
Ja ngua lɔ ndɛ mun
^ Ebr., “i bɔbɔ i sa’n.”
^ Annzɛ “be nin ɔ trá aenguɛ, be nin ɔ dí anuansɛ.”
^ Annzɛ “ɔɔzu.”
