Zɔbu 6:1-30
6 Yɛ Zɔbu tɛli su kɛ:
2 “Ee! Sɛ ɔ ti kɛ be kwla sunnzun awlabɔɛ+ ng’ɔ o min su’n i kwlaa’n,naan be fa uka min ɲrɛnnɛn’n su naan be sie be toe kun su’n sa’n!
3 Afin ɔ yo nɔnnin tra jenvie’m be nuan aunɲan’n.I sɔ’n ti yɛ n kannin ndɛ finfin-ɔn.*+
4 Afin Sran m’ɔ Kwla Like Kwlaa Yo’n, i ta mma’m be fitifitili min,yɛ be bɔyre’n yɛ n nɔn-ɔn.+Ɲanmiɛn su yo min like yaya, yɛ srɛ dan kpa kun min.
5 ?Sɛ blo aflunmun’n+ ɲan ijre di’n, ɔ́ kpán??Annzɛ sɛ nannin tola’n ɲan ijre di’n, ɔ́ kpán?
6 ?Aliɛ ng’ɔ yoman fɛ’n, sɛ b’a guaman nun njin’n be kwla di??Annzɛ ijre nga be flɛ i kɛ gimovu’n, i nzue’n kwla yo fɛ?
7 Min waan n kanman ninnge sɔ mun.Be ti kɛ like tɛ wie yɛ b’a fa gua min aliɛ’n nun sa.
8 Ee! Maan n ɲan like nga n srɛ’n nin-o,yɛ maan Ɲanmiɛn fa like nga min wla o su’n man min!
9 Maan Ɲanmiɛn wɛtɛ min piɛ,yɛ maan ɔ tinndin i sa’n naan ɔ wiewie min.+
10 Afin i sɔ’n bɔbɔ yɛ ɔ́ fɔ́nvɔ min-ɔn.Kannzɛ ɔ yo ya kpa’n, ń tú kpɛ́n, aklunjɔɛ’n ti,afin m’an kpaloman Sran m’ɔ ti Sanwun’n i nuan ndɛ’n.+
11 ?N te le wunmiɛn n te minndɛ ekun?+?Yɛ ngue yɛ ɔ o min ɲrun lɔ mɔ i ti yɛ ɔ fata kɛ n tran nguan nun ekun-ɔn?
12 ?N le wunmiɛn kɛ yɔbuɛ sa??Yɛ min wunnɛn ba’n ti aaba?
13 Ninnge nga n kwla fa ti min wun ɲanman nun’n, be kwlaa b’a fi min sa.?Ɔ maan ngue yɛ ɔ o lɛ mɔ n kwla fa uka min wun-ɔn?
14 Sran ng’ɔ fata kɛ ɔ klo i wiengu titi mɔ kusu ɔ yoman sɔ’n,+ɔ su sroman Sran m’ɔ Kwla Like Kwlaa Yo’n kun.+
15 Min bɔbɔ min niaan’m b’a kpɛ min bo waka+ kɛ ayrɛ blɛ’n nun nzue ba m’ɔ sonji’n sa,kɛ ayrɛ blɛ’n nun nzueba mɔ b’a wie nun sekeseke’n sa.
16 Laglasi’n dunnin be,laglasi ng’ɔ fin nglo lɔ gua munkɛnmunkɛn m’ɔ kloli’n, ɔ fia be nun.
17 Sanngɛ kɛ i blɛ’n ko ju’n, be wie nun, be wunman be kun.Kɛ lika’n lo’n, be wu kee.
18 Be bli kɔ lika uflɛ.Be sonji kɔ aawlɛ flɛnnɛn’n nun lɔ, kpɛkun be wunman be osu kun.
19 Aata difuɛ nga be fin Tema’n,+ be kunndɛ be.Ajalɛ tufuɛ nga be fin Saba’n,*+ be minndɛ be.
20 Ɲannzuɛn kun be, afin be lafili be su ngbɛn.Be kɔ lele be ju lɔ, sanngɛ be ɲanman like fi.
21 Min ɲrun’n, kɛ amun a yo kɛ ngalɛ’n sa.+Amun wunnin kɛ n su wun min ɲrun kpa, kpɛkun srɛ kun amun.+
22 ?N seli kɛ amun man min like??Annzɛ n seli kɛ amun fa amun aɲanbeun ninnge’n wie cɛ min?
23 ?N seli kɛ be de min min kpɔfuɛ’n i sa nun??Annzɛ be de min* be nga be kle min ɲrɛnnɛn’n be sa nun?
24 Amun kle min ngwlɛlɛ naan n muan min nuan.+Amun uka min naan n wun fɔnlɛ nga n fɔnnin’n.
25 Ndɛ ng’ɔ ti nanwlɛ’n, ɔ yoman ya.+?Sanngɛ ijɔlɛ nga amun ijɔ sran’n, ɔ kwla yo i ye?+
26 ?Amun a cici min wun ndɛ naan amún bú min fɔ, ndɛ nga n kannin’n ti??Sran mɔ i wla w’a bo i wun’n i nuan nun ndɛ+ mɔ aunmuan’n su fa kɔ’n ti?
27 Asa ekun’n, amun tu aika ba’n i wun fɔtɔ,+yɛ amun bɔbɔ amun janvuɛ sa’n, amun yo i atɛ.+
28 Ɔ maan siɛn’n, maan amun kpɛ amun ɲin wa naan amun nian min,afin n su buaman ato n kleman amun.
29 Amun yaci, amun bu i akunndan kpa ekun. Nán amun kpli di min jɔlɛ.Amun bu i sin kpa ekun afin n te nanti seiin.
30 ?Ndɛ ng’ɔ fin min nuan fite’n, ɔ timan su??Sa ng’ɔ timan su’n, n kwlá wunmɛn i wlɛ?
Ja ngua lɔ ndɛ mun
^ Annzɛ “m’an buman ndɛ’n i sin naan m’an kan-ɔn.”
^ Annzɛ “Sabefuɛ nga be tu ajalɛ likawlɛ’n.”
^ Ebr., “be kpɔ min ti.”
