Zoɛli 2:1-32
2 “Amun bo awɛ’n Siɔn lɔ.+
Amun kpan alɛ kpanlɛ oka m’ɔ ti min liɛ klonglo’n su.Maan nvle nunfuɛ’m* be usu,
afin Zoova i cɛn’n su wa ju,+ w’a mantan koko.
2 Cɛn sɔ’n yó aosin tritritri, yɛ lika’n lú,+cɛn sɔ’n nun’n, nzue’n mlán tuun yɛ lika’n lú tritritri,+kɛ lika m’ɔ su titi oka’m be su aliɛ njɛnniɛn su’n sa.
Nvle kun o lɛ’n, i nunfuɛ’m be sɔnnin yɛ be le wunmiɛn kpa.+Be nin-a wunmɛn i wunsu le,yɛ afuɛ’m bé sín lele,sanngɛ be su wunmɛn i wunsu le.
3 Sin kun yra ninnge mun be ɲrun wa,yɛ sin kun saci ninnge mun be sin lɔ.+
Lika ng’ɔ nannan be ɲrun lɔ’n, ɔ ti kɛ Edɛnin lɔ fie klanman’n sa,+sanngɛ be sin lɔ’n ti aawlɛ flɛnnɛn, like fi w’a kaman lɛ,yɛ like fi su kwlá fiteman nun.
4 Wafa nga be ti’n ɔ ti kɛ nnɛn kpanngɔ mun sa,yɛ be wanndi kɛ nnɛn kpanngɔ nga be fa kun alɛ’n sa.+
5 Kɛ bé tú kpɛ́n oka’m be ti su lɔ mɔ a ti be ngan’n, ɔ waan kakaklolo mun-ɔn,+ɔ waan sin dan kun su yra ijre kee’n sa.
Ɔ waan nvle kun mɔ i nunfuɛ’m be le wunmiɛn kpa’n b’a jranjran naan be su wa kun alɛ sa.+
6 Be ti’n, sran’m be wla bó be wun.
Be kwlaa be ɲrun’n káci.
7 Be sua be wun kɔ kɛ alɛ kunfuɛ mun sa,be fu talɛ’n su kɛ sonja mun sa,nga fɛ i ɲrun atin liɛ’n kɔ trelele, nga fɛ i ɲrun atin liɛ’n kɔ trelele,yɛ be nun kun sa kpaci kɔman lika uflɛ.
8 Be nun wie fi sumɛn i wiengu bo.Sran kun sin i atin liɛ’n su.
Sɛ alɛ ninnge’m be ɲan wie mun naan be tɔ’n,be onga’m be wanndiman.
9 Be kpa klɔ’n nun sa waa, be wanndi klɔ’n i wun talɛ’n su.
Be fu sua’m be wun, yɛ be sin fenɛtri’m be nun kɛ awiefuɛ wie sa.
10 Kɛ bé bá’n, nvle’n usu sa tututu, yɛ ɲanmiɛn m’ɔ la nglo lɔ plaii’n kejekeje.Wia’n nin anglo ba’n be lu sa tuun,+
yɛ nzraama’m be kpajaman kun.
11 Zoova mɛn i nɛn’n su i sonja’m be ɲrun,+ afin i sonja’m be sɔnnin kpa.+
Afin sran ng’ɔ yiɛ i ndɛ’n i nuan’n, ɔ le wunmiɛn kpa.Afin Zoova i cɛn’n ti cɛn dan, ɔ yo sro dan.+
?Wan yɛ ɔ kwla trɛ i awlɛn cɛn sɔ’n nun-ɔn?”+
12 Zoova se kɛ: “Dɔ nga su’n, ɔ nin-a yoman tɛ. Amun tu amun klun be sa be sin min wun wa,+amun ci nglɛmun,+ amun sun, yɛ amun yi ngwlɛ.
13 Nán amun titi amun tralɛ’m be nun,+ amun titi amun awlɛn bafuɛ’n nun,+naan amun sa amun sin Zoova m’ɔ ti amun Ɲanmiɛn’n i wun,afin ɔ si aunnvɔɛ, ɔ yaci sa cɛ, ɔ faman ya ndɛndɛ,+ yɛ ɔ klo sran dan.+I liɛ’n, ɔ su faman ɲrɛnnɛn’n yiman amun su kun.*
14 ?Sɛ ɔ́ káci aniɛn naan ɔ́ fá ajalɛ uflɛ-o,* wan yɛ ɔ si nun-ɔn?+Atrɛkpa’n, ɔ́ yrá amun su,ɔ maan amún kwlá fá ble annzɛ i wunsu like, nin nzan bé mán Zoova m’ɔ ti amun Ɲanmiɛn’n.
15 Amun bo awɛ be sin Siɔn’n nun.
Amun bo ndolo kɛ be ci nglɛmun. Amun yia be aɲia ngunmin kun bo.+
16 Amun flɛflɛ sran mun. Amun yo nzrafuɛ’m be sanwun.+
Amun yiayia oke* mun. Amun yia ba kanngan nin ba nɔnman mun.+
Maan yasua nga w’a ja bla uflɛuflɛ’n fin i sua ba’n nun fite, yɛ maan bla nga w’a ja bian uflɛuflɛ’n ɔ fin i sua ba’n nun fite.
17 Maan Ɲanmiɛn ɲrun jranfuɛ mɔ be ti Zoova i sufuɛ’n,be jran Ɲanmiɛn i sua’n i lika ng’ɔ ti fleiin kpa’n nin tɛ yiwlɛ’n be afiɛn’n nun+ naan be sun be se kɛ:
‘Ee Zoova, si ɔ nvle’n nunfuɛ’m be aunnvɔɛ.Nán tran lɛ naan be yo ɔ aja like’n i finfin,nán tran lɛ naan nvle uflɛ sie be.
?Sɛ nvle nga be o lɛ’n, be se kɛ: “Be Ɲanmiɛn kpa’n, ɔ o nin li’n,” i sɔ’n nin i fata?’+
18 Kpɛkun Zoova tú i klun sɛ́sɛ́ i nvle’nyɛ ɔ́ sí i nvle nunfuɛ’m be aunnvɔɛ.+
19 Zoova tɛ́ i nvle nunfuɛ’m be su kɛ:
‘Ń má blɛ́ amun ble nin ɔɔzu, nin duvɛn uflɛuflɛ, ɔ nin ngo,yɛ ɔ́ jú amun lelele.+N su yaciman amun lɛ kun naan amun sokpa nvle kun ngalɛ’m be ɲrun.+
20 Sran ng’ɔ o nglo lɔ lika’n nun’n, ń kɛ́n i bo naan ɔ wɔ amun wun mmua.Ń tó i yí i lika kee kun nun. Lika sɔ’n ti aawlɛ flɛnnɛn yɛ sran fi tranman lɔ.Ń fɛ́ i sonja nga be dun mmua i ɲrun’n ń kɔ́ jenvie ng’ɔ o wia afiliɛ lɔ’n* i wun lɔ.Ń fɛ́ i sonja nga be o siɛn’n ń kɔ́ jenvie ng’ɔ o wia atɔliɛ lɔ’n* i wun lɔ.
Ɔ́ bɔ́n lele i nvan’n fú nglo lɔ,i wun nvan’n fú nglo lɔ sa trilili.+Afin Ɲanmiɛn wá yó sa dandan mun.’
21 Nvle, nán srɛ kun wɔ.
Maan ɔ klun jɔ yɛ di aklunjɔɛ, afin Zoova wá yó sa dandan mun.
22 Nnɛn mun, amun mɔ amun o blo lɔ’n, nán srɛ kun amun,afin aawlɛ’n nun lɔ ijre’m bé fú kpa,+yɛ waka’m bé sú mma.+Figie waka’n nin viɲin’n bé sú lelele.+
23 Siɔn lɔfuɛ mun, maan amun klun jɔ yɛ amun di aklunjɔɛ Zoova m’ɔ ti amun Ɲanmiɛn’n ti.+Afin ɔ́ yó maan nzue klikli* nga amun miɛn i wun’n ɔ́ tɔ́,yɛ ɔ́ yó maan nzue’n tɔ́ lelele,nzue klikli mun ninnzue kasiɛn’m* bé tɔ́ kɛ laa’n sa.+
24 Amun ble nin ɔɔzu bowlɛ’n bé yí piɛ,yɛ duvɛn uflɛuflɛ’n ɔ́ bú duvɛn yiwlɛ’n nun gúa,yɛ ngo’n bú ngo yiwlɛ’n nun gúa.+
25 Like nga lalo ng’ɔ le ndɛwa’n, nin lalo ng’ɔ leman ndɛwa’n, nin lalo ng’ɔ saci ninnge mun’n, nin lalo ng’ɔ di like kwlaa ng’ɔ o i atin’n su’nbe dili i afuɛ kpanngban’n, ń síe i osu,min sonja kpanngban sɔ mun yɛ n sunmannin be naan be to amun lɔ-ɔ.+
26 Nanwlɛ, amún dí like lele amun ku yí,+yɛ amún bó amun Ɲanmiɛn Zoova i dunman fɛ,+i yɛ ɔ́ yó abonuan sa mun mán amun-ɔn.
Min nvle’n nunfuɛ’m be su wunman ɲannzuɛn kun.+
27 Kpɛkun amún sí kɛ n wo Izraɛlifuɛ’m be afiɛn sakpa+naan Zoova m’ɔ ti amun Ɲanmiɛn’n yɛle min,+ naan Ɲanmiɛn uflɛ fi nunman lɛ.
Min nvle’n nunfuɛ’m be su wunman ɲannzuɛn kun.
28 I sin’n, ń fá min wawɛ’n ń mán+ sran wafawafa kwlaa.Amun mma yasua mun nin amun mma bla’m bé íjɔ min nuan.Amun sran oke’m bé wún sa wie mun laliɛ nun,Yɛ amun gbanflɛn’m bé wún sa wie mun aolia nun.+
29 Min sufuɛ yasua mun nin min sufuɛ bla mun bɔbɔ’n,ń fá min wawɛ’n ń mán be blɛ sɔ’n nun.
30 Kpɛkun ń yó abonuan sa mun ɲanmiɛn su lɔ nin asiɛ’n su.Bé wún mmoja nin sin, ɔ nin wunsrɛn m’ɔ́ fíte lukuu’n.+
31 Wia’n káci tuun yɛ anglo ba’n káci mmoja+i sin naan Zoova i cɛn dan m’ɔ yo sro’n w’a ju.+
32 Yɛ sran kwlaa ng’ɔ bo Zoova i dunman’n,ɔ́ fíte nun.+Afin kɛ nga Zoova fa kannin’n sa’n, Siɔn Oka’n su lɔ nin Zerizalɛmun lɔ’n, sran wie’m bé fíte nun,+be nga bé ká nguan nun sɔ’n, Zoova yɛ ɔ flɛ be-ɔ.”
Ja ngua lɔ ndɛ mun
^ Annzɛ “asiɛ’n sufuɛ mun.”
^ Annzɛ “ɲrɛnnɛn nga i waan ɔ́ fá yí amun su’n, ɔ́ yó i nsisɔ.”
^ Annzɛ “naan ɔ́ yó i nsisɔ-o.”
^ Annzɛ “kpɛnngbɛn.”
^ Yɛle kɛ, Jenvie ng’ɔ ti Njin Nzue Klakla’n.
^ Yɛle kɛ, Mediterane’n.
