Ezai 13:1-22
13 Ndɛ nga Amɔzu i wa Ezai+ wunnin i aolia nun m’ɔ kan wɔ Babilɔnin’n yɛ:+
2 “An man nzɔliɛ like kun*+ su yɔbuɛ oka mɔ like fi fifiman su’n i su lɔ.An kpan flɛ be, an toto amun sa mun,i liɛ’n, bé kwlá sín wlengbifuɛ’m be anuan’m be nun.
3 N kannin ndɛ n kleli be mɔ n kpali be’n,*+n yiali min sonja mɔ kɛ bé dí aklunjɔɛ’n be tu be wun’n,naan be tu min klunngbɔ.
4 An sie amun su! Sran wie’m be o oka’n su lɔ,ɔ ti kɛ be sɔnnin kpa sa!An sie amun su! Famiɛn diwlɛ’m be keje yekee,nvlenvle mɔ b’a yia likawlɛ’n be kejeman aɔwi,+Zoova m’ɔ ti sonja’m be su kpɛn’n, ɔ su yiayia sonja mun naan be ko kun alɛ.+
5 Zoova nin i ya dan’n i alɛ kunlɛ ninnge munbe fin mɛn kun m’ɔ o mmua kpa’n nun lɔ,+be fin ɲanmiɛn m’ɔ la nglo lɔ plaii’n i tiwa lɔ be su ba,bé bá naan bé sáci asiɛ wunmuan’n.+
6 An kpan kekle kpa, afin Zoova i cɛn’n w’a mantan koko!Ɔ́ fín Sran m’ɔ Kwla Like Kwlaa Yo’n, yɛ ɔ́ sáci like.+
7 I sɔ’n ti’n, sran’m be kwlaa be sa’m bé glɔ́glɔ́ be wun,yɛ sran’m be kwlaa be su ɲanman awlɛn kun,* srɛ m’ɔ́ kún be’n ti.+
8 Nvlefuɛ’m be wla w’atɔ blo,+be usu, yɛ be wunnɛn’n nun yo be yakɛ bla kun mɔ w’a koto awuliɛ’n sa,be nian be wiengu ɲrun siin, srɛ kun be dan kpa,be ɲrun’n w’a kpa sa fuaii, kokolɛ dan’n ti.
9 An nian! Zoova i cɛn’n ɔ su ba,ɔ ti ɲrɛnnɛn cɛn, ɔ ti ya cɛn, ɔ ti ya m’ɔ jue kɛ sin sa’n i cɛn,ɔ́ bá naan mɛn’n kaci lika kun m’ɔ yo sro-ɔ,+Yɛ ɔ́ núnnún sa tɛ yofuɛ mun mɛn’n nun.
10 Afin nzraama mɔ be o ɲanmiɛn su lɔ’n, ɔ nin nzraama kwle mun*+be su kpajaman kun,kɛ wia’n fíte’n ɔ́ yó tuun,yɛ anglo’n su taman.
11 Ń úsa asiɛ’n sufuɛ’m be sa, be sa tɛ’n ti,+yɛ ń úsa klunwifuɛ’n i sa i fɔnlɛ’n ti.Ń yó maan wun tufuɛ’m be wun tulɛ’n wíe,yɛ ń yó maan be nga be yo sran’m be finfin’n be wun dandan yolɛ’n ɔ́ kán ase.+
12 Ń yó maan klɔ sran’n ɔ́ yó kɛ sika ɔkwlɛ jrɛiin mɔ be tɛmɛn i wun’n sa,+klɔ sran’m bé yó kɛ Ofii lɔ sika ɔkwlɛ mɔ be tɛmɛn i wun’n sa.+
13 I sɔ’n ti’n, Zoova m’ɔ ti sonja’m be su kpɛn’n i ya dan’n i cɛn’n nun’n, i ya m’ɔ jue kɛ sin sa’n i cɛn’n nun’n,Ɲanmiɛn m’ɔ la nglo lɔ plaii’n ɔ́ úsu,yɛ asiɛ’n kéje, ɔ́ jáso kan ɔ o lɛ’n.+
14 Be tinuntinun bé sá be sin be bɔbɔ be nvle’n nun,be tinuntinun bé wánndi kɔ́ be bɔbɔ be mɛn’n nun,+bé yó kɛ wannzannin kun mɔ be su di i wun koniɛn’n sa, bé yó kɛ nnɛn mɔ be leman kankanfuɛ’n sa.
15 Sran kwlaa nga be wun i’n, bé fá like bé wɔ́ i,yɛ sran kwlaa nga be trɛ i’n bé fá tokofi bé kún i.+
16 Bé wɛ́tɛ be mma mun be bɔbɔ be ɲin bo lɛ,+bé fɛ́n be sua’m be nun ninnge mun,yɛ be nin be yi’m bé lákekle nun.
17 Ń má fá Medifuɛ mun ń bá be su,+be liɛ’n, be ndɛ nunman sika ndɛ nun,yɛ be buman sika ɔkwlɛ’n i like fi.
18 Be ta mma’m bé títí gbanflɛn’m be nun,+be su siman be klun ba’m be aunnvɔɛ,be su yoman be annvɔ.
19 Kpɛkun Babilɔnin m’ɔ le ɲrun dan tra famiɛn diwlɛ’m be kwlaa’n,+m’ɔ ti Kaldefuɛ mun be aɲrunɲan like nin be nuan dilɛ like’n,+ɔ́ yó kɛ Sodɔmun nin Gomɔru mɔ Ɲanmiɛn yili be ase’n sa.+
20 Sran fi su tranman lɔ kun le,sran fi su tranman lɔ kun mlɔnmlɔn.+Arabu’m be su kplanman be tannin sua lɛ,yɛ nnɛn kankanfuɛ wie fi su fɛmɛn i nnɛn mun kɔman lɔ.
21 Aawlɛ flɛnnɛn’n nun lɔ nnɛn mun bé lá lɔ,akpatue nga be su’m be ti tɛnndɛn’n bé yí be sua mun piɛ,klɔnsoklo’m bé trán lɔ,+yɛ blo boli’m* bé tú kpɛ́n lɔ.
22 Nnɛn nga be kpan kekle kpa’n bé kpán i sua fleiin’m be nun,yɛ blo alua’m bé kpán i sua kpakpa mɔ be ti nglanman kpa’n be nun,Babilɔnin i blɛ’n w’a mantan koko, yɛ be su tumɛn i cɛn’n be kɔman siɛn.+
Ja ngua lɔ ndɛ mun
^ Annzɛ “waka kun m’ɔ ti nzɔliɛ like’n.”
^ Ebr., “min sran mɔ n kpali be sieli be ngunmin’n.”
^ Ebr., “be awlɛn’n kló be klun.”
^ Ebr., “i Kesili mun,” atrɛkpa’n Oriɔn, annzɛ nzraama kwle nga be mɛntɛn i’n be ndɛ yɛ be kan-ɔn.
^ Be kwla se ekun kɛ “mmusu mɔ be ti kɛ boli sa’n.”
