Ezai 14:1-32
14 Afin Zoova wá sí Zakɔbu i aunnvɔɛ,+ ɔ́ wá fá Izraɛli ekun.+ Ɔ́ wá yó maan bé kó trán* be mɛn’n nun lɔ ekun,+ yɛ aofuɛ’m bé sú be su, kpɛkun bé fá be wun bé mántan Zakɔbu i awlo’n nunfuɛ mun.+
2 Nvle wie’m bé wá fá be kɔ́ be bɔbɔ be lika’n nun lɔ, kpɛkun Izraɛli i mma’m bé fá be yó be kanga yasua nin be kanga bla mun+ Zoova i mɛn’n nun. Be nga be wlali be bisua’n, siɛn’n be yɛ bé wá wlá be bisua-ɔ. Kpɛkun bé síe be nga be miannin be laa kɛ be di junman kekle’n.*
3 Cɛn nga Zoova yó mɔ amún wá ɲán amun ti afɛ’n, nin awlabɔɛ’n, nin kanga dilɛ’n nun’n,+
4 amún wá bú ɲanndra ng’ɔ o yɛ’n bé wɔ́ Babilɔnin famiɛn’n,* amún sé kɛ:“Sran ng’ɔ miɛn i wiengu mun kɛ be di junman’n,* i liɛ w’a wie!Ɲrɛnnɛn klelɛ’n w’a wie!+
5 Zoova w’a bubu klunwifuɛ’m be waka’n nun,w’a bubu siefuɛ’m be kpɔnman’n nun,+
6 sran m’ɔ bo nvlenvle mun ya su titi’n,+sran m’ɔ sie nvlenvle mun ya su m’ɔ kle be yalɛ titi’n.+
7 Asiɛ wunmuan’n su lo wunmiɛn siɛn’n, i su w’a tɔ fɔuun.Sran’m be kpan aklunjɔɛ kpanlɛ.+
8 Zenevrie waka mun bɔbɔ’n, be di aklunjɔɛ ɔ dunman nun ti,yɛ Liban lɔ sɛdri waka’m be kusu be di aklunjɔɛ wie.Be se kɛ: ‘Kɛ ɔ fin cɛn mɔ a tɔli’n,waka kpɛfuɛ’m be baman e kpɛlɛ kun.’
9 Ndia’n* bɔbɔ m’ɔ o asiɛ’n i bo lɔ’n, i wun blibli i kpa,kɛ á bá’n, ɔ́ sɔ́ ɔ nun.Afin ɔ dunman nun’n, ɔ tinnge be nga be wuli mɔ be kwlá yoman like fi kun’n,ɔ tinnge asiɛ’n su siefuɛ mɔ be kle sran’m be yalɛ’n* be kwlaa.Ɔ yo maan nvlenvle’m be famiɛn’m be kwlaa be jaso be famiɛn bia’m be su.
10 Be kwlaa be ijɔ, be usa wɔ kɛ:‘?W’a yo fakafaka kɛ e sa wie??W’a kaci kɛ e sa?
11 B’a fa ɔ wun tulɛ’n,ɔ nin ɔ miziki bolɛ ninnge mɔ be le ɲanman’n be tɛlɛ’n+ b’a yi be Ndia’n* nun lɔ.Sɔnniɛn’m b’a yo kɛ bɛ sa ɔ bo,kakaa mun yɛ be ti ɔ kondro’n niɔn.’
12 Aliɛ njɛnniɛn’n i wa, wɔ mɔ a kpaja’n,nian kɛ w’a fin ɲanmiɛn su lɔ w’a tɔ-ɔ!Wɔ mɔ a kwlali nvlenvle mun’n,+nian kɛ b’a kpɛ ɔ bo b’a yi wɔ asiɛ’n su-ɔ!
13 A se ɔ klun lɔ kɛ: ‘Ń má fú ɲanmiɛn su lɔ.+Ń má fá min famiɛn bia’n ń síe i Ɲanmiɛn i nzraama’m be ti su nglo lɔ.+Kpɛkun ń trán aɲia yolɛ oka’n su lɔ,nglo lɔ lika’n i mmuammua kpa lɔ.+
14 Ń má fú ɲanmiɛn ble’n i ti su nglo lɔ.Yɛ ń yó min wun kɛ Ɲanmiɛn m’ɔ o Like Kwlaa Ti Su’n sa.’
15 Sanngɛ bé wá fá wɔ bé yí i Ndia’n* nun lɔ,kunman’n i bo mmua kpa lɔ.
16 Be nga bé wún wɔ’n, bé nían wɔ siin,bé níannían wɔ kpa, kpɛkun bé úsa kɛ:‘?Sran m’ɔ yo maan asiɛ’n keje’n,m’ɔ yo maan famiɛn diwlɛ’m be usu’n,+ i yɛ ɔ o yɛ?
17 ?Sran m’ɔ yo maan asiɛ’n kaci kɛ aawlɛ flɛnnɛn sa’n,m’ɔ utu klɔ mun’n,+m’ɔ yacimɛn i bisuafuɛ’m be nun naan be wɔ be awlo’n,+ i yɛ ɔ o yɛ?’
18 Nvlenvle’m be famiɛn onga’m be kwlaa’n,be sieli be klanman,be tinuntinun be o be asieliɛ’m* be nun sɛsɛsɛ.
19 Sanngɛ ɔ liɛ’n, be yili ɔ blo, w’a ɲanman asieliɛ.Á yó kɛ waka’n i wun ng’ɔ fɛfɛli* mɔ be klomɛn i’n sa,b’a fa sran mɔ be fali tokofi kunnin be’n,mɔ be to be yili i kunman kun mɔ yɔbuɛ’m be o nun’n i nun’n b’a kata ɔ su,á yó kɛ fuɛn mɔ b’a tiɛtiɛ i su’n sa.
20 A su toman be ndia’n nun lɔ,afin a sacili ɔ bɔbɔ ɔ mɛn’n,a kunnin ɔ bɔbɔ ɔ nvle’n nunfuɛ mun.Be su boman klunwifuɛ’m be dunman kun le.
21 Amun siesie i mma’m be kunlɛ lika kun,be nannan’m be sa tɛ’n ti,kɛ ɔ ko yo naan b’a jasoman naan b’a faman asiɛ’n,naan b’a kplanman be klɔ’m b’a yiman mɛn’n ti.”
22 Zoova m’ɔ ti sonja’m be su kpɛn’n waan: “Ń má jáso be wun.+
Ń núnnún be dunman’n, ɔ nin be nga be kali lɛ’n, ɔ nin be mma mun, ɔ nin be nga bé wá jáso su’n Babilɔnin klɔ’n nun.”+ Zoova yɛ ɔ kan sɔ-ɔ.
23 “Ń má yó maan Babilɔnin káci kpɛnzɛ’m be lika, ɔ́ káci fɔkɔ lika. Ń má fá nunnunlɛ kuanwla’n ń kúɛnkúɛn i.”+ Zoova m’ɔ ti sonja’m be su kpɛn’n yɛ ɔ kan sɔ-ɔ.
24 Zoova m’ɔ ti sonja’m be su kpɛn’n, ɔ tali nda kɛ:“Kɛ nga n fa sunnzunnin’n sa’n, saan ɔ́ kpɛ́n su,like nga n seli kɛ ń yó’n, saan i nuan yía.
25 Ń má kpɔ́tɔ Asirifuɛ’n min mɛn’n nun,yɛ ń tíɛtíɛ i su min oka’mbe su.+Kpɛkun ń yí waka ng’ɔ fa sieli min nvlefuɛ’m be kɔmin su’n,ń yí i trɔ’n be wati su.”+
26 Like nga be seli kɛ bé fá yó asiɛ wunmuan’n yɛ ɔ o lɛ-ɔ.Ɲanmiɛn i sa ng’ɔ tinngɛli i nvlenvle’m be kwlaa be wun’n* yɛ ɔ o lɛ-ɔ.
27 ?Zoova m’ɔ ti sonja’m be su kpɛn’n w’a fa ajalɛ,wan yɛ ɔ kwla yo naan w’a kpɛnman su-ɔ?+?W’a tinngɛ i sa’n nun,wan yɛ ɔ kwla kɛn i ase-ɔ?+
28 Afuɛ nga i nun yɛ Famiɛn Akazi wuli’n,+ be kannin ndɛ yɛ’n:
29 “Filisti, nán ɔ nunfuɛ wie fise kɛ, kɛ mɔ b’a bubu sran ng’ɔ bo wɔ’n i waka’n nun ti’n, ɔ́ dí aklunjɔɛ.Afin wuo+ kun m’ɔ le bɔyre’n, ɔ́ fín wuo’n i osu’n*+ nun fíte,i osu’n ɔ́ yó wuo kun m’ɔ le bɔyre kpa’n, m’ɔ i wun kpɛ kpa’n.*
30 Kɛ wun ase kanfuɛ’m be mma klikli’m bé dí like’n,mɔ yalɛfuɛ’m bé lá diin mɔ sa fi su ɲanman be’n,ń má fá awe ń kún ɔ osu’n,*Kpɛkun bé kún ɔ osu ng’ɔ́ ká lɛ’n.+
31 Ee, anuan, kpan kekle! Ee, klɔ, kpan!Ee, Filisti, ɔ nunfuɛ’m be kwlaa be sa sin búbú be!Afin wunsrɛn kun fin nglo lɔ lika’n nun su ba,yɛ be nun wie fi kaman siɛn.”
32 ?Be nga be sunman be nvle’n nun’n, bé tɛ́ be su sɛ?Bé sé be kɛ Zoova w’a wla Siɔn i bo ase,+naan i nvle’n nun wun ase kanfuɛ’m bé wá kó fía lɔ.
Ja ngua lɔ ndɛ mun
^ Annzɛ “bé ló wunmiɛn.”
^ Annzɛ “be junman su kpɛn mun.”
^ Annzɛ “amún yó i finfin.”
^ Annzɛ “Junman su kpɛn’n.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Ebr., “boli yasua mun.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Ebr., “be sua mun.”
^ Annzɛ “waka sama.”
^ Annzɛ “i sa m’ɔ su wa yo be like yaya’n.”
^ Ebr., “olui’n.”
^ Annzɛ “wuo kun m’ɔ yra fiaan’n, m’ɔ tu’n.”
^ Ebr., “olui’n.”
