Ezai 18:1-7
-
Be kan ndɛ’n be wɔ Etiopi (1-7)
18 Nvle nga i nun lɔ’n, be ti kakaa’m be ndɛwa’m be tɛlɛ’n,m’ɔ o Etiopi+ nzue ba’m be asa’n su lɔ’n, i yako!
2 Ɔ sunmɛn i janunfuɛ mun jenvie’n su,be fu mmeli mɔ papirisi yɛ be fa yoli be’n, mɔ be sin nzue’m be su’n be nun, be se kɛ:“An wɔ, amun mɔ kɛ be sunman amun’n amun kɔ ndɛndɛ’n,an wɔ nvle kun mɔ i nunfuɛ’m be ti tɛnndɛn’n, mɔ be kplo’n ti mlanmlan’n be sin,an wɔ sran mɔ be sro be lika kwlaa nun’n be sin,+an wɔ nvle kun m’ɔ le wunmiɛn’n, m’ɔ kwla’n,*mɔ nzue ba’m be fɛ i asiɛ’n be kɔ’n i sin.”
3 Amun kwlaa nga amun o mɛn’n nun’n, mɔ amun tran asiɛ’n su’n,like nga amún wún i’n, ɔ́ yó kɛ nzɔliɛ like kun* mɔ b’a kplɛn i oka’m be su’n sa,kpɛkun amún tí like kun tɛlɛ kɛ nnɛn wɛ wie yɛ be su fita nun sa.
4 Afin ndɛ nga Zoova kan kleli min’n yɛ:“Ń trán diin yɛ ń nían min lika m’ɔ o lɛ titi’n,*kɛ wia m’ɔ lo fiaan m’ɔ kpaja’n sa,kɛ awunyɛyɛ nun ninnge’m be kpɛlɛ blɛ nun bɔlɛ ufue munnduun’n sa.
5 Afin ka naan ninnge’m be kpɛlɛ blɛ’n w’a ju’n,kɛ waka’m be nɲrɛ bolɛ blɛ’n ko sin’n, mɔ be nɲrɛ’m be kaci viɲin mma mɔ be blo’n,bé wá fá laliɛ mɔ be fa kpɛkpɛ waka sama mun’n bé kpɛ́kpɛ́ i sama mun,bé kpɛ́kpɛ́ i ɲanman kanngan mun, kpɛkun bé gúa be lɔ.
6 Bé yáci be anunman mɔ be di nnɛn’n mɔ be o oka’m be su’n be sa nun,bé yáci be asiɛ’n su nnɛn’m be sa nun.Munngun nun’n, anunman mɔ be di nnɛn’n bé trántrán be su,kpɛkun ninnge’m be kpɛlɛ blɛ’n nun’n, asiɛ’n su nnɛn’m be kwlaa bé fú be su.
7 Blɛ sɔ nun’n, bé cɛ́ Zoova m’ɔ ti sonja’m be su kpɛn’n i like,bé fá like nvle kun mɔ i nunfuɛ’m be ti tɛnndɛn’n, mɔ be kplo’n ti mlanmlan’n i nun lɔ bé bá,sran mɔ be sro be lika kwlaa nun’n, bé fá like bá,nvle kun m’ɔ le wunmiɛn’n, m’ɔ kwla’n,*mɔ nzue ba’m be fɛ i asiɛ’n be kɔ’n, ɔ́ fá like bá,bé fá bá lika mɔ Zoova m’ɔ ti sonja’m be su kpɛn’n i dunman’n wo su’n i nun, yɛle kɛ bé fá bá Siɔn Oka’n su.”+
Ja ngua lɔ ndɛ mun
^ Annzɛ “nvle kun mɔ be cuɛn i-ɔ, ɔ cuɛnman’n, m’ɔ kwla’n.”
^ Annzɛ “waka kun m’ɔ ti nzɔliɛ like’n.”
^ Be kwla se ekun kɛ “Kɛ n wo min lika m’ɔ o lɛ titi’n nun lɔ’n, ń trán diin ń nían.”
^ Annzɛ “nvle kun mɔ be cuɛn i-ɔ, ɔ cuɛnman’n, m’ɔ kwla’n.”
