Ezai 22:1-25
22 Be kan ndɛ nga be wɔ Kongo nga be Wun Aolia nun Ninnge’m be nun’n:*+?Ngue sa yɛ ɔ juli ɔ su mɔ i ti yɛ ɔ nun sran’m be kwlaa be fuli sua’m be ti’m be su-ɔ?
2 Laa’n, be talo ɔ nun lɔ woo,a ti klɔ mɔ i nun keje yekee-ɔ, a ti aklunjɔɛ klɔ.Ɔ sran nga be wuli’n, nán tokofi yɛ be fa kunnin be-ɔ.Yɛ kusu nán alɛ nun yɛ be wuli-ɔ.+
3 Ɔ siefuɛ mɔ be tin sran’m be su’n, be kwlaa be wanndili.+B’a toman be wun ta bɔbɔ, sanngɛ be trali be wlali be bisua.Be kwlaa nga be wunnin be’n, be trali be wlali be bisua.+Be nga be wanndi ɔli mmua’n bɔbɔ’n, be trali be wie.
4 I sɔ’n ti’n, n seli kɛ: “Nán amun nian min kun,amun yaci min lɛ maan n sun sunlɛ kpa.+Min nvle’n i wa bla’n* i nunnunlɛ’n ti’nnán amun se kɛ saan fii amún fɔ́nvɔ min.+
5 Cɛn sɔ’n nun’n, e Min m’ɔ Sie Like Kwlakwla’n, Zoova m’ɔ ti sonja’m be su kpɛn’n,ɔ fali sannganlɛ nin ɲrɛnnɛn, ɔ nin srɛ dan kpa+ yili iKongo nga be Wun Aolia nun Ninnge’m be nun’n i su.Be su bubu talɛ’n,+yɛ be kpanlɛ’n ɔ tɛ oka’n su lɔ.
6 Elamun+ w’a fa ta mma pata’n,ɔ nin kakaklolo mun nin nnɛn kpanngɔ mun,*Kii+ w’a fa ɲrɛn’n w’a fite.*
7 Alɛ kunlɛ kakaklolo’m bé wá yíɔ kongo’m be nun kpafuɛ mun,nnɛn kpanngɔ mun* bé jránjrán anuan’n nun,
8 Bé wá yí like ng’ɔ sasa Zida’n.*
“Cɛn sɔ’n nun’n, amun ɲin wá trán alɛ kunlɛ ninnge nga be o Bo Sua’n+ nun lɔ’n be sin,
9 yɛ amún wá wún toklo kpanngban nga be o Davidi Klɔ’n i wun talɛ’n nun’n.+ Yɛ amún sá nzue bé gúɛ i nzue guawlɛ+ ng’ɔ o ngua lɔ’n nun.
10 Amún wá ká sua nga be o Zerizalɛmun klɔ’n nun’n, yɛ amún búbú sua mun, amún yó maan talɛ’n jrán cinnjinnjin.
11 Amún wá yó nzue guawlɛ kun talɛ nɲɔn’m be afiɛn naan amún fá nzue ng’ɔ o nzue guawlɛ laa’n nun’n bé gúa nun. Sanngɛ amun su nianman i Yifuɛ Dan’n, yɛ amun su nianman Sran ng’ɔ yoli i laa’n.
12 Cɛn sɔ’n nun’n, e Min m’ɔ Sie Like Kwlakwla’n, Zoova m’ɔ ti sonja’m be su kpɛn’n,ɔ́ sé kɛ be sun, yɛ be yo sɛ,+be yi be ti’n, yɛ be wla bajɛ tralɛ.
13 Sanngɛ bé dí cɛn, yɛ be klun jɔ́,bé kún nannin, yɛ békún bua,bé dí nnɛn, yɛ bé nɔ́n duvɛn.+‘Maan e di like, yɛ e nɔn nzan, afin ainman é wú.’”+
14 Kpɛkun Zoova m’ɔ ti sonja’m be su kpɛn’n, ɔ kannin ndɛ yɛ’n kleli min, ɔ seli kɛ: “‘N su yaciman amun fɔnlɛ nga n cɛman amun le naan amun a wu.’+ Ndɛ nga Miɛn m’ɔ Sie Like Kwlakwla’n, Zoova m’ɔ ti sonja’m be su kpɛn’n, ɔ kan’n yɛ ɔ o lɛ-ɔ.”
15 Ndɛ nga e Min m’ɔ Sie Like Kwlakwla’n, Zoova m’ɔ ti sonja’m be su kpɛn’n, ɔ kan’n yɛ: “Kɔ Sɛbna+ sin, kɔ like sunianfuɛ sɔ m’ɔ nian awlo’n* su’n i sin naan se i kɛ:
16 ‘?Ngue yɛ a le i wa-ɔ? ?Yɛ ɔ osufuɛ benin yɛ ɔ o wa mɔ i ti yɛ a kpɛ ɔ asieliɛ’n wa-ɔ?’ Ɔ kpɛ i asieliɛ’n lika nglonglo kun su, ɔ kpɛ i wunmiɛn lolɛ lika kun* yɔbuɛ buɛ kun nun.
17 Nian! Nja bian, Zoova wá tɛ́ wɔ ase kekle kpa, ɔ́ wá trá wɔ kekle kpa.
18 Ɔ́ ɲɔ́nɲɔ́n wɔ kekle kpa, kpɛkun ɔ́ tó wɔ kɛ balɔn sa ɔ́ yí i mɛn dan kun nun. Á wú lɔ, yɛ ɔ kakaklolo nglanman mun bé ká lɔ, ɔ́ yó ɔ min’n i sua’n i ɲannzuɛn like.
19 Ń yó maan ɔ junman’n ɔ́ fí ɔ sa, ń tú wɔ ɔ junman’n nun.
20 “‘Cɛn sɔ’n nun’n, ń flɛ́ min sufuɛ Eliakimun+ m’ɔ ti Ilkia i wa’n,
21 kpɛkun ń fá ɔ tralɛ tɛnndɛn’n ń wlɛ́ i wun, ń fá ɔ cisu’n ń cí i afiɛn kpa,+ ń fá ɔ kwlalɛ’n ń wlɛ́ i sa nun. Kpɛkun ɔ́ káci Zerizalɛmunfuɛ mun nin Zida i awlo’n nunfuɛ’m be si.
22 Ń fá Davidi i awlo’n i lakle’n+ ń fá síe i wati su. Sɛ ɔ tike anuan’n, sran fi su kwlá ɲinman, yɛ sɛ ɔ ɲin’n, sran fi su kwlá tikeman.
23 Ń bóbó i kɛ kpɛngbɛ sa lika kpa kun nun, kpɛkun ɔ́ yó kɛ famiɛn bia kun m’ɔ le ɲrun’n sa i si i awlo’n nun.
24 Bé wá fɛ́ i si i awlo’n nun aɲrunɲan’n kwlaa bé sénde i wun, ba mun-o, osufuɛ mun-o, kpongbo kanngan’m be kwlaa-o, kpongbo ba mun-o, nzue sɛ dandan’m be kwlaa-o.
25 “Zoova m’ɔ ti sonja’m be su kpɛn’n se kɛ: ‘Cɛn sɔ’n nun’n, bé tú kpɛngbɛ nga be boboli i lika kpa’n nun’n,+ bé kpɛ́ kpɛkun ɔ́ tɔ́, yɛ ninnge nga be sende su’n bé gúa, yɛ bé sáci, afin Zoova bɔbɔ yɛ ɔ kannin sɔ-ɔ.’”
Ja ngua lɔ ndɛ mun
^ Ɔ ti weiin kɛ Zerizalɛmun i ndɛ yɛ be kan-ɔn.
^ Atrɛkpa’n, aunnvɔɛ silɛ’n i ndɛ yɛ be waan bé kán-ɔn.
^ Annzɛ “nnɛn kpanngɔ su fufuɛ mun.”
^ Annzɛ “w’a siesie ɲrɛn’n.”
^ Annzɛ “nnɛn kpanngɔ su fufuɛ mun.”
^ Annzɛ “Bé wá yí Zida i tannin’n.”
^ Annzɛ “famiɛn sua’n.”
^ Ebr., “tranwlɛ kun.”
