Ezai 23:1-18
-
Be kan ndɛ’n be wɔ Tir (1-18)
23 Be kan ndɛ nga be wɔ Tir:+Taasisi mmeli mun,+ an kpan kekle!Afin be sacili mmeli jranwlɛ’n, be kwlá wluman lɔ,Kitimun+ mɛn’n nun lɔ yɛ be kannin ndɛ sɔ’n be kleli be-ɔ.
2 Amun mɔ amun tran mɛn kun m’ɔ o jenvie’n i nuan lɔ’n nun’n, an gua bliin.Aata difuɛ mɔ be fin Sidɔn+ lɔ mɔ be kpɛ jenvie’n, b’a yi ɔ piɛ.
3 Be fali Siɔɔ*+ lɔ fie’m be su ninnge’m be mma mun,be fali Nili asa’n su lɔ fie’m be su ninnge mɔ be kpɛli be’n, i akatua’n, be sinnin nzue kpanngban su,nvlenvle’m be nvasuɛ’n niɔn.+
4 Ee Sidɔn, wɔ mɔ a ti jenvie nuan lɔ fiawlɛ’n, maan ɲannzuɛn kun wɔ,afin jenvie’n seli kɛ:“Ba wulɛ aklunya w’a tɔman min su, m’an wuman ba,m’an taman ba yasua, yɛ m’an taman ba bla.”*+
5 Kɛ be tili Ezipti+ i su ndɛ’n be klun titili be.I wafa kunngba’n kɛ bé wá tí Tir i su ndɛ’n, be klun títí be wie.+
6 An kpɛ nzue’n be wɔ Taasisi!Amun mɔ amun tran mɛn kun m’ɔ o jenvie’n i nuan lɔ’n nun’n, an kpan kekle!
7 ?Amun klɔ mɔ laa’n i nunfuɛ’m be di aklunjɔɛ’n, mɔ kɛ ɔ fɛ i i bo bolɛ nun’n be di aklunjɔɛ’n, i yɛ ɔ o yɛ?Laa’n, i ja’m be fɛ i kɔ mɛn mɔ be o mmua kpa’n be nun naan ɔ ko tran lɔ.
8 ?I mɔ laa’n ɔ cɛcɛ famiɛn kle mun’n,mɔ i aata difuɛ’m be ti sran dandan’n,mɔ be ɲin yi i ninnge atɛ yofuɛ mun asiɛ wunmuan’n su’n,wan yɛ ɔ seli kɛ maan sa sɔ’n ju i su-ɔ?+
9 Zoova m’ɔ ti sonja’m be su kpɛn’n, i bɔbɔ yɛ ɔ seli kɛ maan sa sɔ’n ju-ɔ.Ɔ yoli sɔ naan i wun m’ɔ tu’n i klanman’n ti’n, ɔ wie,naan ɔ́ gúa be kwlaa nga be ɲin yi be asiɛ wunmuan’n su’n be ɲin ase.+
10 Ee Taasisi i wa bla, sin ɔ mɛn’n nun kɛ NiliNzue’n sa,mmeli bobowlɛ wie fi nunman lɛ kun.*+
11 Ɔ tinngɛli i sa’n jenvie’n su.Ɔ kejeli famiɛn diwlɛ mun,Zoova seli kɛ maan be nunnun Fenisi lɔ fiawlɛ mun.+
12 Kpɛkun i waan: “Sidɔn i wa bla, wɔ mɔ a nin-a siman bian’n, mɔ be kle wɔ yalɛ’n,a su diman aklunjɔɛ kun,+jaso, kpɛ nzue’n naan kɔ Kitimun.+Sanngɛ lɔ bɔbɔ’n, a su loman wunmiɛn.”
13 Amun nian Kaldefuɛ’m+ be mɛn’n.Nvle nga i nunfuɛ’m be bɔbɔ yɛ be yoli maanɔ yoli aawlɛ flɛnnɛn nun lɔ nnɛn’m be lika-ɔ, nán Asiri-ɔ.+Be kplannin be alɛ kunlɛ ninnge fleinflein mun,kpɛkun be bubuli i sua fleinflein mun,+ɔ maan ɔ kacili yɔbuɛ kwle.
14 Taasisi lɔ mmeli mun, an kpan kekle,afin be sacili amun fiawlɛ’n.+
15 Blɛ sɔ’n nun’n, be wla fí Tir su afuɛ ableso (70),+ ɔ́ yó kɛ famiɛn kun i nguan blɛ’n* sa. Kɛ afuɛ ableso’n (70) ko sin’n, Tir klɔ’n ɔ́ wá yó kɛ tekle bla nga be kɛn i ndɛ jue nga nun’n sa:
16 “Ee tekle bla, wɔ mɔ be wla fili ɔ su’n, fa ɔ jru’n, bo sin yia klɔ’n.Bo ɔ jru’n i kpa.To jue kpanngban,i liɛ’n, be wla wá kpɛ́n ɔ su.”
17 Kɛ afuɛ ableso’n (70) ko sin’n, Zoova wá kpɛ́ i ɲin Tir klɔ’n su lɔ ekun, yɛ ɔ́ ɲɛ́n i akatua’n ekun, kpɛkun ɔ nin mɛn wunmuan’n nun famiɛn diwlɛ’m be kwlaa bé sí sua asiɛ’n su.
18 Sanngɛ like ng’ɔ́ wá ɲɛ́n i’n, ɔ nin i akatua’n bé yó ninnge mɔ be ti Zoova i liɛ klonglo-ɔ. Be su tiantianman be nuan, be su sieman be lɛ, afin i akatua’n ɔ́ yó be nga be tran Zoova ɲrun’n be liɛ. I liɛ’n, bé dí like bé ku yí, yɛ bé wlá tralɛ nglanman mun.+
Ja ngua lɔ ndɛ mun
^ Yɛle kɛ, Nili Nzue’n i sama kun.
^ Ebr., “bla mɔ be nin-a siman bian’n.”
^ Be kwla se ekun kɛ “mmeli jranwlɛ wie fi nunman lɛ kun.”
^ Ebr., “i cɛn mun.”
