Ezai 28:1-29
28 Efraimun+ i nzanbɔɛfuɛ’m be famiɛn kle* m’ɔ yo ɲɛnmɛn’n,* i yako!I klanman dan m’ɔ ti kɛ waka nɲrɛ mɔ w’a glɔ’n sa’n,m’ɔ o be nga duvɛn’n w’a bo be’n be kongo mɔ i asiɛ’n yo like ye kpa’n i ti su nglo’n, i yako!
2 An nian! Zoova le i sran kun m’ɔ le wunmiɛn kpa, m’ɔ le kwlalɛ kpa-ɔ.Ɔ ti kɛ nzraama mɔ kɛ nzue tɔ́’n ɔ gua’n sa, ɔ ti kɛ aunmuan dan m’ɔ saci like’n sa.Ɔ ti kɛ nzue dan mɔ kɛ ɔ́ tɔ́’n angblannan’n tɛ’n sa,ɔ́ wá tɛ́ i ase kekle kpa.
3 Bé wá tíatía+Efraimun i nzanboɛfuɛ’m be famiɛn kle mɔ be yo ɲɛnmɛn’n* be su.
4 Yɛ i klanman’n i nɲrɛ mɔ w’a glɔ’n,m’ɔ o kongo mɔ i asiɛ’n yo like ye kpa’n i ti su nglo’n,ɔ́ yó kɛ figie nga be su ka naan munngun’n w’a ju’n be su mma’n sa.Kɛ sran kun wun i’n, ɔ ti, kpɛkun w’a ka lɛ w’a mɛn.
5 Cɛn sɔ’n nun’n, Zoova m’ɔ ti sonja’m be su kpɛn’n ɔ́ wá káci i nvlefuɛ nga be kali lɛ’n be famiɛn kle kun m’ɔ yo ɲɛnmɛn-ɔn. Ɔ́ káci be famiɛn kle kun mɔ be fali waka nɲrɛ be yoli’n.+
6 Ɔ́ káci be nga be di jɔlɛ’n be sa nuan su sɛsɛ yolɛ wawɛ, ɔ́ mán be nga be jran anuan’n nun mɔ be fuan be kpɔfuɛ nga be fa alɛ wla be sin’n, be wunmiɛn.+
7 Sran sɔ’m be kusu’n, duvɛn’n ti’n be fa atin tɛ su.Nzan m’ɔ bo’n, ɔ yo maan be bo tanngan.Nzan m’ɔ bo’n ti’n, Ɲanmiɛn ɲrun jranfuɛ mun nin Ɲanmiɛn nuan ijɔfuɛ’m be fa atin tɛ su,duvɛn’n ti’n, be wunman sa wlɛ.Nzan m’ɔ bo’n ti’n be bo tanngan,be aolia nun like nga be wun i’n ɔ fa be sie atin tɛ su,be kwlá faman ajalɛ kpa.+
8 Be tabli’m be su’n ti fiɛ kainkain ngunmin,i lika fi nunman lɛ m’ɔ ti yɛiin-ɔn.
9 ?Wan yɛ bé klé i ngwlɛlɛ-ɔ??Yɛ wan yɛ bé yíyí ndɛ’n nun bé klé i-ɔ??Be nga b’a kpɛ be wunflɛn uflɛuflɛ mun-ɔn??Be nga b’a ti be wunflɛn su uflɛuflɛ mun-ɔn?
10 Afin be se kɛ: “Maan be yo nga, i sin’n be yo nga, be yo nga, i sin’n be yo nga,mmla nga nin mmla nga, mmla nga nin mmla nga,*+kan o wa, kan o le sa.”
11 Ɔ maan bɛbɛlifuɛ mun,* ɔ nin aniɛn kun mɔ nvlefuɛ’m be timan’n, be lika yɛ ɔ́ sín yɛ ɔ́ kán ndɛ klé nvle nga i nunfuɛ mun-ɔn.+
12 Laa’n, ɔ seli be kɛ: “Wunmiɛn lolɛ lika kun yɛ. Sran nga w’a fɛ’n maan ɔ lo wunmiɛn. Lika fɔuun kun yɛ.” Sanngɛ b’a kplinman su kɛ bé tíe i ndɛ’n.+
13 Ɔ maan ndɛ nga Zoova wá kán klé be’n yɛ:“Be yo nga, i sin’n be yo nga, be yo nga, i sin’n be yo nga,mmla nga nin mmla nga, mmla nga nin mmla nga,*+kan o wa, kan o le sa.”Ɔ maan kɛ bé nánti’n,be ja kplá, bé tɔ́ yɛ bé lánga be ɲin aanga,yɛ be nun búbú, bé tɔ́ aya nun kpɛkun bé trá be.+
14 Ɔ maan amun tie Zoova i ndɛ’n, amun mɔ amun di amun nuan’n,amun mɔ amun sie nvlefuɛ nga mun Zerizalɛmun lɔ’n.
15 Afin amun se kɛ:“E nin Wie’n y’a tra aenguɛ,+e nin Ndia’n* y’a tra aenguɛ.*Kɛ nzue dan’n ɔ́ wá bá’n,ɔ su ɲanman e,afin e fali ato’n e yoli e fiawlɛ,kpɛkun e fiali gblɛ’n i nun.”+
16 I sɔ’n ti’n, ndɛ nga e Min Zoova m’ɔ Sie Like Kwlakwla’n ɔ kan’n yɛ:“An nian! N su fa yɔbuɛ kun m’ɔ ti kekleke kpa’n+ n fa wla sua bo ase Siɔn lɔ,i yɛ ɔ ti sua cɔnjɔ su yɔbuɛ cinnjin kpafuɛ+ mɔ be fa wla sua bo ase m’ɔ jran cinnjin’n niɔn.+Sran ng’ɔ lafi su’n i akunndan su sannganman.+
17 Ń má fá sa nuan su sɛsɛ yolɛ’n ń yó like sunnzunlɛ ɲanman,+yɛ ń fá sa kpa yolɛ’n ń yó ɲanman mɔ sunmun o i nuan’n.+Nzraama mɔ kɛ nzue tɔ́-ɔ ɔ gua’n, ɔ́ sáci ato’n i fiawlɛ’n,yɛ nzue’n dí fiawlɛ lika’n.
18 Aenguɛ nga amun nin Wie’n be trali’n, ɔ́ sáci,aenguɛ nga amun nin Ndia’n* be trali’n, ɔ su yoman ye.+Kɛ nzue dan’n ɔ́ wá bá’n,ɔ́ kpɔ́tɔ amun,
19 blɛ kwlaa ng’ɔ́ bá’n,ɔ́ fá amun kɔ́.+Afin ɔ́ bá nglɛmun kwlaa,ɔ́ bá wia nun, ɔ́ bá kɔnguɛ.Srɛ dan m’ɔ́ wá kún be’n, i ngunmin ti yɛ bé wún ndɛ nga be tili’n i wlɛ-ɔ.”*
20 Afin bɛ’n ti tika dan ti’n, be kwlá tinngɛman bewun nun,yɛ kondro’n ti kaan dan ti’n, be kwlá fa kataman be wun.
21 Afin Zoova wá jáso kɛ Perazimun Oka’n su lɔ liɛ’n sa.Ɔ́ wá kéje i wun kɛ ng’ɔ fa yoli i kongo ng’ɔ o Gabaɔn+ i wun lɔ’n i nun lɔ’n sa,naan ɔ́ yó sa kun, ɔ́ yó abonuan sa kun,yɛ ɔ́ dí i junman’n, i junman m’ɔ ti i liɛ ngunmin’n.+
22 Siɛn’n, amun yaci sran’m be finfin yolɛ,+Sɛ ɔ timɛn i ti’n, bé mían ɲanman nga be fa cili amun’n nun,afin n tili ndɛ nga e Min m’ɔ Sie Like Kwlakwla’n, Zoova m’ɔ ti sonja’m be su kpɛn’n ɔ kannin’n,w’a sunnzun kɛ ɔ́ núnnún mɛn wunmuan’n.+
23 Amun sie amun su, amun tie min aniɛn’n,amun sie amun su kpa, amun tie ndɛ nga n kan’n.
24 ?Kacɛ tufuɛ’n ɔ fa cɛn wunmuan’n tutu lika’n ka naan w’a lua like mma’n??Ɔ ka asiɛ’n i nun fundunlɛ’n nin i ye siesielɛ’n su sa trilili?+
25 ?Kɛ ɔ ko siesie asiɛ’n i ye’n,ɔ sanndiman kimɛn ble’n, yɛ ɔ luaman kimɛn??Ɔ taman ble nin mile, ɔ nin ɔɔzu kan ɔ fata kɛ ɔ ta be lɛ’n??Yɛ ɔ luaman epotri*+ fie’n i nuan su?
26 Afin i Ɲanmiɛn’n kle i like,ɔ kle i atin ng’ɔ ti kpa’n.*+
27 Afin be faman waka paplapa nga be fa bo ble’n+ be boman kimɛn ble’n,yɛ be faman kakaklolo’n i ja’n be sinman kimɛn’n su.Sanngɛ waka tiaan kun yɛ be fa bo kimɛn ble’n niɔn,kpɛkun waka kaan kun yɛ be fa bo kimɛn’n niɔn.
28 ?Like kɛ ble sa mɔ bé wá fá yó kpanwun’n, be fufu nun?Cɛcɛ, be kɛmɛn i bolɛ’n su sa trilili.+Kɛ sran kun fɛ i kakaklolo mɔ nnɛn kpanngɔ’m be cuɛn’n i ja mun sin su’n,ɔ fufumɛn i.+
29 I sɔ’n kusu fin Zoova m’ɔ ti sonja’m be su kpɛn’n,mɔ i afɔtuɛ’n* yo ɲɛnmɛn’n,mɔ sa ng’ɔ yo be’n be ti dandan’n.*+
Ja ngua lɔ ndɛ mun
^ Annzɛ “m’ɔ yo i wun dandan’n”, “m’ɔ tu i wun’n.”
^ Ɔ ti weiin kɛ Efraimun i klɔ dan mɔ yɛle Samari’n i ndɛ yɛ be kan-ɔn.
^ Annzɛ “mɔ be yo be wun dandan’n”, “mɔ be tu be wun’n.”
^ Annzɛ “like sunnzunlɛ ɲanman kun wo like sunnzunlɛ ɲanman kun su, like sunnzunlɛ ɲanman kun wo like sunnzunlɛ ɲanman kun su.”
^ Ebr., “be nga be nuan bui’n tɔn bɛbɛli’n.”
^ Annzɛ “like sunnzunlɛ ɲanman kun wo like sunnzunlɛ ɲanman kun su, like sunnzunlɛ ɲanman kun wo like sunnzunlɛ ɲanman kun su.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Be kwla se ekun kɛ “e nin Ndia’n e yoli maan aolia nun ndɛ kun kpɛnnin su.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Be kwla se ekun kɛ “Kɛ bé wá wún i wlɛ’n, srɛ dan kpa kún be.”
^ Ɔ ti kɛ ble mma sa.
^ Annzɛ “ɔ tu i fɔ.”
^ Annzɛ “like ng’ɔ sunnzun kɛ ɔ́ yó’n.”
^ Annzɛ “mɔ i ngwlɛlɛ’n ti dan’n.”
