Ezai 3:1-26
3 Afin an nian! Zoova m’ɔ ti sonja’m be su kpɛn’n, m’ɔ ti e Min kpafuɛ’n,ɔ su yi like kwlaa nga sran’m be fa be wla gua su’n, ɔ nin like nga be sa miɛn i wun’n Zerizalɛmun nin Zida lɔ,yɛle kɛ kpanwun’n nin nzue’n be kwlaa,+
2 safuɲrɛn’n, ɔ nin alɛ kunfuɛ’n,jɔlɛ difuɛ’n nin Ɲanmiɛn nuan ijɔfuɛ’n,+ wunnzue yifuɛ’n nin kpɛnngbɛn’n,
3 sonja ablenun su kpɛn’n,+ sran ng’ɔ le ɲrun kpa’n, afɔtuɛ manfuɛ’n,sran ng’ɔ si atrɛ yi kpa’n, ɔ nin sran ng’ɔ si wuo ɲrun ngowa kan kpa’n.+
4 Ń yó maan ba yasua kanngan mun bé yó be su sran dandan,yɛ sran mɔ be kwlá lafimɛn i su’n yɛ ɔ́ síe be-ɔ.
5 Nvlefuɛ’m bé klé be wiengu yalɛ,sran kun klé i wiengu kun’n i yalɛ.+Ba yasua kan’n ɔ́ yó kpɛnngbɛn’n i like yaya,yɛ sran mɔ be bumɛn i wie’n, ɔ́ fɛ́ i ɲin wláwlá sran ng’ɔ le ɲrun’n.+
6 Sran kun trɛ́ i niaan bian i si i awlo’n nun, kpɛkun ɔ́ sé kɛ:“A le tralɛ dan kun, ɔ maan yo e su kpɛn.Yo lika mɔ w’a bubu yɛ’n i su kpɛn.”
7 Sanngɛ ɔ su kplinman su cɛn sɔ’n nun, ɔ́ sé kɛ:“Nán min yɛ ń míanmían amun kannin’n niɔn.*N leman aliɛ, yɛ n leman tralɛ min awlo lɔ.Nán an fa min sie i nvlefuɛ’m be su kpɛn.”
8 Afin Zerizalɛmun i ja kplali,yɛ Zida tɔli,afin be nuan nun ndɛ’n nin be ayeliɛ’n kle kɛ b’a jaso Zoova wun,be yo ɲin kekle i m’ɔ le ɲrun’n i su.*+
9 Wafa nga be ɲrun’n fa ti’n, ɔ yi wafa nga be ti’n i nglo,yɛ be kan be sa tɛ’m be ndɛ kɛ Sodɔmun sa.+Be fiaman su,be yako, afin be su fa ɲrɛnnɛn be yi i be bɔbɔ be su!
10 Se sa kpa yofuɛ’m be kɛ be liɛ yó ye.Bé ɲán like nga be yo’n i nuan like.*+
11 Klunwifuɛ’n i yako!Ɲrɛnnɛn wá tɔ́ i su,afin like ng’ɔ fɛ i sa yoli’n, bé wá fá yó i wie.
12 Min nvlefuɛ’m be liɛ’n, be junman su kpɛn mun be kle be yalɛ,yɛ bla mun yɛ be sie be-ɔ.Min nvlefuɛ mun, amun ɲrun dinfuɛ’m be yo maan amun wlan daan,yɛ be yo maan amun wunman atin nga amunko fa’n.+
13 Zoova su buɛbuɛ i wun naan ɔ́ kán ndɛ,w’a jaso naan ɔ́ bú nvlenvle’m be fɔ.
14 Zoova wá dí i nvlefuɛ’m be su kpɛn mun, ɔ nin be sran dandan mun be jɔlɛ.“Amun yrali viɲin fie’n,yɛ like nga amun wuɛli i yalɛfuɛ’n i sa nun’n, ɔ o amun sua’m be nun.+
15 ?Ngue ti yɛ amun kle min nvlefuɛ’m be yalɛmɔ amun kpɔtɔ yalɛfuɛ’n i ɲrun’n ndutre nun-ɔn?”+ Ndɛ nga Miɛn m’ɔ Sie Like Kwlakwla’n, Zoova m’ɔ ti sonja’m be su kpɛn’n ɔ kan’n yɛ ɔ o lɛ-ɔ.
16 Zoova waan: “Kɛ mɔ Siɔn i mma bla’m be tu be wun’n,mɔ kɛ bé nánti’n be ti’n jin su’n ti’n,*mɔ be kacikaci be ɲinma, mɔ be tu kpɛn’n ti’n,mɔ be yo maan be ja kɔmin nun nga’m be tɛ’n ti’n,
17 Zoova wá yó maan awlowlɛ tátá Siɔn i mma bla’m be ti’n su.Yɛ Zoova wá yó maan be ngban’n su’n ɔ́ yó treketreke.+
18 Cɛn sɔ’n nun’n, Zoova wá yí be wun klanman yolɛ ninnge mun:Be ja kɔmin nun nga mun, be ti bo cilɛ ninnge mun, ɔ nin nɛnnglɛnman mɔ be yoli i kɛ anglo ba mɔ w’a fi uflɛuflɛ’n sa’n,+
19 asunmanndi mun, be sanga mun, ɔ nin tannin fɛtɛfɛtɛ mun,
20 be ti kle mun, nin be ja kɔmin nun ɲanman mun, ɔ nin be afiɛn cilɛ kplo mun,be palifɛn sɛ mun, ɔ nin be wun sasalɛ ninnge mun,
21 be sa mma ti nga mun nin be bue nun nga mun,
22 cɛn dilɛ tralɛ tɛnndɛn mun, tralɛ m’ɔ jra be kli’n, tralɛ dandan mun, ɔ nin pata kanngan mun,
23 niannun+ mɔ be le sa’n, ɔ nin lɛn tralɛ mun,*luku mun, ɔ nin tannin fɛtɛfɛtɛ mun.
24 Ninnge saciwa mun be bɔnlɛ’n, ɔ́ sín bomie ngo+ m’ɔ bɔn fannin’n i osu.Ɲanman’n sín be bo cilɛ kplo’n i osu.Be ti kpawa’n sín be ti mɔ be yo i klanman’n i osu.+Bajɛ tralɛ’n sín tralɛ m’ɔ le gua kpa’n i osu.+Be wun kannvuɛn mun* yɛ bé wún be-ɔ, be su wunman be klanman’n i kun.
25 Bé fá tokofi bé kún ɔsran mun,yɛ alɛ’n dí ɔ safuɲrɛn mun.+
26 Siɔn i anuan’m bé kplín yɛ bé yó sɛ,+Siɔn trán asiɛ wun, awlabɔɛ’n nun.”+
Ja ngua lɔ ndɛ mun
^ Annzɛ “Nán min yɛ ń yó amun juejue-ɔ.”
^ Ebr., “i aɲrunɲan’n i ɲrun.”
^ Ebr., “Bé dí like nga be yo’n i su mma.”
^ Ebr., “be tinndin be kɔmin’n (alowa’n).”
^ Annzɛ “tralɛ nga be fa wla tralɛ’m be bo’n.”
^ Yɛle kɛ, be fa like be wlɛ i sin nun be fa sie kanga mun annzɛ bisuafuɛ mun be nzɔliɛ.
