Ezai 30:1-33
30 Ndɛ nga Zoova kan’n yɛ: “Ba ɲin keklefuɛ’m be yako!+Like nga nán min yɛ n kleli’n yɛ be yo-ɔ,+be tra aenguɛ mun,* sanngɛ nán min wawɛ’n yɛ ɔ kleli be kɛ be yo sɔ-ɔ,ɔ maan be yo sa tɛ uka sa tɛ su.
2 Be kɔ Ezipti,+ be usaman min,+naan bé kó tálo Faraɔn naan ɔ sasa be,*naan bé fía Ezipti i fɔnvɔ’n i bo.
3 Sanngɛ talolɛ mɔ amun ko taloli Faraɔn kɛ ɔ sasa amun’n ti’n, ɲannzuɛn kún amun,yɛ Ezipti i fɔnvɔ mɔ amun fiɛli i bo’n ti’n, amun ɲin gúa ase.+
4 Afin i sran dandan’m be o Zoan lɔ,+yɛ i janunfuɛ’m b’a ju Anɛsi lɔ.
5 Nvle m’ɔ kwlá yoman sa kpa fi manman be’n,m’ɔ kwlá ukaman be’n, m’ɔ kwlá yoman be ye’n,mɔ saan ɲannzuɛn ɔ nin kuakualɛ yɛ ɔ fa ba’n i dunman nun ti’n,be kwlaa be ɲin gúa ase.”+
6 Be kan ndɛ wɔ nnɛn nga be o ja ngua lɔ’n:Be fa be aɲanbeun ninnge’m be sie aflunmun’m be wiasin,be fa be ninnge nga be tiannin be nuan’n be sie ɲɔnngɔnmin’m be wiasin kpɔlɛ’n su,kpɛkun be sin awlabɔɛ nin afɛ mɛn’n nun,be sin asɔmɔli’n, asɔmɔli m’ɔ kpan’n i mɛn’n nun,be sin ɔnda’n, ɔ nin wuo m’ɔ le bɔyre kpa’n, mɔ i wun kpɛ’n* be mɛn’n nun,sanngɛ ninnge sɔ’m be su yoman nvlefuɛ’m be ye.
7 Afin ukalɛ nga be kunndɛ i Ezipti sa nun’n, ɔ timan like fi mlɔnmlɔn.+I sɔ’n ti’n, n flɛli i kɛ: “Raabu+ m’ɔ ti lɛ ngbɛn’n.”
8 “Siɛn’n, kɔ naan ko klɛ i yɔbuɛ paplapa kun su be ɲrun lɛ,yɛ klɛ i fluwa kun nun,+naan cɛn wie lele’n,ɔ yo be lalofuɛ tititi.+
9 Afin be ti nvle kun mɔ be ɲin su ti kekle-ɔ,+ be mma’m be ti ato buafuɛ,+be mma’m be kunndɛman kɛ bé tí Zoova i mmla’n.*+
10 Be se jeliwafuɛ’m be kɛ: ‘Nán amun wun like,’yɛ be se aolia nun like wunfuɛ’m be kɛ: ‘Nán amun kan aolia nun ndɛ nanwlɛ mun kle e.+Amun kan ndɛ fɛfɛ mun fa laka e. Amun fa amun ɲin be sie ato ndɛ’m be su.+
11 Maan amun yaci atin’n, amun fa atin uflɛ.Nán amun kan Izraɛli Ɲanmiɛn m’ɔ ti Sanwun’n i ndɛ kle e kun.’”+
12 Ɔ maan ndɛ nga Izraɛli Ɲanmiɛn m’ɔ ti Sanwun’n kan’n yɛ:“Kɛ mɔ amun kpaloli ndɛ nga’n,+mɔ amun fali amun wla’n guali ato ndɛ mun nin gblɛ ndɛ’m be sumɔ amun lafili be su’n ti’n,+
13 sa tɛ nga ɔ́ wá yó amun su kɛ talɛ mɔ w’a kpaci’n sa,ɔ́ yó kɛ talɛ nglonglo wie mɔ w’a cia, m’ɔ su wa tɔ’n sa.Ɔ́ ká lɛ tɔ́ kpɛ kunngba.
14 Ɔ́ bó kɛ sɛ dan wie mɔ fa yɛ be fa yoli’n sa.Ɔ́ fúfú mlɔnmlɔnmlɔn, ɔ maan i bue wie fi su kaman lɛnaan b’a fa fa sin, sin trɔwlɛ’n nun,annzɛ b’a fa sa nzue.”*
15 Afin ndɛ nga e Min Zoova m’ɔ Sie Like Kwlakwla’n, Izraɛli Ɲanmiɛn m’ɔ ti Sanwun’n kan’n yɛ:“Sɛ amun sa amun sin min wun naan amun tran diin’n, amún fíte nun.Sɛ amun tran diin naan amun lafi min su’n yɛ amún ɲán wunmiɛn-ɔn.”+Sanngɛ amun akplinman su.+
16 I kpa bɔbɔ’n, amun seli kɛ: “Cɛcɛ, é wá fú nnɛn kpanngɔ’m be su éwánndi é kɔ!”Ɔ maan amún wá wánndi.“Yɛ é fú nnɛn kpanngɔ nga be wanndi ndɛndɛ kpa’n be su!”+Ɔ maan be nga bé fúan amun kusu’n, bé wánndi ndɛndɛ kpa wie.+
17 Sran akpi (1.000) bé wá úsu, sran kunngba m’ɔ́ wlánwlán be’n ti.+Sran nnun mɔ bé wá wlánwlán amun’n ti’n, amún wánndilele amun nun nga bé ká’n, bé yó kɛ like wie mɔ b’a kplɛn i oka kun su’n sa,bé yó kɛ waka kun m’ɔ ti nzɔliɛ like mɔ b’a kplɛn i kpɔlɛ kun su’n sa.+
18 Sanngɛ Zoova su minndɛ kpa* naan ɔ́ sí amun aunnvɔɛ,+ɔ́ wá jáso, kpɛkun ɔ́ sí amun aunnvɔɛ.+Afin Zoova ti Ɲanmiɛn kun m’ɔ yo sa nuan su sɛsɛ-ɔ.+Be nga be ɲin trɛn i sin titi’n,* be liɛ su ti ye.+
19 Kɛ nvlefuɛ’m bé wá trán Siɔn lɔ’n, mɔ bé trán Zerizalɛmun lɔ’n,+ a su sunman kun mlɔnmlɔn.+ Kɛ á wá kpán flɛ́ i* kɛ ɔ uka wɔ’n, saan ɔ́ sí ɔ aunnvɔɛ. Kɛ ɔ́ wá tí ɔ nɛn’n cɛ’n, ɔ́ ká lɛ tɛ́ ɔ su.+
20 Kannzɛ bɔbɔ Zoova wá yó maan ɲrɛnnɛn ng’ɔ́ wá tɔ́ amun su’n,+ ɔ́ yó kɛ amun kpanwun sa’n, yɛ yalɛ nga bé klé amun’n ɔ́ yó kɛ amun nzue sa’n, sanngɛ ɔ Like Klefuɛ Dan’n,+ ɔ su fiaman ɔ ɲrun kun.
21 Sɛ a su kɔ fama su’n annzɛ bɛ su’n,+ á wá tí ndɛ kun ɔ sin lɔ. Ɔ́ sé kɛ: “Atin’n yɛ ɔ o yɛ.+ Amun fa su.”
22 Kpɛkun amún wá yó sika nga be fa katali amun amuin nga be sɛli be’n be wun’n, ɔ nin sika ɔkwlɛ nga be fa katali amun amuin nga be kloli like yoli be’n+ be wun’n be finfin. Á wá gúa be blo kɛ tannin wie mɔ mannza w’a yo i fiɛn’n sa. Kpɛkun á sé be kɛ: “Amun fite lɔ!”*+
23 Kpɛkun ɔ́ wá yó maan nzue wá tɔ́ ninnge nga a lua be’n be su.+ Yɛ aliɛ ng’ɔ́ fíte asiɛ’n su’n, ɔ́ sɔ́n, yɛ ɔ́ yó aliɛ kpa.*+ Blɛ sɔ’n nun’n, ɔ nnɛn’m bé dídí nnɛn didiwlɛ dandan’m be nun.+
24 Kpɛkun nannin mun ɔ nin aflunmun nga be di fie su junman’n, bé dí ijre mɔ be sɛnngɛnnin i nin nɲa’n, mɔ be kpajali nun nin peli nin rato’n.
25 Cɛn nga bé wá kún sran mun dan’n, mɔ sua fleinflein’m bé bú gúa’n, nzue mun nin nzue ba mun bé wá sónji oka fleiin kwlaa,+ ɔ nin kpɔlɛ nglonglo kwlaa be su.
26 Cɛn nga Zoova wá cící i nvlefuɛ’m be lika ng’ɔ buli’n su’n,+ m’ɔ́ yó maan kannin dan nga kɛ ɔ yoli be like yaya’n ɔ tuli be’n ɔ́ wíe’n,+ anglo ba m’ɔ ta kpa’n i kpajalɛ’n ɔ́ yó kɛ wia’n i kpajalɛ’n sa. Kpɛkun wia’n i kpajalɛ’n ɔ́ kpája úka su kpa ekun sɔ kpɛ nso,+ ɔ́ yó kɛ cɛn nso lika kpajalɛ’n sa.
27 Amun nian! Zoova* fin mmua kpa lɔ ɔ su ba,i ya’n jue kɛ sin sa yɛ ɲanmiɛn ble kpikplikpi bo sin yiɛ i.I nuan bui’m b’a fa yadan kpa,yɛ i taaman’n ɔ ti kɛ sin dan wie sa.+
28 I wawɛ’n* ti kɛ nzue dan wie mɔ w’a yi lele w’a ju be kɔmin nun’n sa,naan ɔ́ fá nunnunlɛ kpukpusu’n ɔ́ kéje nvlenvle mun.Kpɛkun ɔ́ fá nnɛn kpanngɔ’m be nuan nun blalɛ’n ɔ́ wlɛ́ i nvlefuɛ’m be aoje’n nun,+ yɛ ɔ́ fá be sín atin tɛ su.
29 Sanngɛ amun jue’n ɔ́ yó kɛ jue ngakɛ bé síesíe be wun* naan bé dí cɛn’n,+ be to i kɔnguɛ’n sa.Yɛ amun klun wá jɔ́ kɛ sran mɔ kɛɔ́ kɔ́ Zoova i oka’n su lɔ’n, Izraɛli i Yɔbuɛ’n+ su lɔ’n,ɔ bo blo’n sa.*
30 Zoova wá yó maan bé tí i nɛn dan’n,+kpɛkun ɔ́ yí i sa’n i nglo,+ ɔ́ bá ya su,+ɔ́ bá kɛ sin dan wie i taaman’n sa,+ɔ́ bá kɛ nzue dan wie sa,+ kɛ nzue dan mɔ kɛ ɔ́ tɔ́’n angblannan’n tɛ’n sa, ɔ́ bá kɛ nzraama mɔ kɛ nzue tɔ́’n ɔ gua’n sa.+
31 Afin kɛ Asiri wá tí Zoova i nɛn’n, srɛ dan kpa wá kún i.+Ɔ́ wá fá waka bó i.+
32 Blɛ kwlaa nga Zoova fá waka’nɔ́ fín Asiri naan ɔ́ tú i fɔ’n,m’ɔ́ mɛ́n i sa’n su be wun alɛ kunlɛ nun’n,+bé bó su klɛn nin jru.+
33 Afin b’a dun mmua b’a siesie i Tofɛti’n.*+B’a siesie b’a sie famiɛn’n wie.+Ɔ yoli yie guawlɛ’n i kploun yɛ ɔ yoli i tɛtrɛ.Ɔ yoli sin’n i dan yɛ ɔ mannin yie kaka.Aunmuan ng’ɔ fin Zoova i bue’n nun fite’n,ɔ́ sɔ́ sin’n i nuan kɛ sufru dan wie sa.
Ja ngua lɔ ndɛ mun
^ Ebr., “be gua nzan ase,” ɔ ti weiin kɛ kɛ bé trá aenguɛ’n yɛ be yo i sɔ-ɔ.
^ Ebr., “Faraɔn i fiawlɛ’n.”
^ Annzɛ “wuo m’ɔ ti kɛ sin sa’n, m’ɔ tu’n.”
^ Annzɛ “like ng’ɔ kle’n.”
^ Be kwla se ekun kɛ “annzɛ b’a fa sa nzue, nzue guawlɛ nun.”
^ Annzɛ “i ɲin wo amun sin kpa.”
^ Annzɛ “Be nga be kunndɛ kpa kɛ bé mínndɛ i’n.”
^ Yɛle kɛ, Ɲanmiɛn.
^ Be kwla se ekun kɛ “á wá bú be kɛ wla sa.”
^ Ebr., “aliɛ mɔ lui nin ngo kpa o nun’n.”
^ Ebr., “Zoova i dunman’n.”
^ Annzɛ “Aunmuan ng’ɔ fin i bue nun fite’n.”
^ Annzɛ “kɛ bé yó be wun sanwun’n.”
^ Annzɛ “ɔ nian blo’n i tɛlɛ’n su nanti’n sa.”
^ Wa’n ɔ ti lika mɔ be yra ninnge’m be lɔ’n i nzɔliɛ, ɔ ti nunnunlɛ’n i nzɔliɛ.
