Ezai 31:1-9
31 Be nga be jra kɔ Ezipti be ko kunndɛ ukalɛ’n, be yako.+Be lafi nnɛn kpanngɔ’mbe su,+be lafi alɛ kunlɛ kakaklolo’m be su afin be sɔnnin,ɔ nin alɛ kunlɛ nnɛn kpanngɔ’m* be su afin be le wunmiɛn.Be kpɛman be ɲin Izraɛli Ɲanmiɛn m’ɔ ti Sanwun’n i su lɔ,yɛ be kunndɛman Zoova.
2 Kusu nn ɔ ti ngwlɛlɛfuɛ wie, yɛ ɔ́ wá fá ɲrɛnnɛn’n bá,ndɛ ng’ɔ ko kan’n, nnw’a kan.Ɔ nin sa tɛ yofuɛ’m be akpasua’n bé ɲɛ́n i,yɛ ɔ nin be nga be uka sa tɛ yofuɛ mun’n bé ɲɛ́n i.+
3 Eziptifuɛ’m be ti klɔ sran ngbɛn, be timan Ɲanmiɛn,be nnɛn kpanngɔ’m be ti nnɛn ngbɛn, be timan wawɛ.+Kɛ Zoova wá tínngɛ i sa’n nun’n,be nga be uka be wiengu mun’n be ja kplá,yɛ be nga be uka be’n bé tɔ́,be kwlaa bé wú blɛ kunngba’n nun.
4 Afin ndɛ nga Zoova kan kleli min’n yɛ:“Asɔmɔli’n, asɔmɔli gbanflɛn’n* m’ɔ le wunmiɛn’n, ɔ kpan naan nnɛn ng’ɔ trɛli i’n w’a kɛ i sa nun,kannzɛ nnɛn kankanfuɛ’m be ti yiɛ i wun’n,be nɛn’n ɔ kunmɛn i srɛ,be kpankpanlɛ’n ɔ yomɛn i like fi.I wafa kunngba’n, Zoova m’ɔ ti sonja’m be su kpɛn’n ɔ́ wá jrá,ɔ́ kún Siɔn Oka’n nin i kpɔlɛ’n be ti alɛ.
5 Kɛ anunman m’ɔ jra ndɛndɛ vii’n sa’n, i wafa kunngba’n Zoova m’ɔ ti sonja’m be su kpɛn’n ɔ́ wá kplí Zerizalɛmun i ti.+Ɔ́ kplí i ti, yɛ ɔ́ dé i.Ɔ́ yó maan like fi su yomɛn i, yɛ ɔ́ yó maan ɔ́ fíte nun.”
6 “Ee, Izraɛlifuɛ mun, amun sa amun sin i* mɔ amun yoli ɲin kekle dan i su’n i wun.+
7 Afin cɛn sɔ’n nun’n, amun tinuntinun amún wá kpɔ́ci amun amuin mɔ amun fali sika yoli mɔ be timan like fi’n, ɔ nin amun amuin mɔ amun fali sika ɔkwlɛ yoli mɔ be yoman sa fi ye’n. I sɔ mɔ amun yoli’n, ɔ ti sa tɛ.
8 Bé fá tokofi bé kún Asirifuɛ’n, sanngɛ nán sran sa nun tokofi-ɔ,tokofi kun wá kún i, sanngɛ nán klɔ sran sa nun tokofi-ɔ.+Tokofi’n ti’n, ɔ́ wánndi,yɛ bé míɛn i gbanflɛnmun kɛ be di junman kekle nun.
9 Srɛ dan m’ɔ́ kún i’n ti’n, i yɔbuɛ’n ɔ́ mlín,yɛ nzɔliɛ like’n* ti’n, srɛ wá kún i sran dandan mun,” ndɛ nga Zoova,mɔ i kannin’n* wo Siɔn lɔ’n, mɔ i fuu’n wo Zerizalɛmun lɔ’n ɔ kan’n yɛ ɔ o lɛ-ɔ.
Ja ngua lɔ ndɛ mun
^ Annzɛ “nnɛn kpanngɔ su fufuɛ mun.”
^ Annzɛ “asɔmɔli gbanflɛn mɔ i kɔmin nun ndrɛ’n ti vɔɔ’n.”
^ Yɛle kɛ, Ɲanmiɛn.
^ Annzɛ “waka m’ɔ ti nzɔliɛ like’n.”
^ Annzɛ “i sin’n.”
